ವಾಹನ ನಿಲುಗಡೆಗೆ ನೆಲ ಅಂತಸ್ತು ಸೂಕ್ತವೇ?

ಇತ್ತೀಚಿನ ವರ್ಷಗಳಲ್ಲಿ ನಗರ, ಪಟ್ಟಣಗಳಲ್ಲಿ ಕಾರು ಮತ್ತು ದ್ವಿಚಕ್ರ ವಾಹನಗಳ ಸಂಖ್ಯೆ ಹೆಚ್ಚುತ್ತಲೇ ಇದೆ. ದೊಡ್ಡ ನಗರಗಳಲ್ಲಿಯಂತೂ ಕೆಲವೊಂದು ಮನೆಗಳಲ್ಲಿ ಎರಡು ಮೂರು ಕಾರು, ಅಷ್ಟೇ ಸಂಖ್ಯೆಯ ದ್ವಿಚಕ್ರ ವಾಹನಗಳೂ ಇರುವುದೂ ಇದೆ. ವಾಹನಗಳನ್ನು ಖರೀದಿಸಲು ಹಣವನ್ನೇನೋ ಧಾರಾಳವಾಗಿ ವೆಚ್ಚ ಮಾಡುವ ಜನರು, ಆ ವಾಹನಗಳನ್ನು ಮನೆಯಲ್ಲಿ ಒಂದೆಡೆ ಸುರಕ್ಷಿತವಾಗಿ ನಿಲ್ಲಿಸಲು ಸ್ಥಳಾವಕಾಶ ಮಾಡಿಕೊಡುವಲ್ಲಿ ಮಾತ್ರ ಸೋಲುತ್ತಾರೆ.

ಅಪ್ಪ, ಅಮ್ಮನಿಗಾಗಿ ಮಾಸ್ಟರ್‌ ಬೆಡ್‌ರೂಮು, ಇಬ್ಬರು ಮಕ್ಕಳಿದ್ದರೆ ಅವರಿಗೆ ಪ್ರತ್ಯೇಕವಾಗಿ ಎರಡು ಕೊಠಡಿ,  ಅಜ್ಜ, ಅಜ್ಜಿ ಇದ್ದರೆ ಅವರಿಗೂ ಒಂದು ಕೋಣೆ. ಇನ್ನು ಅತಿಥಿಗಳು ಬಂದರೆ ಅವರನ್ನು ಎಲ್ಲಿ ಉಳಿಸುವುದು. ಮಾಸ್ಟರ್‌ ಬೆಡ್‌ರೂಮ್‌ ಬಿಟ್ಟುಕೊಡಲು ಸಾಧ್ಯವಿಲ್ಲ. ಅದೇನಿದ್ದರೂ ಮನೆಯ ಯಜಮಾನ ಎನಿಸಿಕೊಂಡವರ ಖಾಸಗಿ ಆವಾಸ.

ಹೊಸ ತಲೆಮಾರಿನ ಪ್ರಶ್ನೆ
ಇನ್ನು ಹೊಸ ಪೀಳಿಗೆಯ ಮಕ್ಕಳಂತೂ ತಮ್ಮ ಕೊಠಡಿಗಳನ್ನು ಬಿಟ್ಟುಕೊಡಲು ಇಚ್ಛಿಸುವುದೇ ಇಲ್ಲ. ಬಲವಂತ ಮಾಡಿದರೆ ಮುನಿದುಕೊಳ್ಳುತ್ತಾರೆ. ಹಾಗೆಂದು ಅಪರೂಪದ ಅತಿಥಿಗಳನ್ನು ಹಜಾರದಲ್ಲಿ ಮಲಗಿಸಲಾದೀತೆ? ಹಾಗಾಗಿ ಮನೆ ಕಟ್ಟುವಾಗಲೇ ಗೆಸ್ಟ್‌ ರೂಂ ಒಂದು ನಿರ್ಮಾಣಗೊಳ್ಳಬೇಕು.

