ಕಟ್ಟಡ ಕಾಮಗಾರಿಗೆ ಸಂಸ್ಕರಿಸಿದ ನೀರು

ಬೆಂಗಳೂರು: ‘ಎರಡು ಹಂತಗಳಲ್ಲಿ ಸಂಸ್ಕರಿಸಿದ ಕೊಳಚೆ ನೀರನ್ನು ಕಟ್ಟಡ ನಿರ್ಮಾಣ ಕಾಮಗಾರಿಯಲ್ಲಿ ಬಳಸುವ ಸಂಬಂಧ ರಿಯಲ್ ಎಸ್ಟೇಟ್‌ ಡೆವಲಪರ್‌ಗಳ ಒಕ್ಕೂಟದ (ಕ್ರಡಾಯ್‌) ಪ್ರತಿನಿಧಿಗಳ ಜತೆ ಚರ್ಚೆ ನಡೆಸಲಾಗಿದೆ’ ಎಂದು ಜಲಮಂಡಳಿ ಅಧ್ಯಕ್ಷ ಟಿ.ಎಂ. ವಿಜಯಭಾಸ್ಕರ್‌ ತಿಳಿಸಿದರು.
ಭಾರತೀಯ ಕೈಗಾರಿಕಾ ಒಕ್ಕೂಟ (ಸಿಐಐ) ಏರ್ಪಡಿಸಿದ್ದ ‘ಜಲ ಸಮಾವೇಶ’ದ ಉದ್ಘಾಟನಾ ಸಮಾರಂಭದಲ್ಲಿ ಗುರುವಾರ ಅವರು ಮಾತನಾಡಿದರು.

‘ಸಂಸ್ಕರಿಸಿದ ನೀರಿನ ಬಳಕೆಗೆ ಕ್ರಡಾಯ್‌ನಿಂದ ಆಸಕ್ತಿ ವ್ಯಕ್ತವಾಗಿದೆ. ಅತ್ಯಲ್ಪ ದರಕ್ಕೆ ನಾವು ನೀರು ಪೂರೈಕೆ ಮಾಡಲಿದ್ದೇವೆ. ಈ ಯೋಜನೆ ಕಾರ್ಯಗತವಾದರೆ ಅಂತರ್ಜಲದ ಬಳಕೆಯ ಪ್ರಮಾಣ ಕಡಿಮೆ ಆಗಲಿದೆ’ ಎಂದು ವಿವರಿಸಿದರು.

‘ನಗರದಲ್ಲಿ ಪ್ರತಿದಿನ 155 ಕೋಟಿ ಲೀಟರ್‌ ನೀರಿನ ಬಳಕೆ ಮಾಡಲಾಗುತ್ತಿದೆ. ಅದರಲ್ಲಿ ನಿತ್ಯ 130 ಕೋಟಿ ಲೀಟರ್‌ ನೀರು ಬಳಕೆಯಾದ ಮೇಲೆ ಚರಂಡಿ ಪಾಲಾಗುತ್ತಿದೆ. ಸದ್ಯ ಪ್ರತಿದಿನ 60 ಕೋಟಿ ಲೀಟರ್‌ ನೀರು ಸಂಸ್ಕರಣೆ ಮಾಡಲಾಗುತ್ತಿದೆ. ಹೊಸ ಘಟಕಗಳು ಕಾರ್ಯಾರಂಭ ಮಾಡಿದಾಗ ವರ್ಷಾಂ
ತ್ಯದ ವೇಳೆಗೆ ನಿತ್ಯ 110 ಕೋಟಿ ಲೀಟರ್‌ ನೀರಿನ ಸಂಸ್ಕರಣೆ ಮಾಡಲು ಸಾಧ್ಯವಾಗುತ್ತದೆ’ ಎಂದು ಮಾಹಿತಿ ನೀಡಿದರು.

