ಓಂಪುರಿ: ಚಿತ್ರಪ್ರೀತಿಯ ಒರತೆ

ಸದಾ ವೈವಿಧ್ಯಕ್ಕೆ ತೆರೆದುಕೊಂಡವರು. ‘ವಾರ್’ ಹಾಲಿವುಡ್ ಸಿನಿಮಾದಲ್ಲಿ ಪಾಕಿಸ್ತಾನದ ಜನರಲ್ ಜಿಯಾ ಉಲ್ ಹಕ್ ಪಾತ್ರಕ್ಕೆ ಜೀವತುಂಬಲು ಹಿಂದೇಟು ಹಾಕಿರಲಿಲ್ಲ. ‘ಮೈ ಸನ್ ಫನಟಿಕ್’, ‘ಈಸ್ಟ್ ಈಸ್ ಈಸ್ಟ್’, ‘ಪೆರೋಲ್ ಆಫೀಸರ್’ ಅವರು ನಟಿಸಿದ ಬ್ರಿಟಿಷ್ ನಿರ್ಮಾಣದ ಚಿತ್ರಗಳು. 1980ರ ದಶಕದ ಕೊನೆಯಲ್ಲಿ ಧಾರಾವಾಹಿಗಳಲ್ಲೂ ಛಾಪು ಮೂಡಿಸಿದರು. ‘ಕಕ್ಕಾಜಿ ಕಹೇಂ’ ಧಾರಾವಾಹಿಯಲ್ಲಿ ಪಾನ್ ಜಗಿಯುತ್ತಾ ಮಾತನಾಡುವ ಕಕ್ಕಾಜಿ ಪಾತ್ರವನ್ನು ಆ ಕಾಲದ ಟಿ.ವಿ. ಧಾರಾವಾಹಿ ಅಭಿಮಾನಿಗಳು ಮರೆಯಲಾರರು. ‘ಮಿಸ್ಟರ್ ಯೋಗಿ’ ಧಾರಾವಾಹಿಯಲ್ಲಿ ಸೂತ್ರಧಾರನಾಗಿ ಅವರು ಕಾಲೆಳೆದ ಪ್ರಸಂಗಗಳನ್ನು ನೆನಪಿಟ್ಟುಕೊಂಡವರೂ ಇದ್ದಾರೆ. ಗೋವಿಂದ್ ನಿಹಲಾನಿ ಟಿ.ವಿಗೆಂದೇ ಸಿದ್ಧಪಡಿಸಿದ ‘ತಮಸ್’ನಲ್ಲಿ ಕೂಡ ಓಂಪುರಿ ನಟಿಸಿದರು. 

 

ಧಾರಾವಾಹಿ ಮೂಲಕ ಹಾಸ್ಯ ರಸವನ್ನೂ ಉಕ್ಕಿಸಬಲ್ಲ ನಟ ತಾನೆಂದು ಸಾಬೀತುಪಡಿಸಿದ ಅವರು, ‘ಜಾನೆ ಭಿ ದೊ ಯಾರೋಂ’, ‘ಚಾಚಿ 420’, ‘ಹೇರಾ ಫೇರಿ’, ‘ಚೋರ್ ಮಚಾಯ್ ಶೋರ್’, ‘ಮಾಲಾಮಾಲ್ ವೀಕ್ಲಿ’ ಚಿತ್ರಗಳಲ್ಲಿಯೂ ಹಾಸ್ಯಪಾತ್ರಕ್ಕೂ ತಾವು ಸೈ ಎನ್ನುವುದನ್ನು ಸಾಬೀತು ಮಾಡಿದರು.