ಏರುಗತಿಯಲ್ಲಿ ಕಾರು ಮಾರಾಟ?

ಏರುತ್ತಿದ್ದ ಇಂಧನ ಬೆಲೆ, ಬ್ಯಾಂಕ್‌ ಬಡ್ಡಿ ದರದಿಂದಾಗಿ 2014ರ ಆರಂಭದಲ್ಲಿ ಕಾರುಗಳ ಮಾರಾಟ ಅಷ್ಟಾಗಿ ಆಶಾದಾಯಕವಾಗಿರಲಿಲ್ಲ.
ಆದರೆ ಜಾಗತಿಕ ಮಟ್ಟದಲ್ಲಿ ಇಂಧನ ಬೆಲೆ ಕುಸಿಯುತ್ತಿರುವುದರಿಂದ ಕಾರು ತಯಾರಿಕಾ ಕಂಪೆನಿಗಳು ಮತ್ತೊಮ್ಮೆ ಗರಿಗೆದರಿವೆ.

ವರ್ಷದಿಂದ ವರ್ಷಕ್ಕೆ ಕಂಪೆನಿಗಳ ಮಾರಾಟ ಪ್ರಗತಿಯನ್ನು ಗಮನಿಸಿದರೆ 2013ರಕ್ಕಿಂತ ಈ ಬಾರಿ ಶೇ 10ರಷ್ಟು ಕಾರುಗಳು ಹೆಚ್ಚು ಮಾರಾಟವಾಗಿರುವುದು ಈ ಪ್ರಗತಿಗೆ ಸಾಕ್ಷಿ. ಆದರೆ ಅತಿ ಹೆಚ್ಚು ಕಾರು ಮಾರಾಟವನ್ನು ಪ್ರಗತಿಯ ಹಾದಿಯಲ್ಲಿರುವ ಮೊದಲ ಆರು ಕಂಪೆನಿಗಳು ಅನುಭವಿಸಿವೆ.

ಸರ್ಕಾರ ನೀಡಿದ ಅಬಕಾರಿ ಸುಂಕದ ರಿಯಾಯಿತಿಯ ಲಾಭವನ್ನು ಪಡೆದ ಬಹಳಷ್ಟು ಕಾರು ತಯಾರಿಕಾ ಕಂಪೆನಿಗಳಿಗೆ, ಮುಂದೆ ಅವುಗಳು ರದ್ದಾಗುವ ಭೀತಿ ಇದೆ. ಹೀಗಾಗಿ ಬರಲಿರುವ ಬಜೆಟ್ ಗಮನಿಸಿದ ನಂತರ ಕಾರ್ಯತಂತ್ರ ರೂಪಿಸುವ ಯೋಜನೆಯನ್ನು ಕಂಪೆನಿಗಳು ಹೊಂದಿವೆ. ಆದರೆ ಸದ್ಯ ತಮ್ಮಲ್ಲಿ ಮಾರಾಟವಾಗದೆ ಉಳಿದಿರುವ ಕಾರುಗಳಿಗೆ ಉತ್ತಮ ರಿಯಾಯಿತಿ ನೀಡಿ ಮಾರಾಟ ಮಾಡುವ ಪ್ರಕ್ರಿಯೆಯಲ್ಲಿ ಕಂಪೆನಿಗಳು ನಿರತವಾಗಿವೆ.

