ನವದೆಹಲಿ (ಪಿಟಿಐ): ಮುಂದಿನ 48 ಗಂಟೆಗಳಲ್ಲಿ (ಜೂನ್ 5) ಕೇರಳಕ್ಕೆ ಮುಂಗಾರು ಪ್ರವೇಶ ಮಾಡುವ ಸಾಧ್ಯತೆ ಎಂದು ಹವಾಮಾನ ಇಲಾಖೆ ಮಂಗಳವಾರ ತಿಳಿಸಿದೆ.
ಕೇರಳ, ತಮಿಳುನಾಡು ಮತ್ತು ಬಂಗಾಳಕೊಲ್ಲಿಯ ಕೆಲವು ಭಾಗಗಳಿಗೆ ಮುಂದಿನ 48 ತಾಸುಗಳಲ್ಲಿ ನೈಋತ್ಯ ಮುಂಗಾರು ಪ್ರವೇಶಿಸುವ ಎಲ್ಲಾ ಲಕ್ಷಣಗಳೂ ಇವೆ. ಈ ಮಳೆ ಮಾರುತವು ಅರಬ್ಬಿ ಸಮುದ್ರದ ದಕ್ಷಿಣದ ಹಲವು ಭಾಗ ಮತ್ತು ಮಾಲ್ಡೀವ್ಸ್ ಭೂಶಿರಗಳಿಗೆ ಇನ್ನೂ ಬೇಗನೆ ಲಗ್ಗೆ ಇಡುವ ಸಂಭವ ಇದೆ.
ಈಶಾನ್ಯ ರಾಜ್ಯಗಳ ಕೆಲವು ಪ್ರದೇಶಗಳಲ್ಲೂ ಮುಂದಿನ 72 ಗಂಟೆಗಳಲ್ಲಿ ಮುಂಗಾರು ಮಳೆ ಸುರಿಯುವ ಸಾಧ್ಯತೆ ಇದೆ ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.
ಕರ್ನಾಟಕದ ಕರಾವಳಿ, ಕೇರಳ ದಕ್ಷಿಣ, ಒಡಿಶಾ, ಅಸ್ಸಾಂ, ಕೊಂಕಣದ ಭಾಗ, ಗೋವಾಗಳಲ್ಲಿ ಬಲವಾಗಿ ಬೀಸುವ ಸಂಭವ ಇದೆ. ಈ ಬಾರಿ ದೇಶದಲ್ಲಿ ಸಾಧಾರಣಕ್ಕಿಂತ ಕಡಿಮೆ ಪ್ರಮಾಣದಲ್ಲಿ ಮಳೆಯಾಗುವ ಸಾಧ್ಯತೆ ಇದ್ದು, ಶೇಕಡ 95ರಷ್ಟು ಮಳೆ ಆಗಲಿದೆ ಎಂದು ಅಂದಾಜು ಮಾಡಲಾಗಿದೆ.