ನವಲಗುಂದ–ನರಗುಂದಕ್ಕೆ ಖಾಕಿ ಸರ್ಪಗಾವಲು

‘ಸುಮ್ನ ಮನ್ಯಾಗ್ ಓದಕೋಂತ ಕುಂತಿದ್ದ ಮಗನ್ನ ಕರ್ಕೊಂಡು ಹೋಗ್ಯಾರ್ರೀ. ಮುಂದಿನ ತಿಂಗ್ಳು ಯೋಳನೇ ತಾರೀಖಿಗೆ ಮಗಾ ಐ.ಎ.ಎಸ್‌ ಪರೀಕ್ಷೆ ಬರಿಯಾಂವ ಇದ್ದ. ಓದಕೋಂತ ಕುಂತಂವ್ಗ ಪೊಲೀಸ್ರು ಬೂಟುಗಾಲಲ್ಲಿ ಒದ್ದು, ಕರ್ಕೊಂಡು ಹೋಗ್ಯಾರ್ರೀ....’ ಎಂದು ಹರಿಕೃಷ್ಣ ಅವರ ತಾಯಿ ಸುಜಾತಾ ಸುದ್ದಿಗಾರರ ಎದುರು ಗೋಳಿಟ್ಟರು.

‘ಒಂದು ವರ್ಷದಿಂದ ಎಷ್ಟೋ ಮಕ್ಕಳ ಪರೀಕ್ಷೆ ಹಾಳು ಮಾಡಿದ್ದೀರಿ ನೀವು. ಈಗ ನಿಮ್ಮ ಮಗನ ವಿಷಯ ಬಂದಾಗ ಬೇಸರವಾಗುತ್ತದೆಯೇ? ನಿಮಗೂ ಅದು ಅರ್ಥವಾಗಬೇಕು. ಅಂದರೆ ಅದು ಇತರರಿಗೆ ಪಾಠವಾಗುತ್ತದೆ’ ಎಂದು ಪೊಲೀಸರು ಈ ಸಂದರ್ಭದಲ್ಲಿ ಹೇಳಿದರು ಎನ್ನಲಾಗಿದೆ.

ಶಾಲಾ–ಕಾಲೇಜುಗಳಿಗೆ ರಜೆ
ಕರ್ನಾಟಕ ಬಂದ್‌ ಹಿನ್ನೆಲೆಯಲ್ಲಿ ಧಾರವಾಡ, ಹಾವೇರಿ, ಗದಗ, ಬೆಳಗಾವಿ, ಬಾಗಲಕೋಟೆ ಜಿಲ್ಲೆಯ ಶಾಲಾ ಕಾಲೇಜುಗಳಿಗೆ ಶನಿವಾರ ರಜೆ ಘೋಷಿಸಲಾಗಿದೆ.

ಪರಿಸ್ಥಿತಿಯನ್ನು ನೋಡಿಕೊಂಡು ಬಸ್‌ ಸಂಚಾರ ಆರಂಭಿಸುವ ಬಗ್ಗೆ ನಿರ್ಧರಿಸಲಾಗುವುದು ವಾಯವ್ಯ ಸಾರಿಗೆ ಸಂಸ್ಥೆ ಅಧಿಕಾರಿಗಳು ತಿಳಿಸಿದ್ದಾರೆ.

ಶಾಸಕ ಅಶೋಕ ಪಟ್ಟಣ ರಾಜೀನಾಮೆ?
ರಾಮದುರ್ಗ (ಬೆಳಗಾವಿ ಜಿಲ್ಲೆ): ಮಹಾದಾಯಿ ನ್ಯಾಯಮಂಡಳಿಯಲ್ಲಿ ರಾಜ್ಯದ ಮಧ್ಯಂತರ ಅರ್ಜಿ ವಜಾಗೊಂಡ ಹಿನ್ನೆಲೆಯಲ್ಲಿ ರಾಮದುರ್ಗದ ಶಾಸಕ ಅಶೋಕ ಪಟ್ಟಣ ಮತ್ತು ಕಾಂಗ್ರೆಸ್‌ ಪಕ್ಷದ ಚುನಾಯಿತ ಪ್ರತಿನಿಧಿಗಳು ಶುಕ್ರವಾರ ತಹಶೀಲ್ದಾರ ತುಕಾರಾಮ ದಾಸರ ಅವರಿಗೆ ರಾಜೀನಾಮೆ ಸಲ್ಲಿಸಿದರು.