ಹೀಗೆ, ಮಧ್ಯಮ ಆದಾಯ ವರ್ಗದ ಕುಟುಂಬಗಳು ತಮ್ಮ ಕನಸಿನ ಮನೆಯಲ್ಲಿ ಕನಿಷ್ಠ ಮೂರ್ನಾಲ್ಕು ಕೊಠಡಿಗಳನ್ನಾದರೂ ನಿರ್ಮಿಸಿಕೊಳ್ಳಬೇಕಾದ ಪರಿಸ್ಥಿತಿ ಇದೆ. ಹೀಗಿರುವಾಗ, ಲಕ್ಷಗಟ್ಟಲೆ ಹಣತೆತ್ತು ಖರೀದಿಸಿದ ಇಷ್ಟದ ಕಾರನ್ನು ಎಲ್ಲಿ ನಿಲ್ಲಿಸುವುದು? ಮಗರಾಯ ಹಠ ಹಿಡಿದು ತೆಗೆಸಿಕೊಂಡ ಮೋಟಾರ್‌ಬೈಕನ್ನು ಜೋಪಾನವಾಗಿ ನಿಲ್ಲಿಸಲು ಪ್ರತ್ಯೇಕ ಜಾಗ ಕೇಳುತ್ತಾನೆ. ಮಗಳ ಸ್ಕೂಟರ್‌ಗೂ ಸುರಕ್ಷಿತ ಜಾಗ ಬೇಕು.

ಚಿಕ್ಕ ನಿವೇಶನದ ಕಷ್ಟ
ಚಿಕ್ಕ ಅಳತೆಯ ನಿವೇಶನಗಳಲ್ಲಿ ಮನೆ ಕಟ್ಟಿಕೊಳ್ಳಲು ಮುಂದಾಗುವವರ ಕಷ್ಟಗಳು ಒಂದೆರಡಲ್ಲ. ಕುಟುಂಬದ ಸದಸ್ಯರ ಪ್ರೈವೆಸಿಗೂ ಆದ್ಯತೆ ನೀಡಬೇಕು. ಅವರ ವಾಹನಗಳಿಗೂ ಜಾಗ ಮಾಡಿಕೊಡಬೇಕು... ಮನೆ ನಿರ್ಮಾಣಕ್ಕಾಗಿ ನೀಲನಕ್ಷೆ ಸಿದ್ದಪಡಿಸುವಾಗಲೇ ಎಂಜಿನಿಯರ್‌ ಅಥವಾ ಆರ್ಕಿಟೆಕ್ಟ್‌ ಅವರು, ಕಾರು, ದ್ವಿಚಕ್ರ ವಾಹನ ನಿಲ್ಲಿಸಲು ಎಲ್ಲಿ ಜಾಗ ಬಿಡಬೇಕು ಹೇಳಿ? ಎಂಬ ಪ್ರಶ್ನೆಯನ್ನೂ  ಹಾಕುತ್ತಾರೆ.

30/40 ಅಡಿಗಳ ಉದ್ದಗಲದ ನಿವೇಶನದಲ್ಲಿ ಎಂಟರಿಂದ ಒಂಬತ್ತು ಚದರ ವಿಸ್ತಾರದ ಮನೆಯನ್ನು ಕಟ್ಟುವಾಗ ಒಂದು ಅಂತಸ್ತಿನಲ್ಲಿ ಹೆಚ್ಚೆಂದರೆ 10/12 ಅಡಿ ಉದ್ದಗಲದ ಎರಡು ಕೊಠಡಿ, 12/14 ಅಡಿ ವಿಸ್ತಾರದ ಹಜಾರ, 7/9 ಅಡಿಗಳ ಅಳತೆಯ ಅಡುಗೆ ಕೋಣೆ, ಮಗ್ಗಲಲ್ಲೇ ಡೈನಿಂಗ್‌, 4/8 ಅಡಿ ಉದ್ದ ಅಗಲದ ಬಾತ್‌ರೂಂ, ಅಷ್ಟೇ ಅಲ್ಲ, ದೇವರ ಪೂಜೆಗೊಂದು ಪುಟ್ಟದಾಗಿಯಾದರೂ (3/4 ಅಡಿ) ಜಾಗ ಬಿಡಬೇಕು. ಇನ್ನೂ ಎರಡು ಅಥವಾ ಮೂರು ಕೊಠಡಿ ಬೇಕೆಂದರೆ ಡ್ಯುಪ್ಲೆಕ್ಸ್‌ (ಮೇಲೊಂದು ಮಹಡಿ+ ಹಜಾರದಿಂದಲೇ ಅದಕ್ಕೆ ಮೆಟ್ಟಿಲು ಇರುವಂತೆ) ಮನೆ ಕಟ್ಟಿಸಿಕೊಳ್ಳಬೇಕು.

