ಚಿಕ್ಕಬಳ್ಳಾಪುರ: ಇದು ಜಿಲ್ಲೆಯ ಐತಿಹಾಸಿಕ ಸ್ಥಳಗಳ ಬಗ್ಗೆ ಹಿಂದಿನಿಂದಲೂ ಕೇಳಿಬರುತ್ತಿರುವ ಆಕ್ಷೇಪಣೆ. ಸ್ಥಳೀಯರಿಗೆ ಕಣ್ಣೆದುರೇ ಹಾಳಾಗುತ್ತಿರುವ ಪರಂಪರೆಯ ಭಾಗದಂತಿರುವ ಕೋಟೆ ಕೊತ್ತಲಗಳ ಬಗ್ಗೆ ಹೃದಯ ಹಿಂಡುವಂಥ ಅಂತಕರಣ ಒಂದೆಡೆ ಇದ್ದರೆ, ಯಾರೂ ಈ ಬಗ್ಗೆ ಗಮನ ಹರಿಸುತ್ತಿಲ್ಲ ಎಂಬ ಬೇಸರ ಮತ್ತೊಂದೆಡೆ.
ನೂರಾರು ವರ್ಷಗಳ ಹಿಂದೆ ಆಳ್ವಿಕೆ ನಡೆಸಿದ ಪಾಳೇಗಾರರಿಗೂ ಮತ್ತು ಚಿಕ್ಕಬಳ್ಳಾಪುರಕ್ಕೂ ಗಾಢ ನಂಟು ಇದ್ದು, ಈಗಲೂ ಅದರ ಪಳೆಯಳಿಕೆಗಳು ಬೆಟ್ಟಗುಡ್ಡ ಮತ್ತು ಕುಗ್ರಾಮದಂತಹ ಪ್ರದೇಶಗಳಲ್ಲಿ ಕಾಣಸಿಗುತ್ತವೆ.
ಜಿಲ್ಲೆಯ ಬಾಗೇಪಲ್ಲಿಯಲ್ಲಿರುವ ಗುಮ್ಮನಾಯಕನಪಾಳ್ಯ ಕೋಟೆ ಇದಕ್ಕೆ ಒಂದು ಉದಾಹರಣೆಯಾದರೆ, ಚಿಕ್ಕಬಳ್ಳಾಪುರದ ಮೂಲೆಯಲ್ಲಿರುವ ಸ್ಕಂದಗಿರಿ ಬೆಟ್ಟದ ಮೇಲಿನ ಕೋಟೆ ಗೋಡೆಗಳು, ದೇಗುಲ, ನಂದಿ ಮೂರ್ತಿ ಮತ್ತೊಂದು ಸಾಕ್ಷಿ.
ನಂದಿ ಬೆಟ್ಟಕ್ಕೆ ಸಮ ಎತ್ತರದಲ್ಲಿರುವ ಸ್ಕಂದಗಿರಿ ಬೆಟ್ಟವನ್ನು ಹತ್ತಿದರೆ, ತುದಿಯಲ್ಲಿ ಎರಡು ಪುರಾತನ ದೇಗುಲ ಕಾಣಸಿಗುತ್ತದೆ. ಅಷ್ಟೇ ಅಲ್ಲ, ಬೆಟ್ಟದ ತುದಿ ತಲುಪುವವರೆಗೆ ಮಾರ್ಗದುದ್ದಕ್ಕೂ ಎರಡು–ಮೂರು ಹಂತದ ಕಲ್ಲಿನ ಕೋಟೆಯಂತಹ ಗೋಡೆಗಳು ಗೋಚರಿಸುತ್ತವೆ. ಗೋಡೆ ಕೆಲ ಭಾಗ ಈಗಲೂ ಗಟ್ಟಿಮುಟ್ಟಾಗಿದ್ದರೆ, ಇನ್ನೂ ಕೆಲ ಭಾಗಗಳು ಅವಶೇಷಗಳಾಗಿ ಚದುರಿ ಹೋಗಿವೆ. ಅಲ್ಲಲ್ಲಿ ಕಲ್ಲಿನ ಪ್ರವೇಶದ್ವಾರ ಯಥಾಸ್ಥಿತಿಯಲ್ಲಿರುವುದು ಅಚ್ಚರಿ ಮೂಡಿಸುತ್ತದೆ.
