‘ಇದೊಂದು ದೊಡ್ಡ ಪ್ರಮಾಣದ ದುರಂತ’ ಎಂದು ಮೆಡಲಿನ್ನ ಮೇಯರ್ ಫೆಡೆರಿಕೊ ಗ್ವಿಟ್ರೆಜ್ ತಿಳಿಸಿದ್ದಾರೆ. ದುರಂತ ಸಂಭವಿಸಿದ ಪ್ರದೇಶ ನಗರದ ಹೊರವಲಯದಲ್ಲಿದ್ದು, ಗುಡ್ಡಗಳಿಂದ ಆವೃತವಾಗಿದೆ ಎಂದೂ ಅವರು ತಿಳಿಸಿದ್ದಾರೆ. ವಿಮಾನ ಅಪಘಾತಕ್ಕೀಡಾದ ತಕ್ಷಣವೇ ರಕ್ಷಣಾ ಕಾರ್ಯಚರಣೆ ಆರಂಭಿಸಲಾಗಿದೆ. ಆದರೆ, ಮಬ್ಬು ಕವಿದ ವಾತಾವರಣ ಇದ್ದ ಕಾರಣ ವಾಯುಪಡೆಯ ಹೆಲಿಕಾಪ್ಟರ್ ಆ ಪ್ರದೇಶಕ್ಕೆ ತೆರಳಲು ಸಾಧ್ಯವಾಗದೆ ವಾಪಸಾಯಿತು. ಕಳೆದ ಮೂರು ದಿನಗಳಿಂದ ಮಳೆಯಾಗುತ್ತಿರುವುದೂ ರಕ್ಷಣಾ ಕಾರ್ಯಾಚರಣೆಗೆ ಅಡ್ಡಿಯಾಗಿದೆ ಎಂದು ಮೂಲಗಳು ತಿಳಿಸಿವೆ.