ವಾಹನ ನಿಲುಗಡೆ ಪ್ರಶ್ನೆ
ಕೊಠಡಿಗಳ ಸಮಸ್ಯೆಯೇನೋ ಬಗೆಹರಿಯಿತು. ಇನ್ನು, ಕುಟುಂಬದ ಸದಸ್ಯರೆಲ್ಲರೂ ಓಡಾಡಿಸುವ ಕಾರು, ಸ್ಕೂಟರ್‌, ಮೋಟಾರ್‌ಬೈಕ್‌ಗಳನ್ನು ನಿಲ್ಲಿಸಲು ಎಲ್ಲಿ ಜಾಗ ಹುಡುಕುವುದು? ಪುಟ್ಟ ಪೋರ್ಟಿಕೋದಲ್ಲಿ ಕಾರಿಗೆ ಜಾಗ ಸಾಲದು. ಹೆಚ್ಚೆಂದರೆ ಎರಡು ದ್ವಿಚಕ್ರ ವಾಹನ ನಿಲ್ಲಿಸಬಹುದು. ಆದರೆ, ಐದಾರು ಲಕ್ಷ ರೂಪಾಯಿ ಕೊಟ್ಟು ತಂದ ಕಾರನ್ನು ಮನೆಯಾಚೆ, ಕಾಂಪೌಂಡ್‌ ಮಗ್ಗಲಲ್ಲಿ ನಿಲ್ಲಿಸಲಾದೀತೆ?

ಹೊಟ್ಟೆಕಿಚ್ಚಿನ ಜನ ಗೀರು ಮಾಡುತ್ತಾರೆ, ಕಿಡಿಕೇಡಿಗಳು ಕಲ್ಲೆಸೆದರೆ ಗಾಜು ಪುಡಿಯಾಗುತ್ತದೆ.  ಥೂ... ಬೀದಿನಾಯಿಗಳೋ ಚಕ್ರವನ್ನೇ ಗುರಿಯಿಟ್ಟು ಮೂತ್ರ ವಿಸರ್ಜಿಸುತ್ತವೆ, ದನಗಳು ಸೆಗಣಿ ಹಾಕಿದರೆ ಕಾರಿಗೆಲ್ಲಾ ಹಾರಿರುತ್ತದೆ. ಮಳೆಗಾಲದಲ್ಲಿ ನಿತ್ಯ ತೊಯ್ಯುತ್ತದೆ. ಬೇಸಿಗೆ ಕಾಲದಲ್ಲಿ ಬಣ್ಣ ಮಾಸುತ್ತದೆ... ಸಮಸ್ಯೆ ಒಂದೆರಡಲ್ಲ.

ವಾಹನ ಸುರಕ್ಷತೆ?
ಅಂದರೆ, ವರ್ಷಗಳ ಸ್ವಂತ ವಾಹನದ ಕನಸ ಕಂಡು, ಲಕ್ಷಾಂತರ ಹಣ ತೆತ್ತು ತಂದ ಕಾರನ್ನು ಜತನ ಮಾಡಲು ನಿಮ್ಮದೇ ಮನೆಯಂಗಳದಲ್ಲಿ ಜಾಗವೇ ಇಲ್ಲವೇ? ಛೇ... ‘ಚಿಂತೆಯೇಕೆ ಮಾಡುವಿಯೋ ಮನುಜು... ನೆಲದಡಿ ಬಗ್ಗಿ ನೋಡೋ’... ಎನ್ನುತ್ತಾರೆ ವಾಸ್ತುಶಿಲ್ಪಿ.

ಬೇಸ್‌ಮೆಂಟ್ ಅವಕಾಶ
ಹೌದು, ಸೆಲ್ಲಾರ್‌ ಅಥವಾ ಬೇಸ್‌ಮೆಂಟ್‌ ಎಂಬುದೊಂದು ಅವಕಾಶ ಇದೆಯಲ್ಲಾ. ಅಲ್ಲಿ ನಿಮ್ಮ ಕುಟುಂಬದವರ ಎಲ್ಲಾ ವಾಹನಗಳಿಗೂ ಜಾಗ ಮಾಡಿಕೊಡಬಹುದಲ್ಲಾ... 40/60 ಉದ್ದಗಲದ ನಿವೇಶನಗಳಲ್ಲಿ ಸೆಲ್ಲಾರ್‌ ಅಥವಾ ಬೇಸ್‌ಮೆಂಟ್‌ ನಿರ್ಮಿಸಿಕೊಂಡು ಕಾರು ಮತ್ತಿತರ ವಾಹನಗಳನ್ನು ನಿಲ್ಲಿಸಿಕೊಳ್ಳಲು ಸ್ಥಳಾವಕಾಶ ಮಾಡಿಕೊಳ್ಳಬಹುದು.

