ಕೋಲ್ಕತ್ತ (ಪಿಟಿಐ): ಬಲಿಷ್ಠ ಆಟಗಾರರ ಕಣಜ ಎನಿಸಿರುವ ಮೋಹನ್‌ ಬಾಗನ್‌ ತಂಡ ಎಎಫ್‌ಸಿ ಕಪ್‌ ದಕ್ಷಿಣ ವಲಯ ಫುಟ್‌ಬಾಲ್‌ ಟೂರ್ನಿಯಲ್ಲಿ ಮತ್ತೊಂದು ಹೋರಾಟಕ್ಕೆ ಸಜ್ಜಾಗಿದೆ.
ರವೀಂದ್ರ ಸರೋವರ ಕ್ರೀಡಾಂಗಣ ದಲ್ಲಿ ಮಂಗಳವಾರ ನಡೆಯುವ ಎರಡನೇ ಲೆಗ್‌ನ ಫ್ಲೇ ಆಫ್‌ ಪಂದ್ಯದಲ್ಲಿ ಆತಿಥೇಯ ಬಾಗನ್‌ ತಂಡ ಮಾಲ್ಡೀವ್ಸ್‌ನ ಕ್ಲಬ್‌ ವಲೆನ್ಸಿಯಾ ವಿರುದ್ಧ ಸೆಣಸಲಿದ್ದು ಜಯದ ಮಂತ್ರ ಜಪಿಸುತ್ತಿದೆ.
ಮಾಲೆಯಲ್ಲಿ ನಡೆದಿದ್ದ ಉಭಯ ತಂಡಗಳ ನಡುವಣ ಮೊದಲ ಲೆಗ್‌ನ ಪಂದ್ಯ 1–1 ಗೋಲುಗಳಿಂದ ಡ್ರಾ ಆಗಿತ್ತು. ಆ ಪಂದ್ಯದಲ್ಲಿ ಬಾಗನ್‌ ತಂಡ ಪ್ರಮುಖ ಆರು ಮಂದಿ ಆಟಗಾರರ ಅನುಪಸ್ಥಿತಿ ಯಲ್ಲಿ ಕಣಕ್ಕಿಳಿದಿದ್ದರೂ ಕೆಚ್ಚೆದೆಯಿಂದ ಹೋರಾಡಿತ್ತು.
ಗಾಯದ ಕಾರಣ ಮೊದಲ ಪಂದ್ಯಕ್ಕೆ ಅಲಭ್ಯರಾಗಿದ್ದ ಹೈತಿಯ ಫಾರ್ವರ್ಡ್‌ ಆಟಗಾರ ಸೋನಿ ನೋರ್ಡೆ ಪೂರ್ಣ ವಾಗಿ ಗುಣಮುಖರಾಗಿದ್ದು ಮಂಗಳ ವಾರದ ಪಂದ್ಯದಲ್ಲಿ ಕಣಕ್ಕಿಳಿಯಲಿದ್ದಾರೆ. ಹೀಗಾಗಿ ಆತಿಥೇಯರ ಮುಂಚೂಣಿ ವಿಭಾಗದ ಶಕ್ತಿ ಹೆಚ್ಚಿದೆ.
ಗೋಲ್‌ಕೀಪರ್‌ ದೇವಜಿತ್‌ ಮಜುಂ ದಾರ್‌ ಕೂಡ ಆಡುವ ಬಳಗದಲ್ಲಿ ಸ್ಥಾನ ಗಳಿಸಿದ್ದು ಎದುರಾಳಿಗಳ ಗೋಲು ಗಳಿಕೆಯ ಪ್ರಯತ್ನಗಳಿಗೆ ಅಡ್ಡಿಯಾಗುವ ಹುಮ್ಮಸ್ಸಿನಲ್ಲಿದ್ದಾರೆ.
