ಲೋಕಸಭೆ ಗದ್ದಲದ ನಷ್ಟ ಬರೋಬ್ಬರಿ ರೂ 716 ಕೋಟಿ!

ಬೆಂಗಳೂರು: ‘ಒಂದಾನೊಂದು ಕಾಲ­ದಲ್ಲಿ ಏಸೊಂದು ಮುದವಿತ್ತಾ...’ ಎಂದು ನೆನಪಿಸಿ­ಕೊಂಡು, ಈಗ ಹಾಗಿಲ್ಲ­ವಲ್ಲ ಎಂದು ಬೇಸರ ಮಾಡಿ­ಕೊಳ್ಳು­ವುದರಲ್ಲಿ ಅರ್ಥವಿದೆ! ದೇಶದ ಲೋಕ­ಸಭಾ ಕಲಾಪಗಳು ಸಾಗುತ್ತಿರುವ ದಾರಿಯನ್ನು ಗಮನಿಸಿದರೆ, ಈ ಸಾಲು­ಗಳಿಗೆ ಮತ್ತಷ್ಟು ಮಹತ್ವ ಬರುತ್ತದೆ. ಪ್ರಥಮ ಲೋಕ­ಸಭೆ ಹಾಗೂ ಈಗಿನ ಲೋಕಸಭೆ ಕಂಡಿರುವ ಬದಲಾವಣೆ ಅಷ್ಟು ಬೃಹತ್‌ ಆಗಿದೆ. ಈ ಬಾರಿಯ ಲೋಕಸಭೆಯಲ್ಲಿ ನಡೆದ ಗದ್ದಲ­ಗ­ಳಿಂದಾಗಿ ದೇಶಕ್ಕಾದ ನಷ್ಟ ₨ 715.92 ಕೋಟಿ!

ಮೊದಲ ಲೋಕಸಭೆಯಿಂದ ಆರಂ­ಭಿಸಿ 15ನೆಯ ಲೋಕಸಭೆವರೆಗೆ (ಹಾಲಿ ಲೋಕಸಭೆ) ಯಾವ ಸಂದರ್ಭದಲ್ಲಿ ಎಷ್ಟು ಚರ್ಚೆಗಳು ನಡೆ­ದಿವೆ, ಎಷ್ಟು ಬಾರಿ ಸಂಸತ್‌ ಕಲಾಪಗಳು ಗದ್ದಲ–ಗೌಜಿಗೆ ಬಲಿಯಾಗಿವೆ, ಅದರಿಂದ ದೇಶಕ್ಕೆ ಎಷ್ಟು ನಷ್ಟವಾಗಿದೆ ಎಂಬ ಬಗ್ಗೆ ಬೆಂಗ­ಳೂರಿನ ‘ರಿಜೋರ್ಸ್‌ ಸಂಶೋ­ಧನಾ ಪ್ರತಿಷ್ಠಾನ’ (ಆರ್‌ಎಸ್‌ಎಫ್‌) ಅಧ್ಯಯನ ನಡೆಸಿದೆ. ವಿವರಗಳನ್ನು ಮಾಧ್ಯಮಗಳಿಗೆ ಬಿಡುಗಡೆ ಮಾಡಿದೆ.

ಮೊದಲ ಲೋಕಸಭೆ: ದೇಶದ ಮೊದಲ ಲೋಕಸಭೆ 15 ಬಾರಿ ಕಲಾಪ ನಡೆ­ಸಿತ್ತು. ಒಟ್ಟು 3,784 ಗಂಟೆಗಳ ಕಾಲ ವಿವಿಧ ವಿಷಯಗಳ ಕುರಿತು  ಚರ್ಚಿ­ಸಿತ್ತು. ಅದು ಪಂಡಿತ್‌ ಜವಾಹರ­ಲಾಲ್‌ ನೆಹರೂ ಅವರು ಪ್ರಧಾನಿಯಾಗಿದ್ದ ಕಾಲ. ಆದರೆ, ಈ ಬಾರಿಯ ಲೋಕಸಭೆ (ಯುಪಿಎ–2 ಸರ್ಕಾರದ ಅವಧಿ) ಕೇವಲ 1,335.01 ಗಂಟೆಗಳ ಕಾಲ ಕಲಾಪ ನಡೆಸಿದೆ. ಮೊದಲ ಲೋಕ­ಸಭೆಗೆ ಹೋಲಿಸಿದರೆ, ಈ ಬಾರಿಯ ಲೋಕಸಭಾ ಕಲಾಪದ ಅವಧಿ ಶೇಕಡ 65ರಷ್ಟು ಕಡಿಮೆಯಾಗಿದೆ.

