ವಾಷಿಂಗ್ಟನ್ (ಎಎಫ್ಪಿ): ಸಾಧನೆ ಮತ್ತು ಸಾಹಸಕ್ಕೆ ವಯಸ್ಸು ಸೇರಿ ಯಾವುದೂ ಅಡ್ಡಿಯಾಗದು ಎಂಬುದನ್ನು ಅಂತರ್ಜಾಲದ ಬೃಹತ್ ಸಂಸ್ಥೆ ‘ಗೂಗಲ್’ನ ಹಿರಿಯ ಉಪಾಧ್ಯಕ್ಷ ಅಲನ್ ಯೂಸ್ಟೇಸ್ (57) ಸಾಬೀತು ಮಾಡಿದ್ದಾರೆ. ಅವರು 1.35 ಲಕ್ಷ ಅಡಿ ಎತ್ತರದಿಂದ (ಭೂಮಿಯಿಂದ ಸುಮಾರು 40 ಕಿ.ಮೀ. ಮೇಲಿಂದ) ಜಿಗಿಯುವ ಮೂಲಕ ‘ಸ್ಕೈಡೈವಿಂಗ್’ನಲ್ಲಿ ವಿಶ್ವ ದಾಖಲೆ ಬರೆದಿದ್ದಾರೆ.
‘ಪ್ಯಾರಗಾನ್ ಸ್ಪೇಸ್ ಡೆವಲಪ್ಮೆಂಟ್ ಕಾರ್ಪೊರೇಷನ್’ ಈ ಸಾಹಸವನ್ನು ಆಯೋಜಿಸಿತ್ತು. ಭೂಮಿಯಿಂದ ಒಂದು ಲಕ್ಷ ಅಡಿಗಿಂತ ಮೇಲಿನ ವಾಯುಗೋಳವನ್ನು ಅರಿಯುವ ಮಾನವ ಸಹಿತ ಯೋಜನೆ ಅಂಗವಾಗಿ ಅಲನ್ ಈ ಸಾಹಸ ಕೈಗೊಂಡಿದ್ದರು. ಅಲನ್ 4 ಗಂಟೆಯಲ್ಲಿ ಈ ಸಾಹಸಯಾನವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ.
ವಿಶೇಷವಾಗಿ ನಿರ್ಮಿಸಿದ ಬಾಹ್ಯಾಕಾಶ ದಿರಿಸು (ಸ್ಪೇಸ್ ಸೂಟ್) ಧರಿಸಿದ್ದ ಅವರು ಹೀಲಿಯಂ ಬಲೂನಿನಲ್ಲಿ ಕುಳಿತು ನ್ಯೂ ಮೆಕ್ಸಿಕೊದ ರೋಸ್ವೆಲ್ನಿಂದ ನಭಕ್ಕೆ ಹಾರಿದ್ದರು. ನಿಮಿಷಕ್ಕೆ ಸಾವಿರ ಅಡಿಗಿಂತಲೂ ಹೆಚ್ಚಿನ ವೇಗದಲ್ಲಿ ಎತ್ತರಕ್ಕೆ ಚಲಿಸಿದ ಬಲೂನು 1.35 ಲಕ್ಷ ಅಡಿ ಎತ್ತರ ತಲುಪಲು ಎರಡು ಗಂಟೆ 30 ನಿಮಿಷ ತೆಗೆದುಕೊಂಡಿತ್ತು. ಆ ಎತ್ತರದಲ್ಲಿ ಅರ್ಧ ಗಂಟೆ ಕಳೆದ ಅಲನ್, ವಾಯುಗೋಳದಿಂದ ಕಾಣುವ ಅದ್ಭುತ ದೃಶ್ಯವನ್ನು ಕಣ್ತುಂಬಿಕೊಂಡರು ಎಂದು ಪ್ಯಾರಗಾನ್ ತಿಳಿಸಿದೆ.
ನಂತರ ಅವರು ಬಲೂನಿನಿಂದ ತಮ್ಮನ್ನು ಬಿಡಿಸಿಕೊಂಡು ಹೊರಗೆ ಜಿಗಿದರು. ‘ಸೂಪರ್ ಸಾನಿಕ್’ ವೇಗದಲ್ಲಿ (ಗಂಟೆಗೆ ಸುಮಾರು 1200 ಕಿ.ಮಿ) ಅವರನ್ನು ವಾಯುಮಂಡಲದಿಂದ ಭುವಿಯತ್ತ ತಳ್ಳಲು ಸ್ಪೇಸ್ ಸೂಟ್ನಲ್ಲಿ ಸಣ್ಣಪ್ರಮಾಣದ ಸ್ಫೋಟಕ ಸಾಧನ ಅಳವಡಿಸಲಾಗಿತ್ತು. ಮುಂದಿನ 5 ನಿಮಿಷದಲ್ಲಿ ಸುಮಾರು 18 ಸಾವಿರ ಅಡಿಯವರೆಗೆ ಇಳಿದರು. ನಂತರ ಪ್ಯಾರಾಷೂಟ್ ಬಿಡಿಸಿ, ಸುರಕ್ಷಿತವಾಗಿ ನೆಲಮುಟ್ಟಿದರು ಎಂದು ಪ್ಯಾರಗಾನ್ ತಿಳಿಸಿದೆ. ‘ಆ ಅನುಭವ ಅದ್ಭುತವಾಗಿತ್ತು. ಅಲ್ಲಿ ನೀವು ಬಾಹ್ಯಾಕಾಶದ ಕತ್ತಲೆಯನ್ನು ನೋಡಬಹುದು, ವಾಯುಗೋಳದ ಪದರಗಳನ್ನು ಅನುಭವಿಸಬಹುದು’ ಎಂದು ಅಲನ್ ಹರ್ಷ ವ್ಯಕ್ತಪಡಿಸಿದ್ದಾರೆ.
ಹಿಂದಿನ ದಾಖಲೆ
ಇದಕ್ಕೂ ಮೊದಲು ಅತಿ ಎತ್ತರದಿಂದ ಜಿಗಿದ ದಾಖಲೆ ಆಸ್ಟ್ರಿಯಾದ ಸ್ಕೈಡೈವರ್ ಫೆಲಿಕ್ಸ್ ಬೌಮ್ಗಾರ್ನರ್ ಹೆಸರಿನಲ್ಲಿತ್ತು. ಅವರು 2012ರಲ್ಲಿ 1.28 ಲಕ್ಷ ಅಡಿ ಎತ್ತರದಿಂದ ಜಿಗಿದು ಅವರು ದಾಖಲೆ ನಿರ್ಮಿಸಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.