ಕಂಪೆನಿಗಳ ಮಾರಾಟ ಪ್ರಗತಿಯನ್ನು ಗಮನಿಸಿದರೆ ಸರ್ವಕಾಲಿಕ ಮಾರುತಿ ಕಾರುಗಳೇ ಮೊದಲ ಸ್ಥಾನದಲ್ಲಿ ನಿಲ್ಲುತ್ತವೆ. ಸ್ವಿಫ್ಟ್‌ ಹಾಗೂ ಹೊಸ ಆಲ್ಟೊ ಕೆ10 ಅತಿ ಹೆಚ್ಚು ಮಾರಾಟವಾಗಿವೆ. ಆದರೆ ಡಿಝೈರ್‌ ನಿರೀಕ್ಷಿತ ಮಟ್ಟದಲ್ಲಿ ಮಾರಾಟವಾಗಿಲ್ಲ. ವರ್ಷದ ಕೊನೆಯ ಹೊತ್ತಿಗೆ ಬಿಡುಗಡೆ ಮಾಡಿದ ಸಿಜಾಝ್‌ ಕೂಡಾ ಜನರ ಆಕರ್ಷಣೆಗೆ ಕಾರಣವಾಗಿದೆ. ಉಳಿದಂತೆ ವ್ಯಾಗನ್ ಆರ್, ರಿಟ್ಜ್‌ ಮುಂತಾದ ಕಾರುಗಳು ಸಮಾಧಾನಕರ ಪ್ರಗತಿ ಕಂಡಿವೆ. ಈ ಬಾರಿ ಸೇನೆಗೆ 4ಸಾವಿರ ಜಿಪ್ಸಿ ಬೇಕಾಗಿರುವುದರಿಂದ ಅದು ಕೂಡಾ ಪ್ರಗತಿಯ ಹಾದಿಯಲ್ಲಿದೆ ಎಂದು ಕೆಲ ವರದಿಗಳು ಹೇಳುತ್ತವೆ.

ಉಳಿದಂತೆ ಹ್ಯುಂಡೈ ಕೂಡಾ ಮಾರುತಿಯಂತೆಯೇ ಒಂದರ ಹಿಂದೊಂದರಂತೆ ಹೊಸ ಮಾದರಿಯ ಕಾರುಗಳನ್ನು ಬಿಡುಗಡೆ ಮಾಡುತ್ತಲೇ ಇದೆ. ಹೊಸ ಐ20 ಈಗ ಅತಿ ಹೆಚ್ಚು ಮಾರಾಟವಾಗುವ ಕಾರು ಆಗಿರುವುದರಿಂದ, ಅದರ ಮಾರಾಟ ಸಂಖ್ಯೆ ಕಂಪೆನಿಯ ಸ್ಥಾನವನ್ನು ಉಳಿಸಿಕೊಂಡಿದೆ. ಇದರ ಜತೆಯಲ್ಲೇ ಗ್ರ್ಯಾಂಡ್‌ ಐ10 ಕೂಡಾ ಉತ್ತಮವಾಗಿ ಮಾರಾಟವಾಗುತ್ತಿದೆ. ಆದರೆ ಹ್ಯುಂಡೈನ ದುಬಾರಿ ಕಾರುಗಳಾದ ಎಲೆಂಟ್ರಾ ಮೂರಂಕಿಯ ಮಾರಾಟ ಕಂಡರೆ, ಸೊನಾಟ ಒಂದಂಕಿಯಷ್ಟು ಮಾರಾಟವಾಗಿರುವುದು ಕಂಪೆನಿಗೆ ನುಂಗಲಾರದ ತುಪ್ಪವಾಗಿದೆ.

ಅದರಂತೆಯೇ ಹೋಂಡಾ ಕೂಡಾ ತನ್ನ 1.5ಲೀ ಸಾಮರ್ಥ್ಯದ ಡೀಸೆಲ್‌ ಎಂಜಿನ್‌ ಅಳವಡಿಸಿ ಹಲವು ಮಾದರಿಯನ್ನು ರಸ್ತೆಗಿಳಿಸಿರುವುದರಿಂದಲೂ ಅದರ ಮಾರಾಟವೂ ಪ್ರಗತಿಯಲ್ಲಿದೆ. ಇತ್ತೀಚೆಗೆ ಬಿಡುಗಡೆಯಾದ ಮೊಬಿಲೊಗೆ ಜನ ಮುಗಿಬಿದ್ದಿದ್ದಾರೆ. ತನ್ನ ಬಹುನಿರೀಕ್ಷಿತ ಮಾದರಿ ಸಿಟಿ ಮಾರಾಟ ಈಗ ಜೋರಾಗಿದೆ. ಹೀಗಾಗಿ ಜಪಾನ್‌ನ ಹೋಂಡಾ ಕೂಡಾ ಈಗ ಭಾರತದ ರಸ್ತೆಯಲ್ಲಿ ಒಂದಷ್ಟು ಭರವಸೆಯ ಬೆಳಕನ್ನು ಕಾಣುತ್ತಿದೆ.