ನವದೆಹಲಿ: ಮನೆ ಖರೀದಿಯ ಮುಂಗಡ ಪಾವತಿಸಲು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯ (ಇಪಿಎಫ್‌ಒ) ಸದಸ್ಯರು ಇನ್ನು ಮುಂದೆ ತಮ್ಮ ಖಾತೆಯಿಂದ ಒಂದು ಬಾರಿಗೆ ಶೇ 90ರಷ್ಟು ಹಣ ಮರಳಿ ಪಡೆಯಬಹುದಾಗಿದೆ.
ಮನೆ ಖರೀದಿಗೆ ಮಾಡುವ ಸಾಲದ ತಿಂಗಳ ಸಮಾನ ಕಂತನ್ನು (ಇಎಂಐ) ಪಿಎಫ್‌ ಖಾತೆಯಿಂದಲೇ ಪಾವತಿಸಲೂ ಅವಕಾಶ ಕಲ್ಪಿಸಲಾಗಿದೆ. ಈ ಸಂಬಂಧ ‘ಇಪಿಎಫ್‌ಒ’ ಅಗತ್ಯ ತಿದ್ದುಪಡಿ ಮಾಡಿದೆ.
ಹೊಸ ಸೌಲಭ್ಯದಡಿ, ಪಿಎಫ್‌ ಚಂದಾದಾರರು ಮನೆ, ಫ್ಲ್ಯಾಟ್‌, ನಿವೇಶನ ಖರೀದಿಸಲು ತಮ್ಮ ಭವಿಷ್ಯ ನಿಧಿ ಖಾತೆಯಲ್ಲಿನ ಮೊತ್ತದ ಶೇ 90ರಷ್ಟು ಹಣವನ್ನು ಬಳಸಿಕೊಳ್ಳಬಹುದು.
ಸರ್ಕಾರ, ಬ್ಯಾಂಕ್‌ ಮತ್ತು ಗೃಹ ಸಾಲ ನೀಡುವ ಪ್ರಮುಖ ಸಂಸ್ಥೆಗಳಿಂದ ಪಡೆದ ಸಾಲದ ‘ಇಎಂಐ’ಗೂ ಪಿಎಫ್‌ ಖಾತೆಯಿಂದಲೇ ಹಣ ಪಾವತಿಸಬಹುದಾಗಿದೆ.
ಈ ಸೌಲಭ್ಯ ಪಡೆಯಲು ಕೆಲ ನಿಬಂಧನೆಗಳಿವೆ. ಕನಿಷ್ಠ ಮೂರು ವರ್ಷಗಳಿಂದ ಚಂದಾದಾರರಾಗಿರಬೇಕು. ಜೀವಮಾನದಲ್ಲಿ ಒಂದು ಬಾರಿ ಮಾತ್ರ ಬಳಸಿಕೊಳ್ಳಬಹುದು.
