ಮಳೆ ಇರದಿದ್ದರೂ ತುಂಬಿತೀ ಕೆರೆ...!

ಇದೀಗ ಅವುಗಳಿಗೆ ಮತ್ತೆ ಜೀವಕಳೆ ತುಂಬುತ್ತಿದೆ. ಕಾಲುವೆ ಮೂಲಕ ಹರಿಸಲಾದ ನೀರಿನಿಂದ ಮುಂಡರಗಿ ತಾಲ್ಲೂಕಿನ ಡಂಬಳ, ಶಿರೋಳ, ತಾಮ್ರಗುಂಡಿ, ಜಂತ್ಲಿಶಿರೂರ, ಮುಂಡವಾಡ, ಹಿರೇವಡ್ಡಟ್ಟಿ, ಗದಗ ನಗರದ ಹೃದಯ ಭಾಗದ ಭೀಷ್ಮ ಕೆರೆ, ಲಕ್ಕುಂಡಿ, ಸಂಭಾಪೂರ ಕೆರೆ, ಕೊಪ್ಪಳ ತಾಲ್ಲೂಕಿನ ಕವಲೂರ ಕೆರೆಯನ್ನು ತುಂಬಿಸಲಾಗಿದೆ.

ತಾಲ್ಲೂಕಿನಲ್ಲಿ ಒಟ್ಟು 11 ಕೆರೆಗಳಿದ್ದು, ಎಲ್ಲ ಕೆರೆಗಳ ಒಟ್ಟು ವಿಸ್ತಾರ 776.82 ಹೆಕ್ಟೇರ್. ಈ ಕೆರೆಗಳ ಪೈಕಿ ಈಗ 6 ಕೆರೆಗಳು ತುಂಬಿದ್ದು ಒಟ್ಟು 3127 ಹೆಕ್ಟೇರ್ ಪ್ರದೇಶದಲ್ಲಿ ನೀರಾವರಿ ಸೌಲಭ್ಯ ಪಡೆಯುವಂತಾಗಿದೆ. ಕಾಲುವೆಗೆ ಒಳಪಡುವ ಜಮೀನುಗಳಲ್ಲಿ ಹತ್ತಿ, ಜೋಳ, ಮೆಕ್ಕೆಜೋಳ, ಈರುಳ್ಳಿ, ಶೇಂಗಾ, ಮೆಣಸಿನಕಾಯಿ ಸೇರಿದಂತೆ ಹಲವಾರು ಬೆಳೆಗಳಿಗೆ ಈಗ ಈ ನೀರೇ ಜೀವನಾಧಾರ.

ಈ ಕೆರೆಗಳ ನೀರಿನಿಂದ ರೈತರ ಜಮೀನುಗಳಿಗೆ ಸದ್ಯ ನೀರು ಹರಿಸುತ್ತಿಲ್ಲ. ಅಂತರ್ಜಲ ಮಟ್ಟ ಹೆಚ್ಚಿಸಲು, ಜಾನುವಾರುಗಳಿಗೆ ನೀರುಣಿಸಲು ಸಹಾಯಕವಾಗಿದೆ. ಮುಂದಿನ ದಿನಗಳಲ್ಲಿ ಬಿಂಕದಕಟ್ಟಿ, ಕಳಸಾಪೂರ, ಹುಲಕೋಟಿ, ಕುತರ್ಕೋಟಿ, ಹಿರೇಹಂದಿಗೋಳ, ಗ್ರಾಮದ ಕೆರೆಗಳಿಗೆ ನೀರು ತುಂಬಿಸುವ ಕುರಿತು ನೀರಾವರಿ ಇಲಾಖೆ ಪ್ರಸ್ತಾವ ಸಲ್ಲಿಸಿದೆ.

