ಕಳೆಗುಂದಿದ ಆರ್ಥಿಕತೆಗೆ ಬೇಕು ವಿತ್ತೀಯ ಬೆಂಬಲ

ವಾಡಿಕೆಯ ಮುಂಗಾರು ಮತ್ತು ಉತ್ತಮ ಬಿತ್ತನೆ ಫಲವಾಗಿ ಮುಂಗಾರು ಬೆಳೆ ಉತ್ಪಾದನೆಯು ಶೇ 8.9ರಷ್ಟು ಹೆಚ್ಚಾಗಿದೆ. ಹೀಗಾಗಿ ಕೃಷಿ ವಲಯದ ಬೆಳವಣಿಗೆ ದರ ಹಿಂದಿನ ವರ್ಷಕ್ಕಿಂತ (ಶೇ 1.2) ಈ ಬಾರಿ ಉತ್ತಮ ಸಾಧನೆ (ಶೇ 4.1) ಪ್ರದರ್ಶಿಸಿರುವುದೊಂದೇ  ತಕ್ಕಮಟ್ಟಿಗೆ ಸಮಾಧಾನಕರ ವಿದ್ಯಮಾನವಾಗಿದೆ. ನಗದು ಕೊರತೆ ಹೊರತಾಗಿಯೂ ಹಿಂಗಾರು ಬಿತ್ತನೆಯೂ ಉತ್ತಮವಾಗಿದೆ ಎಂದೂ ಸರ್ಕಾರ ಪ್ರತಿಪಾದಿಸುತ್ತಿದೆ. ಅದು ನಿಜವೇ ಆಗಿದ್ದರೆ, ಕೃಷಿ ಉತ್ಪಾದನೆ ಹೆಚ್ಚಳಗೊಂಡು  ಗ್ರಾಮೀಣ ಉಪಭೋಗ ಹೆಚ್ಚಿದರೆ, ಕಳೆಗುಂದಿರುವ ಆರ್ಥಿಕತೆಗೆ ತಕ್ಕಮಟ್ಟಿಗೆ ಚೇತರಿಕೆ ದೊರೆಯಬಹುದು ಎಂದು ಆಶಿಸಬಹುದು. ಆದರೆ, ತಯಾರಿಕೆ, ಕಟ್ಟಡ ನಿರ್ಮಾಣ ಮತ್ತು ಗಣಿಗಾರಿಕೆ ವಲಯದಲ್ಲಿನ ಕುಂಠಿತ ಬೆಳವಣಿಗೆಯು ಒಟ್ಟಾರೆ ವೃದ್ಧಿ ದರಕ್ಕೆ ಕಡಿವಾಣ ಹಾಕಲಿದೆ. ಸೇವಾ ವಲಯದಲ್ಲಿ ಪ್ರಮುಖವಾಗಿರುವ ವ್ಯಾಪಾರ, ಹೋಟೆಲ್‌ ಮತ್ತು ಸಾರಿಗೆ ವಲಯಗಳಲ್ಲಿಯೂ ಮಂದಗತಿ ಕಂಡು ಬರಲಿದೆ. ವಿದ್ಯುತ್‌, ನೈಸರ್ಗಿಕ ಅನಿಲ, ನೀರು ಪೂರೈಕೆ ಮತ್ತಿತರ ನಾಗರಿಕ ಸೇವೆಗಳ ವಿಸ್ತರಣೆಯಲ್ಲಿಯೂ ಮಂದಗತಿಯ ಪ್ರಗತಿ ಕಂಡುಬಂದಿರುವುದರಿಂದ ಒಟ್ಟಾರೆ ಆರ್ಥಿಕ ಚಟುವಟಿಕೆಗಳು ನಿಧಾನಗತಿಯಲ್ಲಿ ನಡೆಯುತ್ತಿವೆ. ಅರ್ಥ ವ್ಯವಸ್ಥೆಯ ಎರಡು ಪ್ರಮುಖ ಎಂಜಿನ್‌ಗಳಾಗಿರುವ ತಯಾರಿಕೆ ಮತ್ತು ಸೇವಾ ವಲಯಗಳ  ಬೆಳವಣಿಗೆಯೇ ಕುಂಠಿತಗೊಂಡಿರುವುದು ಕಳವಳಕಾರಿ ಸಂಗತಿಯಾಗಿದೆ.  