ಪಣಜಿ (ಪಿಟಿಐ): ಮನೋಹರ್‌ ಪರಿಕ್ಕರ್‌ ಸರ್ಕಾರ ಗೋವಾದಲ್ಲಿ ಪ್ರಮೋದ್‌ ಮುತಾಲಿಕ್ ನೇತೃತ್ವದ ಶ್ರೀರಾಮ ಸೇನೆ ಚಟುವಟಿಕೆಗಳಿಗೆ ನಿಷೇಧ ಹೇರುವ ಸಾಧ್ಯತೆ ಇಲ್ಲ ಎಂದು ಗೋವಾ ಬಿಜೆಪಿ ಹೇಳಿದೆ. ಯಾವುದೇ ವ್ಯಕ್ತಿ ಕಾನೂನು ಚೌಕಟ್ಟಿನಲ್ಲಿ ಎಲ್ಲಿಯಾದರೂ ಚಟುವಟಿಕೆಗಳನ್ನು ನಡೆಸಲು ಸಂವಿಧಾನ ಅವಕಾಶ ನೀಡಿದೆ ಎಂದು ಹೇಳಿದೆ.
‘ಶ್ರೀರಾಮ ಸೇನೆ ಗೋವಾದಲ್ಲಿ ಚಟುವಟಿಕೆ ನಡೆಸುವುದನ್ನು ತಡೆಯುವುದಿಲ್ಲ. ಕಾನೂನು ಬಾಹಿರ ಚಟುವಟಿಕೆ ನಡೆಸದ ಹೊರತು ನಿಷೇಧ ಸಾಧ್ಯವಿಲ್ಲ’ ಎಂದು ಬಿಜೆಪಿ ಗೋವಾ ವಕ್ತಾರ ವಿಲ್ಫ್ರೆಡ್‌ ಮೆಸ್ಕೋಟಾ ಹೇಳಿದ್ದಾರೆ.
ಪಬ್‌, ಡ್ರಗ್‌ ಮತ್ತು ಸೆಕ್ಸ್ ಸಂಸ್ಕೃತಿ ವಿರುದ್ಧ ಹೋರಾಡಲು ಗೋವಾದಲ್ಲಿ ಶ್ರೀರಾಮಸೇನೆ ಸಂಘಟನೆಯನ್ನು ಆರಂಭಿಸಲಾಗುವುದು ಎಂದು ಮುತಾಲಿಕ್ ಘೋಷಿಸಿದ ನಂತರ ಬಿಜೆಪಿ ಈ ಹೇಳಿಕೆ ನೀಡಿದೆ. ಮಂಗಳೂರಿನಲ್ಲಿ ನಡೆದ ಪಬ್‌ ದಾಳಿ ರೀತಿಯಲ್ಲಿ ಚಟುವಟಿಕೆ ನಡೆಸದೆ ಇದು ಶಾಂತಿಯುತವಾಗಿರಲಿದೆ ಎಂದೂ ಮುತಾಲಿಕ್ ಹೇಳಿದ್ದರು.
