ಮೊದಲ ಸಮ್ಮೇಳನಕ್ಕೆ ಶತಮಾನ ಸನಿಹ

ಹಾಸನ: ಅಖಿಲ ಭಾರತ 81ನೇ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಜಿಲ್ಲೆ ಸಿದ್ಧವಾಗಿದೆ. ಕನ್ನಡ ಸಾಹಿತ್ಯ ಪರಿಷತ್ತಿನ ಶತಮಾನೋತ್ಸವ ಸಂದರ್ಭದಲ್ಲಿ ಹಾಸನದಲ್ಲಿ ಸಮ್ಮೇಳನ ನಡೆಯುತ್ತಿರುವುದರಿಂದ ಈ ಬಾರಿಯ ಸಮ್ಮೇಳನಕ್ಕೆ ವಿಶೇಷ ಮಹತ್ವವೂ ಬಂದಿದೆ.

ಇದರ ಜತೆಗೆ ಮತ್ತೊಂದು ಗಮನಾರ್ಹ ಅಂಶವೂ ಇದೆ. ಹಾಸನ ಜಿಲ್ಲೆಯಲ್ಲಿ ನಡೆದ ಮೊದಲ ಸಾಹಿತ್ಯ ಸಮ್ಮೇಳನಕ್ಕೆ ಇನ್ನು 4 ವರ್ಷದಲ್ಲಿ ಶತಮಾನ ತುಂಬಲಿದೆ.

1919ರ ಮೇ 6, 7 ಹಾಗೂ 8ರಂದು ಹಾಸನದಲ್ಲಿ (ಅಖಿಲ ಭಾರತ) 5ನೇ ಸಾಹಿತ್ಯ ಸಮ್ಮೇಳನ ನಡೆದಿತ್ತು. ಕರ್ಪೂರ ಶ್ರೀನಿವಾಸ ರಾವ್‌ ಸಮ್ಮೇಳನದ ಅಧ್ಯಕ್ಷತೆವಹಿಸಿದ್ದರು.

ಶತಮಾನದಷ್ಟು ಹಿಂದೆ ಜಿಲ್ಲೆಯಲ್ಲಿ ನಡೆದ ಸಮ್ಮೇಳನದಲ್ಲಿ ಪಾಲ್ಗೊಂಡವರು ಯಾರೂ ಈಗ ಇರಲಾರರು. ಹೀಗಾಗಿ, ಅಂದಿನ ಸಮ್ಮೇಳನದ ಸ್ವರೂಪ ಹೇಗಿತ್ತು? ಎಂಬುದು ಊಹಿಸುವುದು ಕಷ್ಟ. ಆದರೆ, ಅಧ್ಯಕ್ಷರ ಭಾಷಣದ ದಾಖಲೆಗಳಿರುವುದರಿಂದ ಸಮ್ಮೇಳನದ ಒಟ್ಟಾರೆ ಉದ್ದೇಶ ಏನಿರಬಹುದು? ಎಂಬುದರ ಕಲ್ಪನೆ ಸಿಗುತ್ತದೆ.

ಹಿರಿಯ ಸಾಹಿತಿಗಳೇ ಹೇಳುವಂತೆ ಸಾಹಿತ್ಯ ಸಮ್ಮೇಳನಕ್ಕೆ ಉತ್ಸವ, ಜಾತ್ರೆ ರೂಪ ಬಂದಿದ್ದು ಇತ್ತೀಚಿನ ದಿನಗಳಲ್ಲಿ. ಕೆಲವು ವರ್ಷಗಳಿಂದ ಸಮ್ಮೇಳನ ಬರಿ ಭಾಷೆಗೆ ಸೀಮಿತವಾಗಿ ಉಳಿಯದೆ ನೆಲ, ಜಲದ ಒಟ್ಟಾರೆ ಸಮಸ್ಯೆಗಳಿಗೆ ಸ್ಪಂದಿಸುತ್ತಿದೆ. ಗೋಷ್ಠಿಗಳಲ್ಲಿ ಈ ವಿಚಾರಗಳ ಬಗ್ಗೆ ಚರ್ಚೆಯೂ ಆಗುತ್ತಿದೆ.

