ಪಣಜಿ(ಪಿಟಿಐ): ಡಾಲ್ಫಿನ್‌ಗಳನ್ನು ನೋಡಲು ಸಮುದ್ರಕ್ಕೆ ತೆರಳಿದ್ದ ರಷ್ಯಾದ ಪ್ರವಾಸಿಗರಿದ್ದ ದೋಣಿ ಭಾರಿ ಅಲೆಗಳಿಗೆ ಮುಳುಗಿದ ಪರಿಣಾಮ ಮೂವರು ಮಹಿಳೆಯರು ಮೃತಪಟ್ಟು ಏಳು ಜನ ಪಾರಾದ ಘಟನೆ ಮಂಗಳವಾರ ನಡೆದಿದೆ.
ಪಣಜಿಯಿಂದ 60 ಕಿ.ಮೀ.ದೂರದ ಬೇತುಲ್ ಗ್ರಾಮದ ಸಮೀಪ ಈ ದುರ್ಘಟನೆ ನಡೆದಿದೆ. ಡಾಲ್ಫಿನ್‌ಗಳನ್ನು ನೋಡಲು 10 ರಷ್ಯಾ ಪ್ರವಾಸಿಗರು ತೆರಳಿದ್ದರು. ಬೆಳಿಗ್ಗೆ 11 ಗಂಟೆ ಸುಮಾರಿಗೆ ದೋಣಿ ಭಾರಿ ಅಲೆಗೆ ಸಿಕ್ಕಿ ಮುಳುಗಿತು ಎಂದು ಗೋವಾ ಪ್ರವಾಸೋದ್ಯಮ ಇಲಾಖೆ ನೌಕಾಪಡೆ ಸಿಬ್ಬಂದಿ ಹೇಳಿದ್ದಾರೆ.
ಈ ಮೂವರು ಮಹಿಳೆಯರ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಮಡಗಾಂವ್‌ ಆಸ್ಪತ್ರೆಗೆ ಕೊಂಡೊಯ್ಯಲಾಗಿದೆ. ಪ್ರತಿಕೂಲ ಹವಾಮಾನ ಕಾರಣದಿಂದಾಗಿ ಪ್ರವಾಸಿಗರು ಸಮುದ್ರಕ್ಕೆ ಇಳಿಯದಂತೆ ಸೂಚನೆ ನೀಡಲಾಗಿತ್ತು.
