ಮೂಲಸೌಕರ್ಯ ಅಭಿವೃದ್ಧಿಯಾಗಲಿ

ಪ್ರಮುಖ ರಾಷ್ಟ್ರೀಯ ಹೆದ್ದಾರಿಗಳ ಉದ್ದಕ್ಕೂ ಅಲ್ಲಲ್ಲಿ ನಿಲ್ಲುತ್ತ ಶುಲ್ಕ ತೆರುತ್ತಲೇ ಹೋಗಬೇಕಿದ್ದ ವಾಣಿಜ್ಯೇತರ ಖಾಸಗಿ ವಾಹನಗಳ ಮಾಲೀಕರ, ಚಾಲಕರ ಕಷ್ಟ ಕೇಂದ್ರ ಭೂಸಾರಿಗೆ ಮತ್ತು ಹೆದ್ದಾರಿ ಸಚಿವಾ­ಲ­ಯದ ಗಮನಕ್ಕೆ ಬಂದಂತಿದೆ. ಹೀಗಾಗಿಯೇ ಅದು ಈಗ ವಾಣಿಜ್ಯ ಉದ್ದೇ­ಶದ ವಾಹನಗಳನ್ನು ಹೊರತುಪಡಿಸಿ ಉಳಿದೆಲ್ಲ ವಾಹನಗಳಿಗೆ ಹೆದ್ದಾರಿ ಸುಂಕದಿಂದ ವಿನಾಯತಿ ನೀಡಲು ಉದ್ದೇಶಿಸಿದ್ದು, ಹೊಸ ನೀತಿ ಸಿದ್ಧಪಡಿಸುವ ಕಾರ್ಯದಲ್ಲಿ ತೊಡಗಿದೆ. ಇದರಿಂದ ಸಾರ್ವಜನಿಕರಿಗೆ ಅನುಕೂಲವಾಗುವ ನಿರೀಕ್ಷೆ ಇದೆ. 

ಕಡ್ಡಾಯ ಟೋಲ್ ಮತ್ತು ದುಬಾರಿ ಮೊತ್ತವೇ ಅನೇಕ ಕಡೆ ತೀವ್ರ ಪ್ರತಿಭಟನೆಗಳಿಗೂ ಕಾರಣವಾಗಿತ್ತು. ನಮ್ಮ ರಾಜ್ಯವೂ ಸೇರಿದಂತೆ ದೇಶದ ವಿವಿಧೆಡೆ ಟೋಲ್ ಕೇಂದ್ರಗಳ ಎದುರು ಪ್ರತಿಭಟನೆ, ದಾಳಿ, ಹಿಂಸಾ­ಕೃತ್ಯ­ಗಳೂ ನಡೆದಿದ್ದವು. ಇದನ್ನೆಲ್ಲ ಸಚಿವಾಲಯ ಗಣನೆಗೆ ತೆಗೆದುಕೊಂಡಂತೆ ಕಾಣುತ್ತದೆ. ಪರಿಷ್ಕೃತ ನೀತಿ ಜಾರಿಗೆ ಬಂದರೆ ಟ್ಯಾಕ್ಸಿಗಳು, ಬಸ್, ಲಾರಿ ಮತ್ತಿ­ತರ ವಾಣಿಜ್ಯ, ಸರಕು ಸಾಗಣೆ ವಾಹನಗಳನ್ನು ಹೊರತುಪಡಿಸಿ ಇನ್ನುಳಿದ ವಾಹನ­ಗಳ ಮಾಲೀಕರು ನಿರಾಳವಾಗಿ, ತ್ವರಿತವಾಗಿ ಸಂಚರಿಸಲು ಸಾಧ್ಯ­ವಾಗ­ಲಿದೆ.   ಈಗಾಗಲೆ ನಿರ್ಮಾಣ, ಸ್ವಾಮ್ಯ, ನಿರ್ವಹಣೆ, ಹಸ್ತಾಂತರ (ಬಿಒ­ಒಟಿ) ನೀತಿಯಡಿ ಖಾಸಗಿಯವರು ನಿರ್ಮಿಸಿದ ಹೆದ್ದಾರಿಗಳಲ್ಲಿ ಟೋಲ್ ಸಂಗ್ರಹ ಮುಂದುವರಿಯುತ್ತದೆ. ಇದೇ ನೀತಿಯಡಿ ಹೊಸದಾಗಿ ನಿರ್ಮಾಣವಾಗುವ ರಸ್ತೆಗಳಿಗೆ ಮಾತ್ರ ಟೋಲ್ ವಿನಾಯತಿ ಅನ್ವಯ­ವಾ­ಗು­ತ್ತದೆ. ಹೆದ್ದಾರಿ ನಿರ್ಮಾಣಕ್ಕೆ ಹೂಡಿದ ಬಂಡವಾಳ ವಾಪಸ್ ಬಂದ ನಂತ­ರವೂ ಟೋಲ್ ವಸೂಲಿ ಮುಂದುವರಿಸುವುದಕ್ಕೆ ಬಹಳ ಕಾಲದಿಂದಲೂ ತಕರಾರಿತ್ತು. ಕೇಂದ್ರ ಹೆದ್ದಾರಿ ಸಚಿವ ನಿತಿನ್ ಗಡ್ಕರಿಯವರೂ ಈಗ ಅದಕ್ಕೆ ದನಿಗೂಡಿಸಿದ್ದಾರೆ. ಇಂಥಲ್ಲಿ ಟೋಲ್ ಸ್ಥಗಿತಗೊಳಿಸಬೇಕು ಎಂಬ ಸಲಹೆ ಇಟ್ಟಿದ್ದಾರೆ. ಆದರೆ ಅಧಿಕಾರಿಗಳಿಂದ ಇದಕ್ಕೆ ಆಕ್ಷೇಪ ಇದೆ ಎನ್ನಲಾಗುತ್ತಿದೆ.