ಹಾಸನ ಜಿಲ್ಲೆಯಲ್ಲಿ ನಡೆದ ಮೊದಲ ಸಮ್ಮೇಳನ ಬಹುತೇಕ ಸಾಹಿತ್ಯ ಚರ್ಚೆಗೆ ಮೀಸಲಾಗಿತ್ತು. ‘ಕರ್ನಾಟಕದ ಈಗಿನ ಸ್ಥಿತಿಯು ಸಕಲ ವಿಧಗಳಲ್ಲಿಯೂ ಮೇಲಾಗಬೇಕು. ಹೀಗಾಗಲು ಬಗೆಬಗೆಯ ಪ್ರಯತ್ನ ಅಗತ್ಯ. ಆದರೆ, ಅವುಗಳಲ್ಲಿ ಒಂದನ್ನು ಮಾತ್ರವೇ ನಮ್ಮ ಪರಿಷತ್ತು ಕೈಗೊಳ್ಳುವುದಕ್ಕೆ ಸಾಧ್ಯ. ಅದೇನೆಂದರೆ ಭಾಷಾ ಸೇವೆ. ಎಂದರೆ ಕರ್ನಾಟಕ ಸಾಹಿತ್ಯ ಸಂಪತ್ತು ಹೆಚ್ಚಿಸುವುದು...’ ಎಂದು ಹಾಸನದಲ್ಲಿ ನಡೆದ 5ನೇ ಸಾಹಿತ್ಯ ಸಮ್ಮೇಳನದಲ್ಲಿ ಅಧ್ಯಕ್ಷ ಶ್ರೀನಿವಾಸ ರಾವ್‌ ಭಾಷಣ ಮಾಡಿದ್ದರು.

ಅಂದು ಸಾಹಿತ್ಯ ಸಂಪತ್ತು ಹೆಚ್ಚಿಸುವುದೇ ಸಮ್ಮೇಳನ ಮುಖ್ಯ ಉದ್ದೇಶವಾಗಿತ್ತು. ಇಂದು ಸಮ್ಮೇಳನದ ಸ್ವರೂಪ ಬದಲಾಗಿದೆ. ಸಾಹಿತ್ಯದ ಜತೆಗೆ ಸಮ್ಮೇಳನ ಇನ್ನು ಹಲವು ಕೆಲಸ ಮಾಡುತ್ತಿದೆ. ಸಾಹಿತ್ಯ, ಸಂಸ್ಕೃತಿ, ಕಲೆ, ಚಳವಳಿ, ಸಿನಿಮಾ... ಹೀಗೆ ಹಲವು ಕ್ಷೇತ್ರಗಳಲ್ಲಿ ಸಮ್ಮೇಳನ ಹೆಜ್ಜೆ ಇಟ್ಟಿದೆ.

ಮೊದಲ ಸಮ್ಮೇಳನದ ಅಧ್ಯಕ್ಷರು
ಕರ್ಪೂರ ಶ್ರೀನಿವಾಸ ರಾವ್‌ ವೃತ್ತಿಯಿಂದ ಎಂಜಿನಿಯರ್‌ ಆಗಿದ್ದರೂ ಪ್ರವೃತ್ತಿಯಿಂದ ಸಾಹಿತ್ಯಾಭಿಮಾನಿ, ಸಾಹಿತಿ. ಇವರ ಪೂರ್ವಿಕರು ತಿರುಪತಿ ತಿಮ್ಮಪ್ಪನ ದರ್ಶನಕ್ಕೆ ಹೋದಾಗ ಬೆಟ್ಟದ ಅಡಿಯಿಂದ ಮುಡಿಯವರೆಗೆ ಉಂಡೆ ಕರ್ಪೂರ ಉರಿಸಿದ್ದ ಕಾರಣಕ್ಕೆ ಇವರ ವಂಶಕ್ಕೆ ‘ಕರ್ಪೂರ’ ಎಂಬ ಬಿರುದು ಅಂಟಿಕೊಂಡಿತ್ತು.