ಆದರೆ, ಇದೊಂದು ನಾಟಕ ಎಂದು ಮೂದಲಿಸಿರುವ ಮಾಜಿ ಶಾಸಕ, ಬಿಜೆಪಿಯ ಮಹಾದೇವಪ್ಪ ಯಾದವಾಡ, ‘ನಿನ್ನೆ ತನಕ ಬೆಂಗಳೂರಿನಲ್ಲಿಯೇ ಇದ್ದ ಶಾಸಕರು ವಿಧಾನಸಭಾಧ್ಯಕ್ಷರಿಗೆ ರಾಜೀನಾಮೆ ಸಲ್ಲಿಸಿಲ್ಲ. ಪ್ರತಿಭಟನೆಕಾರರು ತಮ್ಮ ಮನೆಗೆ ಮುತ್ತಿಗೆ ಹಾಕುವ ಭಯದಿಂದ ಈ ಢೋಂಗಿತನ ಪ್ರದರ್ಶಿಸಿದ್ದಾರೆ’ ಎಂದು ಟೀಕಿಸಿದ್ದಾರೆ.

‘ಮೇಲ್ಮನವಿ ಸಲ್ಲಿಸುವುದೊಂದೇ ಮಾರ್ಗ’
ಬೇಲೂರು: ‘ನೀರು ಹಂಚಿಕೆ ಸಂಬಂಧ ಮಹಾದಾಯಿ ನ್ಯಾಯ ಮಂಡಳಿ ವಾಸ್ತವಾಂಶ ಅರಿಯದೇ ರಾಜ್ಯದ ಬಗ್ಗೆ ತಪ್ಪು ತೀರ್ಪು ನೀಡಿದೆ’ ಎಂದು ನಿವೃತ್ತ ಲೋಕಾಯುಕ್ತ ನ್ಯಾಯಮೂರ್ತಿ ಸಂತೋಷ್‌ ಹೆಗ್ಡೆ ಅಭಿಪ್ರಾಯಪಟ್ಟರು.

ಸುಪ್ರೀಂಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸುವುದೊಂದೇ ಈಗ ಉಳಿದಿರುವ ಮಾರ್ಗ ಎಂದರು.

ತಾಲ್ಲೂಕು ಕಾಫಿ ಬೆಳೆಗಾರರ ಸಮಾವೇಶದಲ್ಲಿ ಭಾಗವಹಿಸಲು ಬಂದಿದ್ದ ಸಂದರ್ಭದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿ, ಕುಡಿಯಲು ನೀರು ಕೊಡಿ ಎಂದು ಕೇಳಲಾಗಿತ್ತೇ ಹೊರತು ವ್ಯವಸಾಯಕ್ಕೆ ನೀರು ಕೊಡಿ ಎಂದಲ್ಲ. ನ್ಯಾಯಮಂಡಳಿ ಇದನ್ನು ಅರಿತು ತೀರ್ಪು ನೀಡಬೇಕಿತ್ತು ಎಂದು ಹೇಳಿದರು.

ನ್ಯಾಯಮಂಡಳಿ ಮಧ್ಯಂತರ ತೀರ್ಪು ನೀಡುವ ಮುನ್ನ ಜನರ ಹಿತಾಸಕ್ತಿಯಿಂದ ಸ್ಥಳಕ್ಕೆ ಹೋಗಿ ಪರಿಶೀಲಿಸಿ ತೀರ್ಪು ನೀಡಬೇಕಿತ್ತು. ನೀರು ಎತ್ತುವಳಿ ಮಾಡುವ ಸ್ಥಳದಲ್ಲಿ ನೀರಿದೆ ಎಂಬ ಪುರಾವೆಯನ್ನು ರಾಜ್ಯ ಸರ್ಕಾರ ನ್ಯಾಯಮಂಡಳಿಗೆ ನೀಡಬೇಕಿತ್ತು. ಒಟ್ಟಾರೆ ನೀರಿನಲ್ಲಿ ಶೇ 30ರಷ್ಟು ಸಮುದ್ರ ಪಾಲಾಗುತ್ತಿದೆ. ಇದರಲ್ಲಿ 7.5 ಟಿಎಂಸಿ ಅಡಿ ನೀರನ್ನು ಕುಡಿಯಲು ನೀಡುವಂತೆ ಕೇಳಿತ್ತು. ಮಾನವೀಯತೆ ದೃಷ್ಟಿಯಿಂದ ನ್ಯಾಯ ಮಂಡಳಿ ನೀರು ನೀಡುವ ಬಗ್ಗೆ ಪರಿಶೀಲಿಸಬಹುದಿತ್ತು ಎಂದರು.