ಯೋಜನೆ ಹಿನ್ನೆಲೆ
ಮುಂಡರಗಿ ತಾಲೂಕಿನಲ್ಲಿ ದಶಕದಿಂದ ಮಳೆ ಅಭಾವ. ಆದ್ದರಿಂದ  ಈ ಭಾಗದ ಪ್ರದೇಶಗಳನ್ನು ಸೂಕ್ಷ್ಮ ನೀರಾವರಿಗೆ ಒಳಪಡಿಸಿ 94,993 ಎಕರೆ ಹೆಚ್ಚುವರಿ ಪ್ರದೇಶಕ್ಕೆ ನೀರಾವರಿ ಕಲ್ಪಿಸಲು ಯೋಜನೆ ರೂಪಿಸಲಾಯಿತು. ಇದರ ಪರಿಣಾಮವಾಗಿ ಬಲ ಮತ್ತು ಎಡ ಭಾಗದ ಸುಮಾರು 48 ಎಕರೆ ಪ್ರದೇಶಕ್ಕೆ ‘ಹರಿವು ನೀರಾವರಿ’ ಹಾಗೂ ಎಡಭಾಗದ  ಸುಮಾರು ಎರಡು ಎಕರೆ ಪ್ರದೇಶಕ್ಕೆ ‘ಸೂಕ್ಷ್ಮ ನೀರಾವರಿ’ ಕಲ್ಪಿಸಲಾಗಿದೆ. ಈ ಯೋಜನೆ ಫಲವಾಗಿ ಬಳ್ಳಾರಿ, ಗದಗ, ಕೊಪ್ಪಳ ಜಿಲ್ಲೆಗಳ ಒಟ್ಟು 2 ಲಕ್ಷದ 65 ಸಾವಿರದ 229 ಎಕರೆ ಪ್ರದೇಶಕ್ಕೆ ನೀರಾವರಿ ನೀಡಿದಂತಾಗಿದೆ. ಇದೊಂದು ರೀತಿಯಲ್ಲಿ ದಾಖಲೆ ಎನ್ನುತ್ತಾರೆ ಶಿರಹಟ್ಟಿ ಕ್ಷೇತ್ರದ ಶಾಸಕ ಮತ್ತು ಜಲ ಸಂಪನ್ಮೂಲ ಇಲಾಖೆಯ ಸಂಸದೀಯ ಕಾಯದರ್ಶಿ ರಾಮಕೃಷ್ಣ ದೊಡ್ಡಮನಿ.

‘1992 ರಿಂದ 2013 ರವರೆಗೆ 21 ವರ್ಷಗಳ ಅವಧಿಯಲ್ಲಿ 12,941 ಎಕರೆ ಪ್ರದೇಶಕ್ಕೆ ನೀರಾವರಿ ಕಲ್ಪಿಸಲಾಗಿರುತ್ತದೆ.  ಆದರೆ ಈಗ, ಅಂದರೆ 2013–2016ರ ಅಕ್ಟೋಬರ್‌ವರೆಗೆ ಮೂರೇ ವರ್ಷದಲ್ಲಿ ಒಟ್ಟು ₹813.68 ಕೋಟಿ ಆರ್ಥಿಕ ಪ್ರಗತಿ ಹಾಗೂ 35,440 ಎಕರೆ ಭೌತಿಕ ಪ್ರಗತಿಯನ್ನು ಸಾಧಿಸಲಾಗಿದೆ.

ಈ ಮೂಲಕ ಶಾಶ್ವತ ಬರದ ನಾಡಿನ ಹಣೆಪಟ್ಟಿಯನ್ನು ದೂರ ಮಾಡಲಾಗಿದೆ. ಎರಡು ದಶಕದಿಂದ ಕುಂಟುತ್ತ ಸಾಗಿದ್ದ ಯೋಜನೆಗೆ ಈ ಕಾಯಕಲ್ಪ ದೊರೆತಿದ್ದು ರೈತರಲ್ಲಿ ಆತ್ಮವಿಶ್ವಾಸ ಮೂಡಿದೆ’ ಎನ್ನುತ್ತಾರೆ. ‘ಇದೇ ರೀತಿ ಪ್ರತಿಯೊಂದು ಗ್ರಾಮದಲ್ಲೂ ಯೋಜನೆ ಕೈಗೊಂಡು ರೈತರಿಗೆ ಉಪಯೋಗ ಆಗುವಂತೆ ಮಾಡಿದರೆ ಒಳಿತು’ ಎನ್ನುತ್ತಾರೆ ಕಬ್ಬು ಬೆಳೆಗಾರರ ಸಂಘದ ರಾಜ್ಯ ಕಾಯದರ್ಶಿ ವಿಠ್ಠಲ ಗಣಾಚಾರಿ.

