ಒಬಾಮ ಜತೆ ಚಾಯ್‌ ಪೆ ಚರ್ಚಾ!
ನವದೆಹಲಿ (ಪಿಟಿಐ): ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮ ಹೈದರಾಬಾದ್‌ ಹೌಸ್‌ನಲ್ಲಿ ಗಂಭೀರವಾದ ಮಾತುಕತೆ ಆರಂಭಕ್ಕೂ ಮುನ್ನ ಕೆಲ ಕ್ಷಣಗಳನ್ನು ಲೋಕಾಭಿರಾಮವಾಗಿ ಕಳೆದರು.
ಪ್ರತಿಷ್ಠಿತ ಹೈದರಾಬಾದ್‌ ಭವನದ ಹುಲ್ಲು ಹಾಸಿನ ಮೇಲೆ ಉಭಯ ನಾಯಕರು ಅತ್ಯಂತ ಸಲುಗೆ ಹಾಗೂ ಸ್ನೇಹದಿಂದ ಹೆಜ್ಜೆ ಹಾಕಿದರು.
ಹುಲ್ಲುಹಾಸಿನ ಮೇಲೆ ಕೆಲ ನಿಮಿಷ ಗಳ ಕಾಲ ಅಡ್ಡಾಡಿ ನಂತರ ಅಲ್ಲಿಯೇ ವಿಶೇಷವಾಗಿ ಸಿದ್ಧಪಡಿಸಲಾಗಿದ್ದ ಜಾಗಕ್ಕೆ ತೆರಳಿದರು. ಅತ್ಯಂತ ಸುಂದರ ಕಲಾತ್ಮಕ ಕೆತ್ತನೆಗಳನ್ನು ಹೊಂದಿದ ಬೆಳ್ಳಿಯ ಜಗ್‌ನಲ್ಲಿದ್ದ ಚಹಾವನ್ನು ಮೋದಿ ತಮ್ಮ ಕೈಯಾರೆ ಕಪ್‌ಗೆ ಸುರಿದು ಒಬಾಮ ಅವರಿಗೆ ನೀಡಿದರು.
ನಂತರ ಚಹಾ ಸವಿಯುತ್ತಾ ಪರಸ್ಪರ ಮಾತುಕತೆ ನಡೆಸಿದರು. ಅಧಿಕೃತ ಮಾತುಕತೆಗೆ ಮುನ್ನ ಅವರು ಹೀಗೆ ಲೋಕಾಭಿರಾಮವಾಗಿ ಕೆಲ ಕ್ಷಣಗಳನ್ನು ಕಳೆದದ್ದು ಇಬ್ಬರೂ ನಾಯಕರ ನಡುವೆ ಹೆಚ್ಚುತ್ತಿರುವ ಆಪ್ತತೆಯನ್ನು ಪ್ರತಿಬಿಂಬಿಸುತ್ತದೆ ಎಂಬ ವಿಶ್ಲೇಷಣೆಗಳು ಕೇಳಿಬರುತ್ತಿವೆ. ಲೋಕಸಭಾ ಚುನಾವಣೆ ವೇಳೆ ಮೋದಿ ಆರಂಭಿಸಿದ್ದ ‘ಚಾಯ್‌ ಪೆ ಚರ್ಚಾ’ ಎಲ್ಲರ ಗಮನ ಸೆಳೆದಿತ್ತು.
|
ಟೆಲಿಗ್ರಾಂ ಪ್ರತಿ ಕೊಡುಗೆ |
ಶಿಷ್ಟಾಚಾರ ಬದಿಗಿಟ್ಟ ಮೋದಿ!: ಸ್ವತಃ ಪ್ರಧಾನಿ ಮೋದಿ ಅವರೇ ವಿಮಾನ ನಿಲ್ದಾಣಕ್ಕೆ ತೆರಳಿ ಗಣರಾಜ್ಯೋತ್ಸವದ ಮುಖ್ಯ ಅತಿಥಿ ಒಬಾಮ ಅವರನ್ನು ಸ್ವಾಗತಿಸುವ ಮೂಲಕ ಶಿಷ್ಟಾಚಾರವನ್ನು ಬದಿಗಿಟ್ಟ ಪ್ರಸಂಗ ನಡೆಯಿತು.
ಭಾನುವಾರ ಇಲ್ಲಿಯ ಪಾಲಂ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಒಬಾಮ ಅವರನ್ನು ಮೋದಿ ಖುದ್ದಾಗಿ ಬರ ಮಾಡಿಕೊಂಡರು. ಉಭಯ ನಾಯಕರು ಪರಸ್ಪರ ಆಲಂಗಿಸಿಕೊಂಡು ಶುಭಾಶಯ ವಿನಿಮಯ ಮಾಡಿಕೊಂಡರು. ಮೋದಿ ಶಿಷ್ಟಾಚಾರ ಮುರಿಯುತ್ತಿ ರುವ ಮೊದಲ ಪ್ರಧಾನಿ ಅಲ್ಲ. ಇದಕ್ಕೂ ಮೊದಲು 2010ರಲ್ಲಿ ಅಂದಿನ ಪ್ರಧಾನಿ ಮನಮೋಹನ್‌ ಸಿಂಗ್‌ ಹಾಗೂ ಗುರುಶರಣ್‌ ಕೌರ್‌ ಅವರು ಖುದ್ದಾಗಿ ಒಬಾಮ ದಂಪತಿಯನ್ನು ಬರಮಾಡಿ ಕೊಂಡಿದ್ದರು.
ಮೋದಿಗೆ ಬಾಲಿವುಡ್‌ ತಾರೆಯ ಸ್ವಾಗತ!: ಕಳೆದ ವರ್ಷ ಅಮೆರಿಕಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ನರೇಂದ್ರ ಮೋದಿ ಅವರು ಮ್ಯಾಡಿಸನ್‌ ಸ್ಕ್ವೆರ್‌ ಗಾರ್ಡನ್‌ನಲ್ಲಿ ನೆರೆದಿದ್ದ ಸಾವಿರಾರು ಭಾರತೀಯ ಅಭಿಮಾನಿಗಳಿಗೆ ಥೇಟ್‌ ಬಾಲಿವುಡ್‌ ತಾರೆಯಂತೆ ಶುಭಕೋರಿದ್ದರು ಎಂದು ಒಬಾಮ ಹಾಸ್ಯ ಚಟಾಕಿ ಹಾರಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.