ಮಾನವ ಸಂವೇದನೆಯಿಂದ ಭೂಮಿ ರಕ್ಷಣೆ

‘ಮನುಷ್ಯರು ಅತಿ ಸುಖ ಬಯಸಿದ ಪರಿಣಾಮ ಪರಿಸರ ತುಳಿಯುವ ಕೆಲಸವಾಗುತ್ತಿದೆ. ನಾಗರಿಕತೆ ಅನಗತ್ಯ ಭೋಗದೆಡೆ ಸಾಗುತ್ತಿದೆ. ಮಾನವನ ಕೊಳ್ಳುಬಾಕ ಸಂಸ್ಕೃತಿ ಉದ್ದೀಪನಗೊಳಿಸಲು ಜಾಗತಿಕ ಶಕ್ತಿಗಳು ನಿರಂತರವಾಗಿ ಪ್ರಯತ್ನಿಸಿ ಬಹುತೇಕ ಯಶ ಕಂಡಿವೆ. ಇದರಿಂದಾಗಿ ದಿನದಿಂದ ದಿನಕ್ಕೆ ಭೂಮಿ ತನ್ನ ಅಸ್ತಿತ್ವ ಹಾಗೂ ಅಸ್ಮಿತೆಯನ್ನು ಕಳೆದುಕೊಂಡು ಬಿಸಿಯುಂಡೆಯಾಗುತ್ತಿದೆ. ವಾಸದ ಕ್ಷೇತ್ರ ದುರಂತದ ಕಡೆ ಸಾಗುತ್ತಿದೆ. ಪರಿಸರ ಪ್ರಜ್ಞೆ ಕಳೆದುಕೊಂಡ ಹೀನ ಮನಸ್ಸು ಹೆಚ್ಚಿದ ಪರಿಣಾಮ ಇಂತಹ ಅವಘಡಗಳು ಹೆಚ್ಚಿವೆ. ವರ್ತಮಾನ ಹಾಗೂ ಭವಿಷ್ಯದ ಪೀಳಿಗೆಯಲ್ಲಿ ಪರಿಸರ ಪ್ರೀತಿ ಬೆಳೆಸುವ ಅಗತ್ಯವಿದೆ’ ಎಂದರು.

‘ಪ್ರಕೃತಿ ವಿಕೋಪಕ್ಕಿಂತ ಮಾನವ ವಿಕೋಪ ಹೆಚ್ಚಿದೆ. ನಾಗರಿಕತೆಯ ಉತ್ತುಂಗಕ್ಕೇರಿದ ಸಮಾಜ ಸಹಸ್ರಾರು ವರ್ಷಗಳ ಹಿಂದಿನ ಮಾನವ ಜೀವನ ವನ್ನು ಹಿಂದೆ ಕೊಂಡೊಯ್ಯುತ್ತಿದ್ದರೂ ನಾವು ಜಾಗೃತರಾಗುತ್ತಿಲ್ಲ. ಮರುಭೂಮಿ ಯಲ್ಲಿ ಹಿಮಪಾತ, ಮರಳು ಬಿರುಗಾಳಿ, ಬೆಂಕಿ ಪ್ರಳಯ, ಸುನಾಮಿ ಹೆಚ್ಚುತ್ತಿದೆ. ಭೂಮಿಗೆ ನಾಜೂಕು ಸ್ಥಿತಿಗೆ ಬಂದಿದೆ. ಉದ್ಯಮ, ಸಂಚಾರ ಹಾಗೂ ಆಹಾರದ ಅನಿವಾರ್ಯತೆಯ ಭ್ರಮೆ ಹತ್ತಿಸಿದ ಸರ್ಕಾರ ಹಾಗೂ ಜಾಗತಿಕ ಶಕ್ತಿಗಳಿಂದ ಪರಿಸರ ನಾಶದ ಅಭಿವೃದ್ಧಿ ಹೆಚ್ಚಾಗು ತ್ತಿದೆ. ಕೈಗಾ, ಸೂಪರ್ ಥರ್ಮಲ್ ಘಟಕಗಳಿಗೆ ಹಣ ಸುರಿಯುವ ಬದಲಾಗಿ ಅದೇ ಹಣವನ್ನು ಜನಸಾಮಾನ್ಯರಿಗೆ ನೀಡಿದ್ದರೆ ಪರಿಸರ ಪೂರಕ ಅಭಿವೃದ್ಧಿಗೆ ನಾಂದಿ ಹಾಡಿದಂತಾಗುತ್ತಿತ್ತು’ ಎಂದರು.

ಪ್ರಪಂಚದಲ್ಲಿ 120ಕ್ಕೂ ಹೆಚ್ಚು ದೇಶಗಳು ಭೂಮಿ ದಿನಾಚರಣೆಯನ್ನು ಆಚರಿಸಿವೆ. ಆದರೆ ಹಲವು ಪರಿಸರ ಸಂಬಂಧಿ ಇಲಾಖೆಗಳು, ಮಂಡಳಿಗಳು ರಾಜ್ಯ ಸರ್ಕಾರದ ವ್ಯಾಪ್ತಿಯಲ್ಲಿವೆ. ಇವುಗಳಿಗೆ ವಿಶ್ವ ಭೂ ದಿನದ ಆಚರಿಸಲು ಸಮಯವಿಲ್ಲದಂತಾಗಿದೆ ಎಂದು ವಿಷಾದ ವ್ಯಕ್ತಪಡಿಸಿದರು. ಗಾಯತ್ರಿ ಬಳಗದ ಪ್ರಮುಖರ ವಿ.ಜಿ. ಗಾಯತ್ರಿ ಮತ್ತು ಗೀತಾ ಅವರು ನಾಗೇಶ ಹೆಗಡೆಯವರ ‘ಭೋಗ ಪ್ರಳಯ ಮತ್ತು ಬಿಸಿಭೂಮಿ’ ಪುಸ್ತಕ ಬಿಡುಗಡೆಗೊಳಿಸಿದರು. ಸಿ.ಎನ್.ಹೆಗಡೆ ಸ್ವಾಗತಿಸಿದರು.