ಈಜುಪಟುಗಳಿಗೆ ಕಲಿಕೆಯ ತಾಣ
ನಗರ ಪ್ರದೇಶದ ಸೀಮಿತ ಜಾಗದ ಈಜುಕೊಳದಲ್ಲಿ ಹಣ ಪಾವತಿಸಿ ಈಜಾಡುವುದರಿಂದ ಮನಸ್ಸಿಗೆ ಆನಂದ ಸಿಗುವುದಿಲ್ಲ ಎನ್ನುವ ಭಾವನೆಯಿದೆ. ಆದರೆ ಕಪ್ಪತ್ತಗುಡ್ಡದ ಪ್ರಕೃತಿಯ ಸೊಬಗಿನಲ್ಲಿರುವ ಗ್ರಾಮದ ವಿಕ್ಟೋರಿಯಾ ಮಹಾರಾಣಿ ಕೆರೆ ತುಂಬಿ 10–11 ಅಡಿ ನೀರು ಸಂಗ್ರಹ ಆಗಿದ್ದರಿಂದ ಇದು ಈಜುಪಟುಗಳಿಗೆ,  ಈಜು ಕಲಿಯುವವರಿಗೆ ಉತ್ತಮ ತಾಣವಾಗಿದೆ. ಶಾಲಾ ಕಾಲೇಜು ವಿದ್ಯಾರ್ಥಿಗಳಿಗಂತೂ ಇದು ಅಚ್ಚುಮೆಚ್ಚಿನ ತಾಣವಾಗಿದೆ.
‘ಮಳೆ ಕೈಕೊಟ್ಟಿದ್ದರಿಂದ ಮಕ್ಕಳಿಗೆ ಈಜಲು ಕೆರೆಗಳೇ ಇರಲಿಲ್ಲ. ಈಗ ಇಂಥದ್ದೊಂದು ಯೋಜನೆಯಿಂದ ಮಕ್ಕಳಲ್ಲಿ ಅತ್ಯುತ್ಸಾಹ ತುಂಬಿದೆ’ ಎನ್ನುತ್ತಾರೆ ಶಾಲಾ ವಿದ್ಯಾರ್ಥಿಗಳಾದ ನಾಗರಾಜ ಜಂತ್ಲಿ ಹಾಗೂ ಮುಜಾಮಿಲ್ ತಾಂಭೋಟಿ.

ಈಗ ಇದೊಂದು ಪ್ರವಾಸಿ ತಾಣವಾದಂತೆ ಭಾಸವಾಗುತ್ತಿದೆ. ಪಕ್ಷಿಗಳೂ ವಲಸೆ ಬರುತ್ತಿವೆ. ಸಮೀಪದಲ್ಲಿಯೇ ಪ್ರಸಿದ್ಧ ದೊಡ್ಡ ಬಸವೇಶ್ವರ ದೇವಸ್ಥಾನ, ಜಗದ್ಗುರು ತೋಂಟದಾರ್ಯ ಮಠ, ಸೋಮೇಶ್ವರ ದೇವಸ್ಥಾನ, ಮರಳಸಿದ್ದೇಶ್ವರ ದೇವಸ್ಥಾನ ಜಮಲಶಾವಲಿ ದುರ್ಗ, ಪ್ರವಾಸಿ ಮಂದಿರ, ಜಪದ ಬಾವಿ, ಡಂಬಳ ಕೋಟೆ ಸೇರಿದಂತೆ ಐತಿಹಾಸಿಕ ತಾಣಗಳು ಇರುವುದರಿಂದ ಇಲ್ಲಿ ಬರುವ ಜನರ ಸಂಖ್ಯೆಯೂ ಹೆಚ್ಚುತ್ತಿದೆ.

‘ಇವೆಲ್ಲವನ್ನೂ ಗಮನಿಸಿದರೆ ಇದೊಂದು ಪ್ರವಾಸಿ ತಾಣ ಆಗುವಲ್ಲಿ ಅಚ್ಚರಿಯಿಲ್ಲ. ವಿದೇಶಿಗರನ್ನೂ ಈಗಾಗಲೇ ಈ ಸ್ಥಳ ಆಕರ್ಷಿಸಿದ್ದು, ಅವರೂ ಭೇಟಿ ನೀಡುತ್ತಿದ್ದಾರೆ. ಆದ್ದರಿಂದ ಸರ್ಕಾರ ಮನಸ್ಸು ಮಾಡಿ ಇದನ್ನು ಪ್ರವಾಸಿ ತಾಣವನ್ನಾಗಿ ಮಾಡಬೇಕು’ ಎನ್ನುತ್ತಾರೆ ಗ್ರಾಮದ ಬಾಬುಸಾಬ ಸರ್ಕವಾಸ.