‘ಪ್ರಜಾಪ್ರಭುತ್ವದಲ್ಲಿ ಪಾಲ್ಗೊ­ಳ್ಳು­ವಿಕೆಯ ವಿಚಾರ­ದಲ್ಲಿ ಇಂದಿನ ಸಂಸದರು ಉತ್ಸಾಹ ಕಳೆದು­ಕೊಳ್ಳುತ್ತಿದ್ದಾರೆ ಎಂಬುದನ್ನು ಅಂಕಿ–ಅಂಶಗಳು ಹೇಳುತ್ತಿವೆ. ದೇಶಕ್ಕೆ ಸ್ವಾತಂತ್ರ್ಯ ಬಂದ ಆರಂಭದಲ್ಲಿ ಸಂಸ­ದೀಯ ಚರ್ಚೆಗಳು ವಿಸ್ತೃತ­ವಾಗಿ ನಡೆಯುತ್ತಿದ್ದವು’ ಎಂದು ಆರ್‌ಎಸ್‌ಎಫ್‌ ನಿರ್ದೇಶಕ ಕೆ.ವಿ. ನರೇಂದ್ರ ಅವರು ವರದಿಯಲ್ಲಿ ಉಲ್ಲೇಖಿ­ಸಿ­ದ್ದಾರೆ. ಸ್ವಾತಂತ್ರ್ಯ ದೊರೆತ ಆರಂಭದ 30 ವರ್ಷಗಳಲ್ಲಿ ನಡೆದ ಸಂಸ­ದೀಯ ಚರ್ಚೆಗಳ ಅವಧಿಗೆ ಹೋಲಿಸಿದರೆ, ಈ ಬಾರಿಯ ಲೋಕ­ಸಭೆ­ಯಲ್ಲಿ ವಿವಿಧ ವಿಷಯಗಳ ಕುರಿತು ಚರ್ಚೆ ನಡೆದ ಅವಧಿಯಲ್ಲಿ ಶೇ 68ರಷ್ಟು ಕುಸಿತ ಕಂಡು­ಬಂದಿದೆ ಎಂದು ವರದಿ ಹೇಳಿದೆ.

ಮೊದಮೊದಲು ಸಂಸತ್ತು ಪ್ರತಿದಿನ ಸರಾಸರಿ 6 ತಾಸು, 19 ನಿಮಿಷಗಳ ಕಾಲ ಕಲಾಪ ನಡೆ­ಸುತ್ತಿತ್ತು. ಆದರೆ ಅದು ಈಗ ಸರಾಸರಿ 2 ತಾಸು, 53 ನಿಮಿಷಕ್ಕೆ ಇಳಿದಿದೆ.
ಈ ಬಾರಿಯ ಲೋಕಸಭೆ ಮೊದಲ ಬಾರಿ ಕಲಾಪ ನಡೆಸಿದಾಗ, (2009ರ ಜೂನ್‌ 1ರಿಂದ 9ರವರೆಗೆ) ಒಂದೇ ಒಂದು ನಿಮಿಷ ಕೂಡ ವ್ಯರ್ಥ­ವಾಗಲಿಲ್ಲ. ಆದರೆ 2010ರ ನವೆಂಬರ್‌ 9ರಿಂದ ಡಿಸೆಂಬರ್‌ 13ರವರೆಗೆ ನಡೆದ ಕಲಾಪ­ದಲ್ಲಿ 124 ಗಂಟೆಗಳ ಅವಧಿ ಗದ್ದಲ­ದಲ್ಲೇ ಮುಗಿದು­ಹೋಯಿತು. 15ನೇ ಲೋಕಸಭೆ ಒಟ್ಟು 824 ತಾಸು, 51 ನಿಮಿಷಗಳನ್ನು ಗದ್ದಲದಲ್ಲೇ ಕಳೆದು­ಕೊಂಡಿದೆ ಎಂದು ವರದಿ ಹೇಳುತ್ತದೆ.

‘ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಮೈತ್ರಿ­ಕೂಟ (ಎನ್‌ಡಿಎ) ಸರ್ಕಾರ ಮತ್ತು ಯುಪಿಎ–1ರ ಅವಧಿಗೆ ಹೋಲಿಸಿದರೆ, ಯುಪಿಎ–2ರ ಅವಧಿ­ಯಲ್ಲಿ ಸಂಸತ್‌ ಕಲಾಪಗಳು ಗದ್ದಲಕ್ಕೆ ಬಲಿಯಾದ ಪ್ರಮಾಣ ಶೇ 175ರಷ್ಟು ಹೆಚ್ಚಾ­ಗಿದೆ. ನಮ್ಮ ರಾಜಕಾರಣಿಗಳು ರಾಜಕಾ­ರಣದ ಮೂಲ ಶಿಷ್ಟಾಚಾರ, ತಮ್ಮನ್ನು ಆಯ್ಕೆ ಮಾಡಿದ ಜನರಿಗೆ ತಾವು ಜವಾಬ್ದಾರರಾಗಿರಬೇಕು ಎಂಬ ಅಂಶ­ಗಳನ್ನೂ ಮರೆತಿದ್ದಾರೆ’ ಎಂದು ವರದಿ­ಯಲ್ಲಿ ಅಸಮಾಧಾನ ವ್ಯಕ್ತಪಡಿಸಲಾಗಿದೆ.

