ಕಾಡಿನ ಬೆಂಕಿ ತಡೆಗೆ ಸನ್ನದ್ಧತೆ ಕೊರತೆ ಅಕ್ಷಮ್ಯ

ಬಂಡಿಪುರದ ಮೊಳೆಯೂರು ವಲಯದಲ್ಲಿ ನಿಯಂತ್ರಣಕ್ಕೆ ಬಾರದಂತೆ ಹೊತ್ತಿ ಉರಿಯುತ್ತಿರುವ ಕಾಳ್ಗಿಚ್ಚಿಗೆ ಅರಣ್ಯ ಸಿಬ್ಬಂದಿಯೊಬ್ಬರು ಬಲಿಯಾಗಿದ್ದಾರೆ. ಮೂವರು ಸಿಬ್ಬಂದಿ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಇದೇ ಶನಿವಾರ ಕಾಣಿಸಿಕೊಂಡ ಬೆಂಕಿಯು ದಿನಗಟ್ಟಲೆ ಉರಿದು ಸುಮಾರು 20 ಚದರ ಕಿಲೋ ಮೀಟರ್‌ ಅರಣ್ಯವನ್ನು ಆಹುತಿ ತೆಗೆದುಕೊಂಡಿದೆ.

ಬೆಲೆಬಾಳುವ ಶ್ರೀಗಂಧ, ತೇಗ, ಬೀಟೆ,  ಮತ್ತಿ ಜೊತೆಯಲ್ಲಿ ಬಿದಿರು ಸಹ ಬೆಂಕಿಯ ಕೆನ್ನಾಲಿಗೆಗೆ ಭಸ್ಮವಾಗಿವೆ. ಬೇಸಿಗೆಯಲ್ಲಿ ಅಳಿದುಳಿದ ಹಸಿರನ್ನು ಹೊಂದಿದ್ದ ಬಿದಿರಿಗೂ ಬೆಂಕಿ ಹೊತ್ತಿರುವುದರಿಂದ ಆನೆಯಂತಹ ಪ್ರಾಣಿಯ ತುತ್ತಿಗೂ ಹೊಡೆತಬಿದ್ದಿದೆ. ಮಳೆಯಿಲ್ಲದೆ ಕಂಗಾಲಾಗಿರುವ ಬಂಡಿಪುರದ ಸ್ಥಿತಿ ಇದಾದರೆ, ಹೆಚ್ಚು ಮಳೆ ಬೀಳುವ ಮೂಕಾಂಬಿಕಾ ವನ್ಯಜೀವಿ ವಲಯದಲ್ಲೂ ಮಳೆಕಾಡಿಗೆ ಬೆಂಕಿ ಹಾಕಲಾಗಿದೆ.

ಕೃಷಿ ವಿಸ್ತರಣೆ ಮಾಡುವ ಉದ್ದೇಶದಿಂದಲೇ ಕಾಡಿಗೆ ಬೆಂಕಿ ಹಾಕಲಾಗಿದೆ ಎನ್ನುವ ಸಂಶಯವಿದೆ. ಬಿದಿರಿಗೆ ಬೆಂಕಿ ಬಿದ್ದ ಕಾರಣದಿಂದ ನಿಯಂತ್ರಣಕ್ಕೆ ಬಾರದಂತೆ ಬೆಂಕಿ ಹಬ್ಬುತ್ತಿದೆ. ಮಳೆಯ ಕೊರತೆಯಿಂದ ಜನರು ಬವಣೆ ಅನುಭವಿಸುತ್ತಿದ್ದಾರೆ. ಇದೇ ಸಂದರ್ಭದಲ್ಲಿ ಕಾಡಿನ ಕೆರೆಗಳೂ ಒಣಗಿವೆ.

ವನ್ಯಮೃಗಗಳು ನೀರನ್ನು ಹುಡುಕಿಕೊಂಡು ಕಾಡಿನಿಂದ ಕಾಡಿಗೆ ವಲಸೆ ಹೋಗುತ್ತಿವೆ. ಇಂತಹ ಕಷ್ಟ ಕಾಲದಲ್ಲಿ ಕಾಡಿಗೆ ದುರುದ್ದೇಶದಿಂದ  ಬೆಂಕಿ ಹಾಕಿರುವುದು ನಿಜವೇ ಆಗಿದ್ದಲ್ಲಿ ಅಂಥವರು ಕ್ಷಮೆಗೆ ಅರ್ಹರೇ ಅಲ್ಲ. ಅವರನ್ನು ಪತ್ತೆ ಮಾಡಿ ಕಠಿಣವಾಗಿ ಶಿಕ್ಷಿಸಬೇಕು.

ಕಾಡಿನ ಬೆಂಕಿಯ ಇತಿಹಾಸವನ್ನು ಅವಲೋಕಿಸಿದರೆ ದುಷ್ಕರ್ಮಿಗಳನ್ನು ಶಿಕ್ಷಿಸಿದ ಉದಾಹರಣೆಯೇ ಇಲ್ಲ. 2013–14 ಮತ್ತು 2016ರಲ್ಲಿ ಬಂಡಿಪುರದಲ್ಲಿ ಬೆಂಕಿ ಬಿದ್ದು ನೂರಾರು ಎಕರೆ ಸುಟ್ಟಿತ್ತು. 2013ರಲ್ಲಿ ಬಿದ್ದ ಬೆಂಕಿಗೆ ನಾಗರಹೊಳೆಯ 500 ಎಕರೆಗೂ ಹೆಚ್ಚು ಅರಣ್ಯ ಆಹುತಿಯಾಗಿತ್ತು. ಈ ಬಗ್ಗೆ ಸಿಐಡಿ ತನಿಖೆಗೂ ಆದೇಶಿಸಲಾಗಿತ್ತು. ಆದರೆ ಸಿಐಡಿ ಪೊಲೀಸರಿಗೂ ಅಪರಾಧಿಗಳ ಪತ್ತೆ ಸಾಧ್ಯವಾಗಿಲ್ಲ.

ತನಿಖಾಧಿಕಾರಿಗಳ ನಿರಂತರ ಬದಲಾವಣೆಯಿಂದ ತನಿಖೆ ತಾರ್ಕಿಕ ಅಂತ್ಯ ಕಂಡಿಲ್ಲ. ಇದು ಸಿಐಡಿ ವೃತ್ತಿಪರತೆಗೆ ಅಂಟಿದ ಕಪ್ಪು ಚುಕ್ಕೆ. ಶಿಕ್ಷೆಯೇ ಇಲ್ಲದ ಸ್ಥಿತಿ ಇರುವಾಗ ಬೆಂಕಿ ಹಾಕುವವರು ಯಾವ ಕಾರಣಕ್ಕೆ ಹೆದರುತ್ತಾರೆ? ಬೆಂಕಿ ಬಿದ್ದ ಸ್ಥಳದ ಸುತ್ತಮುತ್ತಲ ಕೆರೆಗಳಾದ ಚಿಕ್ಕಬೆಸುಗೆ, ಬಂಕವಾಡಿ, ಬೇಗೂರು ಕೆರೆಗಳಲ್ಲಿ ನೀರೇ ಇಲ್ಲ. ಅಗ್ನಿಶಾಮಕ ಸಿಬ್ಬಂದಿ ಬೆಂಕಿ ಆರಿಸಲು ನೀರಿಗಾಗಿ ಪರದಾಡುವಂತಾಗಿದೆ.