‘ಮೂರು ಹಂತದಲ್ಲಿ ಸಂಸ್ಕರಣೆಗೆ ಮಾಡಿದ ನೀರನ್ನು ಕೈಗಾರಿಕೆಗಳ ಬಳಕೆಗೆ ಕೊಡಲು ಸಿದ್ಧರಿದ್ದೇವೆ. ಪ್ರತಿ ಸಾವಿರ ಲೀಟರ್‌ ಕಾವೇರಿ ನೀರು ₹ 70ಕ್ಕೆ ಸಿಕ್ಕರೆ, ಸಂಸ್ಕರಿಸಿದ ನೀರು ನಿಮಗೆ ಕೇವಲ ₹ 15ಕ್ಕೆ ಸಿಗಲಿದೆ. ಕುಡಿಯುವುದನ್ನು ಹೊರತುಪಡಿಸಿ ಮಿಕ್ಕೆಲ್ಲ ಉದ್ದೇಶಕ್ಕೂ ಸಂಸ್ಕರಿಸಿದ ನೀರನ್ನು ಬಳಕೆ ಮಾಡಬಹುದು’ ಎಂದು ಹೇಳಿದರು.

‘ಬೆಂಗಳೂರಿನ ಉತ್ತರ ಭಾಗದ ಬೇಡಿಕೆಯನ್ನು ಸಂಪೂರ್ಣವಾಗಿ ಪರಿಹರಿಸಲು ಆಗಿಲ್ಲ. ಹೀಗಾಗಿ ಅಲ್ಲಿ ಒತ್ತಡ ಹೆಚ್ಚಿದೆ. ಹೆಬ್ಬಾಳ ಹಾಗೂ ಯಲಹಂಕ ಭಾಗದ ಕೆರೆಗಳಲ್ಲಿ ಶುದ್ಧನೀರು ಸಂಗ್ರಹಿಸಿ, ಪೂರೈಸಲು ನಿರ್ಧರಿಸಲಾಗಿದೆ. ಸಿಂಗಪುರ ಸಂಸ್ಥೆಗೆ ವಿವರವಾದ ಯೋಜನೆ ತಯಾರಿಸಲು ಗುತ್ತಿಗೆ ನೀಡಲಾಗಿದೆ’ ಎಂದು ವಿವರಿಸಿದರು.

‘ನಿತ್ಯ 52 ಕೋಟಿ ನೀರಿನ ಸಂಸ್ಕರಣೆಗೆ ಅಗತ್ಯವಾದ ಘಟಕಗಳ ನಿರ್ಮಾಣಕ್ಕೆ ಸರ್ಕಾರದ ಅನುಮತಿ ಕೇಳಲಾಗಿದೆ. ಘಟಕಗಳನ್ನು ನಿರ್ಮಾಣ, ನಿರ್ವಹಣೆ ಹಸ್ತಾಂತರ (ಬಿಒಟಿ) ಆಧಾರದ ಮೇಲೆ ಸ್ಥಾಪಿಸಲು ಏಳು ವರ್ಷಗಳ ಅವಧಿಗೆ ಗುತ್ತಿಗೆ ನೀಡಲಾಗುತ್ತದೆ’ ಎಂದು ತಿಳಿಸಿದರು.
ಜರ್ಮನಿಯ ಕಾನ್ಸಲ್‌ ಜನರಲ್‌ ಜಾರ್ನ್‌ ರೋಡ್‌, ‘ನಮ್ಮಲ್ಲೂ ನದಿಗಳು ಕಲುಷಿತಗೊಂಡಿದ್ದವು. ಆದರೆ, ಅವುಗಳನ್ನೆಲ್ಲ ಈಗ ಶುದ್ಧೀಕರಿಸಿದ್ದೇವೆ.