ಆದರೆ, 30/40 ಅಗಲ, ಉದ್ದದ ನಿವೇಶನಗಳಲ್ಲಿ ಸೆಲ್ಲಾರ್ ನಿರ್ಮಿಸಿಕೊಳ್ಳಲು ಕೆಲವು ನಗರಗಳಲ್ಲಿನ ನಗರಾಭಿವೃದ್ಧಿ ಪ್ರಾಧಿಕಾರ, ನಗರ ಪಾಲಿಕೆಯಿಂದ ಅನುಮತಿ ದೊರೆಯದೇ ಇರಬಹುದು. ಈ ಬಗ್ಗೆ ಮೊದಲೇ ಈ ಸ್ಥಳೀಯ ಸಂಸ್ಥೆಗಳಲ್ಲಿ ವಿಚಾರಿಸಿಕೊಂಡು ಒಟ್ಟು ಕಟ್ಟಡದ ನೀಲನಕ್ಷೆಯನ್ನು ಬರೆಸಿಕೊಳ್ಳುವುದು ಉತ್ತಮ. ಮನೆ ಕಟ್ಟಲು ಹೊರಟಿದ್ದೀರಾ? ಸದ್ಯ ನಿಮ್ಮಲ್ಲಿ ಯಾವುದೇ ವಾಹನ ಇಲ್ಲವೇ? ಅದೇನೇ ಇದ್ದರೂ ಮುಂದೆ ಮನೆಗೆ ಬರಲಿರುವ ವಾಹನಕ್ಕೂ ಒಂದಿಷ್ಟು ಜಾಗ ಮೀಸಲಿಡಿ. ಸೆಲ್ಲಾರ್‌ ಅಥವಾ ಬೇಸ್‌ಮೆಂಟ್‌ ಪಾರ್ಕಿಂಗ್‌ ಬಗೆಗೂ ಆಲೋಚಿಸಿ.

ಮೈಸೂರಿನ ಒಂದು ಮನೆಯವರದ್ದು ಬೇರೆಯದೇ ಸಮಸ್ಯೆ. 30/40 ಅಡಿ ಉದ್ದ ಅಗಲದ ನಿವೇಶನದಲ್ಲಿ ಅವರು ಡ್ಯುಪ್ಲೆಕ್ಸ್‌ ಮನೆ ನಿರ್ಮಿಸಿದ್ದಾರೆ. ಮೂರು ವಿಶಾಲ ಕೊಠಡಿಗಳು, ಪ್ರತಿಯೊಂದಕ್ಕೂ ಅಟ್ಯಾಚ್ಡ್ ಬಾತ್‌ರೂಂ, ಎರಡು ಲಿವಿಂಗ್‌ ರೂಂ, ಬಹಳ ದೊಡ್ಡದೇ ಇದೆ ಎನಿಸುವಂತಹ ಅಡುಗೆ ಕೋಣೆ, ಎಲ್ಲವೂ ಅವರು ಅಂದುಕೊಂಡಂತೆಯೇ ಅಚ್ಚುಕಟ್ಟಾಗಿಯೇ ನಿರ್ಮಾಣಗೊಂಡಿವೆ. ಆದರೆ, ಕಾರು ನಿಲ್ಲಿಸಲು (ಸದ್ಯ ಅವರ ಬಳಿ ಕಾರಿಲ್ಲ. ಮುಂದೆ ತೆಗೆದುಕೊಂಡರೆ ಜಾಗ ಬೇಕಲ್ಲ ಎಂಬ ಮುಂದಾಲೋಚನೆಯಿಂದ) ಸೆಲ್ಲಾರ್‌ ನಿರ್ಮಿಸಿಕೊಂಡಿದ್ದಾರೆ.