ಕಾರಣಗಳು ಯಾವವು?: 15ನೇ ಲೋಕಸಭೆ­ಯಲ್ಲಿ ಅತಿ ಹೆಚ್ಚು ಗದ್ದಲ ಸೃಷ್ಟಿಸಿದ ಕೆಲವು ವಿಚಾರ­ಗಳನ್ನು ವರದಿ ಪಟ್ಟಿಮಾಡಿದೆ. ಅದರಲ್ಲಿ, ಆಂಧ್ರ­ಪ್ರದೇಶ ವಿಭಜಿಸಿ ಪ್ರತ್ಯೇಕ ತೆಲಂಗಾಣ ರಾಜ್ಯ ಸೃಷ್ಟಿಸುವ ವಿಚಾರ ಮೊದಲ ಸ್ಥಾನ ಪಡೆದುಕೊಂಡಿದೆ.

ತೆಲುಗುದೇಶಂ ಪಕ್ಷ ಲೋಕಸಭೆ­ಯಲ್ಲಿ ತೆಲಂಗಾಣ ವಿಚಾರ ಪ್ರಸ್ತಾಪಿಸಿ, ಗದ್ದಲ ಎಬ್ಬಿಸಿತು. ಇದರಿಂದಾಗಿ ಲೋಕ­ಸಭೆಯಲ್ಲಿ 90 ತಾಸು ಯಾವುದೇ ಚರ್ಚೆ ನಡೆಯಲಿಲ್ಲ. ಇಷ್ಟೇ ಅಲ್ಲ, ತೆಲಂಗಾಣ ರಾಜ್ಯ ರಚನೆಯ ಪರ ಇರುವ­ವರು ಮತ್ತು ವಿರೋಧಿಸುವ­ವರು ಯೋಜಿತ, ವಿಸ್ತೃತ ಚರ್ಚೆಯನ್ನೇ ನಡೆಸಲಿಲ್ಲ.

15ನೇ ಲೋಕಸಭೆಯ 15ನೇ ಕಲಾಪದಲ್ಲಿ ಇನ್ನೂ ಕೆಲವು ವಿಷಯ­ಗಳು ಸಂಸತ್‌ ಕಲಾಪ­ವನ್ನು ಹಾಳು­ಗೆಡವಿದವು. ವಿಶ್ವ ಹಿಂದೂ ಪರಿ­ಷತ್ತು ಅಯೋಧ್ಯೆಯಲ್ಲಿ ನಡೆಸಿದ ಕೋಶಿ ಯಾತ್ರೆ ಕುರಿತು ಪ್ರಸ್ತಾಪಿಸಿ ಸಮಾಜ­ವಾದಿ ಪಕ್ಷ ಕಲಾಪ ಹಾಳುಗೆಡವಿತು. ವಿಚಾರವಾದಿ ನರೇಂದ್ರ ದಾಭೋಲ್ಕರ್‌ ಹತ್ಯೆ ವಿಚಾರದಲ್ಲಿ ಬಿಜೆಪಿ ಕಲಾಪಕ್ಕೆ ಅಡ್ಡಿ ಉಂಟುಮಾಡಿತು. ಜಮ್ಮು ಮತ್ತು ಕಾಶ್ಮೀರದಲ್ಲಿ ಭಾರತೀಯ ಯೋಧರ ಮೇಲೆ ಪಾಕಿಸ್ತಾನದ ಸೈನಿಕರು ನಡೆಸಿದ ಆಕ್ರ­ಮಣ ವಿಚಾರ ಮುಂದಿಟ್ಟುಕೊಂಡು ಬಿಜೆಪಿ ಮತ್ತಿ­ತರ ವಿರೋಧ ಪಕ್ಷಗಳು ಗದ್ದಲ ಎಬ್ಬಿಸಿದವು.

ಪರಿಶಿಷ್ಟ ಜಾತಿ ಮತ್ತು ಪಂಗಡದ ನೌಕರರಿಗೆ ಸರ್ಕಾರಿ ಉದ್ಯೋಗ ಬಡ್ತಿಯಲ್ಲಿ ಮೀಸಲಾತಿ ಕಲ್ಪಿಸುವ ವಿಚಾರದಲ್ಲಿ ವಿರೋಧ ಪಕ್ಷಗಳು ಗದ್ದಲ ಉಂಟುಮಾಡಿದವು ಎಂದು ವರದಿ ಹೇಳುತ್ತದೆ.

ತುರ್ತು ಸ್ಥಿತಿ: ದಿ ಬೆಸ್ಟ್‌!
ಬೆಂಗಳೂರು:ಸ್ವಾತಂತ್ರ್ಯಾನಂತರ ಇದುವ­ರೆಗಿನ ಲೋಕಸಭೆಗಳ ಪೈಕಿ, ತುರ್ತು ಪರಿಸ್ಥಿತಿ ಘೋಷಣೆ­ಯಾ­ದಾಗ ಇದ್ದ ಲೋಕಸಭೆ ಅತ್ಯಂತ ಹೆಚ್ಚಿನ ಸಮಯವನ್ನು ಚರ್ಚೆ­ಗಳಿಗೆ ಮೀಸಲಿಟ್ಟಿತ್ತು ಎಂದು ವರದಿ ಉಲ್ಲೇಖಿಸಿದೆ.