‘ಭಾರತೀಯ ಪ್ರಾಚ್ಯವಸ್ತು ಸಂಗ್ರಹಾಲಯ ಬಹುತೇಕ ಕಡೆ ಬೆಟ್ಟದ ಕೆಳಗಿನ ಭಾಗದ ಸ್ಮಾರಕಗಳನ್ನು ಮತ್ತು ಪುರಾತನ ಕೋಟೆಗಳನ್ನು ತನ್ನ ವ್ಯಾಪ್ತಿಗೆ ತೆಗೆದುಕೊಂಡಿದೆ. ಆದರೆ ಸ್ಕಂದಗಿರಿಯಂತಹ ಬೆಟ್ಟದ ತುದಿಯಲ್ಲಿರುವ ಪುರಾತನ ಸ್ಮಾರಕಗಳ ಬಗ್ಗೆ ಹೆಚ್ಚು ಗಮನಹರಿಸಲ್ಲ. ಈಗಲೂ ಅಲ್ಲಿನ ಕಟ್ಟಡಗಳಲ್ಲಿ ಹಳೆಯ ಲಿಪಿಗಳು ಕಾಣಿಸುತ್ತವೆ. ಆಗಿನ ದೇವತಾಮೂರ್ತಿ ನೋಡಬಹುದು’ ಎಂದು ನಗರದ ನಿವಾಸಿ ಶ್ರೀನಿವಾಸ್ರಾವ್ ‘ಪ್ರಜಾವಾಣಿ’ಗೆ ತಿಳಿಸಿದರು.
ಸ್ಕಂದಗಿರಿ ಕೋಟೆ ಯುದ್ಧದ ಸಂದರ್ಭದಲ್ಲಿ ನಾಶವಾಗಿರಬಹುದು. ಇಲ್ಲವೇ ಪಾಳೇಗಾರರ ಪದ್ಧತಿ ಸಂಪೂರ್ಣ ಕೊನೆಗೊಂಡ ನಂತರ ಕೆಲ ಕಿಡಿಗೇಡಿಗಳು ಇಡೀ ಪುರಾತನ ಪರಿಸರಕ್ಕೆ ಹಾನಿ ಮಾಡಿರಬಹುದು. ಹೀಗೆ ಹೇಳಲು ಹಲ ಕಾರಣಗಳಿವೆ. ದೇಗುಲ ಒಳ ಆವರಣದಲ್ಲಿ ಇರಬೇಕಾದ ನಂದಿ ಮೂರ್ತಿ ಹೊರಾವರಣದಲ್ಲಿ ಇದ್ದರೆ, ಕೋಟೆಗೆ ಸಂಬಂಧಿಸಿದ ಕಲ್ಲು ಮತ್ತು ಕಂಬಗಳು ಅಲ್ಲಲ್ಲಿ ಚದುರಿ ಹೋಗಿವೆ. ಒಂದಾನೊಂದು ಕಾಲದಲ್ಲಿ ಇಲ್ಲಿ ಕೋಟೆಯಿತ್ತು ಎಂಬುದಕ್ಕೆ ಹೇಳಲು ಕೂಡ ಸಾಧ್ಯವಾಗದಂತಹ ಪರಿಸ್ಥಿತಿಯಿದೆ’ ಎಂದು ಅವರು ತಿಳಿಸಿದರು.
ಬೆಟ್ಟದ ಕೆಳಗೆ ಸುಭದ್ರ ಕೋಟೆ ಅಥವಾ ಸುಂದರವಾದ ದೇಗುಲ ನಿರ್ಮಿಸುವುದು ಸಾಮಾನ್ಯ. ಆದರೆ ಬೆಟ್ಟದ ಮೇಲೆ ಕೋಟೆ ನಿರ್ಮಿಸುವುದು ನಿರ್ಲಕ್ಷಿಸುವಂತಹ ವಿಷಯವಲ್ಲ. ಇತಿಹಾಸ ತಜ್ಞರು, ಪ್ರಾಚ್ಯವಸ್ತು ತಜ್ಞರು ಇತ್ತ ಗಮನಹರಿಸಬೇಕು. ಇತಿಹಾಸದ ಭಾಗವಾದ ಇಂಥ ಸ್ಥಳ ಕಾಪಾಡುವ, ಹೆಚ್ಚು ಮಾಹಿತಿ ಕಲೆಹಾಕುವ ಪ್ರಯತ್ನ ಮಾಡಬೇಕು ಎಂದು ಅವರು ತಿಳಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.