ಶಾಂತಿ ಕಾಪಾಡಲು ಮನವಿ
ಬೆಂಗಳೂರು: ಬಂದ್‌ ಸಂದರ್ಭದಲ್ಲಿ ಸಾರ್ವಜನಿಕ ಆಸ್ತಿಪಾಸ್ತಿಗೆ ಹಾನಿ ಮಾಡದೆ, ಶಾಂತಿಯಿಂದ ವರ್ತಿಸಬೇಕು ಎಂದು ಗೃಹ ಸಚಿವ ಡಾ. ಜಿ. ಪರಮೇಶ್ವರ್‌  ಮನವಿ ಮಾಡಿದ್ದಾರೆ.

ಮಾಧ್ಯಮ ಗೋಷ್ಠಿಯಲ್ಲಿ ಶುಕ್ರವಾರ ಮಾತನಾಡಿದ ಅವರು, ಧಾರವಾಡ, ಗದಗ ಜಿಲ್ಲೆಗಳಲ್ಲಿ ಗುರುವಾರ ನಡೆದ ಪ್ರತಿಭಟನೆಯಿಂದಾಗಿ ಏಳು ಸರ್ಕಾರಿ ಕಚೇರಿಗಳಿಗೆ ಹಾನಿಯಾಗಿದೆ.

ಶನಿವಾರದ ಬಂದ್‌ ಸಂದರ್ಭದಲ್ಲಿ ಯಾವುದೇ ಅಹಿತಕರ ಘಟನೆ, ಹಿಂಸೆ ನಡೆಯದಂತೆ ಕಟ್ಟೆಚ್ಚರ ವಹಿಸಲು ಎಲ್ಲಾ ಜಿಲ್ಲೆಗಳ ಪೊಲೀಸ್‌ ವರಿಷ್ಠಾಧಿಕಾರಿಗಳಿಗೆ ಸೂಚಿಸಲಾಗಿದೆ ಎಂದರು.

ಮಹಾದಾಯಿ ನ್ಯಾಯಮಂಡಳಿಯ ಮಧ್ಯಂತರ ಆದೇಶ ಕುರಿತು ಕಾಂಗ್ರೆಸ್‌ ಪಕ್ಷಕ್ಕೆ ಅಸಮಾಧಾನವಿದೆ. ರಾಜ್ಯದ ಜನತೆ ಕುಡಿಯುವ ನೀರಿಗಾಗಿ ನಡೆಸುತ್ತಿರುವ ನ್ಯಾಯಯುತ ಹೋರಾಟಕ್ಕೆ ಪಕ್ಷದ ತಾತ್ವಿಕ ಬೆಂಬಲವಿದೆ ಎಂದು ಪರಮೇಶ್ವರ್‌ ಹೇಳಿದರು.
ಬಂದ್‌ ಸಂದರ್ಭದಲ್ಲಿ ಕಾನೂನು ಮೀರಿ ವರ್ತಿಸುವವರ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದೂ ಎಚ್ಚರಿಸಿದರು.

ವಿಷ ಸೇವಿಸಿದ ಯುವಕರ ಚೇತರಿಕೆ
ಹುಬ್ಬಳ್ಳಿ: ಶನಿವಾರದ ಬಂದ್‌ ಸಂದರ್ಭದಲ್ಲಿ ನವಲಗುಂದ ಮತ್ತು ನರಗುಂದ ಭಾಗದ ಮಹಾದಾಯಿ ಹೋರಾಟಗಾರರಿಗೆ ಹುಬ್ಬಳ್ಳಿ ಪ್ರವೇಶಕ್ಕೆ ನಿರ್ಬಂಧ ಹೇರಲು ಪೊಲೀಸರು ಚಿಂತನೆ ನಡೆಸಿದ್ದಾರೆ.

ಈ ಎರಡೂ ಪಟ್ಟಣಗಳಲ್ಲಿ ನಿಷೇಧಾಜ್ಞೆ ಇದ್ದು, ಅಲ್ಲಿನ ರೈತರು ಹುಬ್ಬಳ್ಳಿ ಕಡೆ ಬರದಂತೆ ಕಟ್ಟೆಚ್ಚರವಹಿಸಲು ಪೊಲೀಸರು ಯೋಜನೆ ರೂಪಿಸಿದ್ದಾರೆ. ನರಗುಂದದಲ್ಲಿ ಗುರುವಾರ ನಡೆದ ಪ್ರತಿಭಟನೆ ಸಂದರ್ಭದಲ್ಲಿ ವಿಷ ಸೇವಿಸಿ, ಆತ್ಮಹತ್ಯೆಗೆ ಯತ್ನಿಸಿದ ಸಂಗಮೇಶ ಚರಂತಿಮಠ ಮತ್ತು ನಂದೀಶ ಮಠದ ಚೇತರಿಸಿಕೊಳ್ಳುತ್ತಿದ್ದಾರೆ.