ವಿಜಯಪುರ(ದೇವನಹಳ್ಳಿ): ಅರಣ್ಯ ಪ್ರದೇಶದಲ್ಲಿ ಪ್ರಾಣಿ, ಪಕ್ಷಿಗಳಿಗೆ ಅನುಕೂಲವಾಗುವಂತೆ ಇಲಾಖೆ ಸಿಬ್ಬಂದಿ ಟ್ಯಾಂಕರ್‌ ಮೂಲಕ ಅರಣ್ಯದಲ್ಲಿ ಇಟ್ಟಿರುವ ತೊಟ್ಟಿಗಳಿಗೆ ನೀರು ತುಂಬಿಸಿ ಪ್ರಾಣಿ, ಪಕ್ಷಿಗಳ ದಾಹ ನೀಗಿಸುತ್ತಿದ್ದಾರೆ.
ಮಂಡಿಬೆಲೆ, ಕೋರಮಂಗಲ, ನಾರಾಯಣಪುರ, ಕಣಿತಹಳ್ಳಿ ಅರಣ್ಯ ಪ್ರದೇಶದಲ್ಲಿನ ಪ್ರಾಣಿಗಳು ಬಿಸಿಲಿನ ತಾಪಮಾನ ತಾಳಲಾರದೆ ನೀರಿಗಾಗಿ ಹಳ್ಳಿಗಳತ್ತ ಬರುತ್ತಿವೆ. ಅರಣ್ಯ ಪ್ರದೇಶದೊಳಗೆ ಸಿಮೆಂಟ್ ತೊಟ್ಟಿಗಳನ್ನು ಇಟ್ಟು ಟ್ಯಾಂಕರ್‌ ಮೂಲಕ ನೀರು ತುಂಬಿಸಲಾಗುತ್ತಿದೆ. ರಸ್ತೆ ಇಕ್ಕೆಲಗಳಲ್ಲಿ ತೊಟ್ಟಿ ಇಟ್ಟು ನೀರು ತುಂಬಿಸಲಾಗುತ್ತಿದೆ.
ಬೆಂಕಿ ಹಚ್ಚದಂತೆ ಮನವಿ: ಕೆಲ ಕಿಡಿಗೇಡಿಗಳು ಮಧ್ಯಾಹ್ನ ಸಮಯದಲ್ಲಿ ಅರಣ್ಯದ ಕಡೆಗೆ ಬಂದು ಮೊಬೈಲ್ ರಿಲ್ಸ್ ಮಾಡಿಕೊಂಡು ಬೆಂಕಿ ಹಚ್ಚುತ್ತಿರುವ ಕಾರಣ ಬೆಂಕಿ ಹೊತ್ತುಕೊಂಡು ಅಪಾರ ಪ್ರಮಾಣದ ಗಿಡ, ಮರಗಳು ಸುಟ್ಟುಹೋಗುತ್ತಿವೆ. ಇದರ ಜತೆ ಪ್ರಾಣಿ, ಪಕ್ಷಿಗಳಿಗೂ ಹಾನಿ ಆಗುತ್ತಿದೆ. ಅರಣ್ಯ ಪ್ರದೇಶದಲ್ಲಿ ಬೆಂಕಿ ಹಚ್ಚಬಾರದು ಎಂದು ಸಾರ್ವಜನಿಕರಿಗೆ ಅರಣ್ಯ ಇಲಾಖೆ ಅಧಿಕಾರಿ ರೆಹಮಾನ್ ಮನವಿ ಮಾಡಿದ್ದಾರೆ.