ಇದು ಮುಂದಿನ ದಿನಗಳಲ್ಲೂ ವ್ಯತಿರಿಕ್ತ ಪರಿಣಾಮ ಬೀರಲಿದೆ. ನಗದು ವಹಿವಾಟು ಪ್ರಧಾನ ವಲಯಗಳಾದ ಚಿಲ್ಲರೆ ವ್ಯಾಪಾರ, ಹೋಟೆಲ್‌, ಸಾರಿಗೆ ಮತ್ತು  ಇತರ ಅಸಂಘಟಿತ ರಂಗಗಳಲ್ಲಿನ ಚಟುವಟಿಕೆಗಳೂ ಕಳೆಗುಂದಿದ್ದು,  ವೃದ್ಧಿ ದರದ ಮೇಲೆ ಖಂಡಿತವಾಗಿಯೂ ಪ್ರಭಾವ ಬೀರಲಿವೆ.

ಆರ್ಥಿಕ ವೃದ್ಧಿ ದರವನ್ನು ಚೇತರಿಕೆ ಹಾದಿಗೆ ತರಲು ಕೇಂದ್ರ ಸರ್ಕಾರವು ಹಲವಾರು ರಚನಾತ್ಮಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಬೇಕಾದ ಸವಾಲು ಎದುರಾಗಿದೆ. ಬ್ಯಾಂಕ್‌ಗಳ ಹಣಕಾಸು ಪರಿಸ್ಥಿತಿ ಸುಧಾರಿಸಿ, ಚಿಲ್ಲರೆ ವಹಿವಾಟು, ತಯಾರಿಕೆ ವಲಯಗಳಿಗೆ ಹೆಚ್ಚಿನ ಪ್ರಮಾಣದಲ್ಲಿ ಸಾಲ ಹರಿದು ಬರುವಂತೆ ಮಾಡಬೇಕಾಗಿದೆ. ಮೂಲಸೌಕರ್ಯ ವಲಯಗಳಲ್ಲಿ ಸರ್ಕಾರದ ಬಂಡವಾಳ ಹೂಡಿಕೆ ಪ್ರಮಾಣವನ್ನು ಗಮನಾರ್ಹವಾಗಿ ಹೆಚ್ಚಿಸುವ ಕಾಳಜಿಯನ್ನೂ ತೋರಬೇಕಾಗಿದೆ. 2017–18ನೇ ಹಣಕಾಸು ವರ್ಷದ ಬಜೆಟ್‌ನಲ್ಲಿ ಆರ್ಥಿಕ ಚಟುವಟಿಕೆಗಳಿಗೆ ರಭಸದ ಉತ್ತೇಜನ ನೀಡುವಂತಹ ವಿತ್ತೀಯ ಬೆಂಬಲ ನೀಡಬೇಕಾದ ಅನಿವಾರ್ಯ ಉದ್ಭವಿಸಿದೆ. ಭೌತಿಕ ಮತ್ತು ಸಾಮಾಜಿಕ ಮೂಲಸೌಕರ್ಯಗಳಲ್ಲಿ ಬಂಡವಾಳ ಹೂಡಿಕೆ ಪ್ರಮಾಣ ಹೆಚ್ಚಿಸಿ, ಬೇಡಿಕೆ ಕುಸಿತದ ಸಮಸ್ಯೆಗಳನ್ನು ನಿವಾರಿಸಲು ಅಗತ್ಯ ಕ್ರಮಗಳನ್ನು ಕೈಗೊಂಡರೆ ಮಾತ್ರ  ಅರ್ಥ ವ್ಯವಸ್ಥೆ ಚೇತರಿಕೆಯ ಹಾದಿಗೆ ಮರಳೀತು.