ಬಳಕೆಯಾದ ಶೇ 98ರಷ್ಟು ನೀರನ್ನು ಸಂಸ್ಕರಣೆ ಮಾಡಿ ಮರುಬಳಕೆ ಮಾಡಲಾಗುತ್ತಿದೆ. ನೀರಿನ ಸದ್ಬಳಕೆ ಆಗುವಂತೆ ನೋಡಿಕೊಳ್ಳಲು ಅಪವ್ಯಯ ಮಾಡಿದವರಿಗೆ ಭಾರಿ ದಂಡ ವಿಧಿಸಲಾಗುತ್ತದೆ’ ಎಂದು ವಿವರಿಸಿದರು.

‘ಪತ್ರಿಕೆಗಳಲ್ಲಿ ನಾನು ಗಮನಿಸಿದಂತೆ ಬೆಂಗಳೂರಿನ ನೀರಿನ ಸಮಸ್ಯೆಗೆ ಕೆರೆಗಳ ಅತಿಕ್ರಮಣ, ನೀರಿನ ದುರ್ಬಳಕೆ ಹಾಗೂ ಸಂಸ್ಕರಿಸಿದ ನೀರಿನ ಬಳಕೆಯಲ್ಲಿ ಅನಾದರ ಮುಖ್ಯ ಕಾರಣವಾಗಿವೆ’ ಎಂದು ವಿಶ್ಲೇಷಿಸಿದರು.

‘ಇನ್ವೆಸ್ಟ್‌ ಕರ್ನಾಟಕಕ್ಕೆ ಬಂದಿದ್ದ ಜರ್ಮನಿಯ ಉದ್ದಿಮೆದಾರರು ರಾಜ್ಯದಲ್ಲಿ ನೀರು ಮತ್ತು ವಿದ್ಯುತ್‌ ಪೂರೈಕೆ ಹೇಗಿದೆ ಎಂದು ಕೇಳಿದರು. ಕೈಗಾರಿಕೆ ಬೆಳೆಯುವ ದೃಷ್ಟಿಯಿಂದಲೂ ನೀರಿನ ಪಾತ್ರ ದೊಡ್ಡದಿದೆ. ಕೆರೆಗಳ ಶುದ್ಧೀಕರಣಕ್ಕೆ ಅಗತ್ಯವಾದ ತಂತ್ರಜ್ಞಾನ ಕೊಡಲು ಜರ್ಮನಿ ಸಿದ್ಧವಿದೆ. ಗಂಗಾನದಿ ಶುದ್ಧೀಕರಣ ಪ್ರಕ್ರಿಯೆಯಲ್ಲೂ ನಾವು ಕೈಜೋಡಿಸುತ್ತಿದ್ದೇವೆ’ ಎಂದು ವಿವರಿಸಿದರು.

ಸಮಾವೇಶ ಉದ್ಘಾಟಿಸಿದ ಬೆಂಗಳೂರು ಅಭಿವೃದ್ಧಿ  ಸಚಿವ ಕೆ.ಜೆ. ಜಾರ್ಜ್‌, ‘ನೀರಿನ ಮರು ಬಳಕೆ ತಂತ್ರಜ್ಞಾನವನ್ನು ಕೈಗಾರಿಕೆ ಘಟಕಗಳು ಅಳವಡಿಸಿಕೊಳ್ಳಬೇಕು’ ಎಂದು ಸಲಹೆ ನೀಡಿದರು.

‘ನಗರದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಜಲ ಕಾರ್ಯಕರ್ತರಿದ್ದು, ಅವರ ಮೂಲಕ ಜಲ ಜಾಲವನ್ನು ನಿರ್ಮಾಣ ಮಾಡುವ ಪ್ರಯತ್ನ ನಡೆದಿದೆ’ ಎಂದು ಸಿಐಐ ಜಲ ಕಾರ್ಯಪಡೆ ಮುಖ್ಯಸ್ಥ ಹರಿಪ್ರಸಾದ್‌ ಹೆಗಡೆ ಅವರು ವಿವರಿಸಿದರು.