‘ಪ್ರಜಾವಾಣಿ’ಗೆ ಮತ್ತೆ ‘ಐಎನ್‌ಸಿಕ್ಯುಸಿ’ ಮನ್ನಣೆ

ಅಂತರರಾಷ್ಟ್ರೀಯ ಶಿಷ್ಟತೆಗಳನ್ನು ಒಳಗೊಂಡ ಪರೀಕ್ಷಾ ಪ್ರಕ್ರಿಯೆ 3 ತಿಂಗಳಷ್ಟು ದೀರ್ಘವಾದುದು. ಈ ಅವಧಿ­ಯಲ್ಲಿ ಪರೀಕ್ಷೆಗೆ ಅಗತ್ಯವಿರುವ ತಾಂತ್ರಿಕ ವಿವರಗ­ಳೊಂದಿಗೆ ಪತ್ರಿಕೆ­ಯನ್ನು ಮುದ್ರಿಸಬೇಕಾಗುತ್ತದೆ. ಹೀಗೆ ಮುದ್ರಣಗೊಂಡ ಪ್ರತಿ­ಗಳನ್ನು ಮೊದ­ಲಿಗೆ ಸಾಮಾನ್ಯ ಓದುಗನ ದೃಷ್ಟಿಕೋನ­ದಿಂದ ಪರಿಶೀಲಿಸ­ಲಾಗು­ತ್ತದೆ. ಇದರ ಜೊತೆಗೆ ಇನ್ನೂ 28 ತಾಂತ್ರಿಕ ಮಾನದಂಡಗಳಲ್ಲಿ ಸೂಕ್ಷ್ಮ ಪರಿಶೀಲನೆ ನಡೆಸಿದ ನಂತರ ಗುಣ­ಮ­ಟ್ಟದ ಬಗ್ಗೆ ತೀರ್ಪುಗಾರರ ತಂಡ ನಿರ್ಧಾರಕ್ಕೆ ಬರುತ್ತದೆ.

ಅಂತರರಾಷ್ಟ್ರೀಯ ಮಟ್ಟದ ತೀರ್ಪುಗಾರರ ಮಂಡಳಿ­ಯಲ್ಲಿ ‘ಸನ್ ಕೆಮಿಕಲ್ಸ್‌’ನ ಪಾಲ್ ಕ್ಯಾಸಿ, ಐಸ್ಲೆಂಡ್‌ನ ‘ಐಡಿಎನ್ ವೊಕೇಶನಲ್ ಎಜುಕೇಶನ್ ಅಂಡ್ ಟ್ರೈನಿಂಗ್ ಸೆಂಟರ್‌’ನ ಇಂಗಿ ರಾಫ್ನ್ ಒಲಾಫ್ಸನ್, ‘ಜರ್ಮನ್ ಇಂಜಿನಿ­ಯರಿಂಗ್ ಫೆಡರೇಷನ್‌’ನ ಡಾ. ನೋರಾ ಲಾಟ­ರ್ಬಾಷ್, ಜಾಹೀರಾತು ಮತ್ತು ವಿನ್ಯಾಸ ತಜ್ಞ ಡೀಟರ್ ಮೇ ಮತ್ತು ‘ವ್ಯಾನ್–ಇಫ್ರಾ’ ದಕ್ಷಿಣ ಏಷ್ಯಾದ ಮಗ್ದೂಮ್ ಮೊಹಮ್ಮದ್ ಇದ್ದರು.

ಐಎನ್‌ಸಿಕ್ಯುಸಿ ಮನ್ನಣೆಗೆ ಪಾತ್ರವಾ­ಗುವ ಪತ್ರಿಕೆಗಳಲ್ಲಿ ಮುದ್ರಿತವಾಗುವ ವರ್ಣ ಚಿತ್ರಗಳ ಗುಣಮಟ್ಟವು, ಮೂಲಚಿತ್ರಗಳ ವರ್ಣ ಸಂಯೋಜನೆಗೆ ಸಮನಾಗಿರುತ್ತದೆ. ಇದನ್ನು ಸಾಧಿಸುವ ಹಾದಿ ಸುಗಮವಾದುದೇನೂ ಅಲ್ಲ. ಸಾಮಾನ್ಯವಾಗಿ ವರ್ಣಚಿತ್ರಗಳನ್ನು ಮುದ್ರಿಸುವ ಪ್ರಕ್ರಿಯೆಗೂ ಪತ್ರಿಕಾ ಮುದ್ರಣದ ಪ್ರಕ್ರಿಯೆಯ ನಡುವೆಯೂ ಬಹಳ ದೊಡ್ಡ ವ್ಯತ್ಯಾಸಗಳಿವೆ.

ಮುದ್ರಣಕ್ಕೆ ಬಳಸುವ ಶಾಯಿ, ಮುದ್ರಣದ ಯಂತ್ರ, ಮುದ್ರಣ ವಿಧಾನ ಹಾಗೂ ಒಟ್ಟು ಪ್ರಕ್ರಿಯೆಯ ನಿರ್ವಹಣೆ­ಯಲ್ಲಿ ಅಂತರರಾಷ್ಟ್ರೀಯ ಶಿಷ್ಟತಾ ಸಂಸ್ಥೆ ನಿಗದಿ ಪಡಿಸಿರುವ ಎಲ್ಲಾ ನಿಯಮಗಳನ್ನೂ ಚಾಚೂ ತಪ್ಪದೆ ಪಾಲಿಸ­ಬೇಕು. ತಂತ್ರಜ್ಞಾನದ ಆಯ್ಕೆ­ಯಿಂದ ಆರಂಭಿಸಿ ಅದನ್ನು ಕಾರ್ಯರೂಪಕ್ಕೆ ತರುವ ಸಿಬ್ಬಂದಿ­ಯಲ್ಲೂ ನಿರ್ದಿಷ್ಟ ಶಿಷ್ಟತೆಗಳನ್ನು ಪಾಲಿಸುವ ಪರಿಣತಿ ಇರಬೇಕಾಗುತ್ತದೆ.

‘ಪ್ರಜಾವಾಣಿ’ 2010ರಿಂದಲೇ ತನ್ನ ಓದುಗರಿಗೆ ಗುಣ­ಮಟ್ಟ­ದಲ್ಲಿ ರಾಜಿ ಇಲ್ಲದ ಪತ್ರಿಕೆ ನೀಡುವ ಉದ್ದೇಶದಿಂದ ಇಡೀ ಮುದ್ರಣ ಪ್ರಕ್ರಿಯೆಯನ್ನು ಅಂತರರಾಷ್ಟ್ರೀಯ ಶಿಷ್ಟತೆಗೆ ಅನುಗುಣ­ವಾಗಿ ಮಾರ್ಪಡಿಸಿ-­ಕೊಂಡಿದೆ. ಇದನ್ನು ನಿರಂತರ­ವಾಗಿ ಪಾಲಿಸಿಕೊಂಡು ಬಂದಿರುವುದರಿಂದ ‘ಡೆಕ್ಕನ್ ಹೆರಾಲ್ಡ್’ ಸತತ 3ನೇ ಬಾರಿ ಮತ್ತು ‘ಪ್ರಜಾವಾಣಿ’ ಸತತ ಎರಡನೇ ಬಾರಿ ಐಎನ್‌ಸಿಕ್ಯುಸಿ ಮನ್ನಣೆಗೆ ಪಾತ್ರವಾಗಿದೆ.