ಕುಡಿವ ನೀರಿನ ಕರ: ₹ 83 ಕೋಟಿ ಬಾಕಿ

ಸರಬರಾಜು ಮಾಡಿದ ನೀರಿಗೆ ಸಾರ್ವಜನಿಕರು ಪಾವತಿಸಬೇಕಿರುವ ₹ 83 ಕೋಟಿ  ನೀರಿನ ಕರ ಬಾಕಿ ಉಳಿದಿದೆ. ವರ್ಷದಿಂದ ವರ್ಷಕ್ಕೆ ಬಾಕಿಯ ಪ್ರಮಾಣ ಹೆಚ್ಚುತ್ತಾ ಹೋಗುತ್ತಿದೆ. ವಸೂಲಾತಿ ಅಭಿಯಾನಕ್ಕೆ ಜನರೂ ಸ್ಪಂದಿಸುತ್ತಿಲ್ಲ. ಸಿಬ್ಬಂದಿ ಕೊರತೆಯಿಂದಾಗಿ ಪೂರ್ಣ ಪ್ರಮಾಣದಲ್ಲಿ ಬಾಕಿ ವಸೂಲಿ ಮಾಡಲು ಮಂಡಳಿಗೂ ಸಾಧ್ಯವಾಗುತ್ತಿಲ್ಲ. ಮಹಾನಗರ ಪಾಲಿಕೆಯಿಂದ ಮಂಡಳಿಗೆ ನೀರು ಸರಬರಾಜನ್ನು ವಹಿಸಿಕೊಳ್ಳುವಾಗಲೇ ನೀರಿನ ಕರ ಬಾಕಿ ಉಳಿದಿಕೊಂಡಿತ್ತು.  ಅದು ಇಂದಿಗೂ ಮುಂದುವರಿದಿದೆ.

ದಿನದ 24 ಗಂಟೆ ನೀರು ಸರಬರಾಜು ಮಾಡುವ ಪ್ರದೇಶ ಹೊರತು ಪಡಿಸಿದರೆ, ಉಳಿದ ಪ್ರದೇಶಗಳಿಗೆ ವಾರಕ್ಕೆ ಒಮ್ಮೆ ನೀರು ಸರಬರಾಜು ಮಾಡಲಾಗುತ್ತಿದೆ. ಅದಕ್ಕಾಗಿ ಮಲಪ್ರಭಾದಿಂದ 155 ದಶ ಲಕ್ಷ ಲೀಟರ್‌ ನೀರು ಪಡೆಯಲಾಗುತ್ತಿದೆ. ನೀರ ಸಾಗರ ಒಣಗಿರುವುದರಿಂದ ಅಲ್ಲಿಂದ ಸದ್ಯ ನೀರು ಲಭ್ಯವಾಗುತ್ತಿಲ್ಲ.

ಅವಳಿ ನಗರದಲ್ಲಿ ಒಟ್ಟು 1.35 ಲಕ್ಷ ನಳಗಳಿಗೆ ಸಂಪರ್ಕ ನೀಡಲಾಗಿದೆ. ಅದರಲ್ಲಿ 85 ಸಾವಿರ ಹುಬ್ಬಳ್ಳಿಯಲ್ಲಿ ಇದ್ದರೆ, 50 ಸಾವಿರ ನಳಗಳ ಸಂಪರ್ಕ ಧಾರವಾಡದಲ್ಲಿವೆ. ಸರಿಯಾಗಿ ನೀರು ಸರಬರಾಜು ಮಾಡಲಾಗದ ಕೆಲವು ಪ್ರದೇಶಗಳಿಗೆ ಟ್ಯಾಂಕರ್ ಮೂಲಕ ನೀರು ಸರಬರಾಜು ಮಾಡಲಾಗುತ್ತಿದೆ.

ನೀರು ಸರಬರಾಜು ಮಾಡುವುದರಿಂದ ಪ್ರತಿ ವರ್ಷ ಮಂಡಳಿಗೆ ಕರ ರೂಪದಲ್ಲಿ ₹ 14 ಕೋಟಿ ಸಂಗ್ರಹವಾಗಬೇಕಿದೆ. ಹಿಂದಿನ ವರ್ಷಗಳಲ್ಲಿ ಅಷ್ಟು ವಸೂಲಿ ಆಗಿಲ್ಲ. ಹೀಗಾಗಿ ಬಾಕಿಯ ಮೊತ್ತ ಹೆಚ್ಚಾಗಿದೆ. ಈಗ ಅದಕ್ಕೆ ಬಡ್ಡಿಯೂ ಸೇರಿಕೊಂಡಿದೆ. 2016–17 ಸಾಲಿನಲ್ಲಿ ಹಿಂದಿನ ವರ್ಷದ ಬಾಕಿಯೂ ಸೇರಿ ₹ 20 ಕೋಟಿ ವಸೂಲಿ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ಕಾಯಂ ಸಿಬ್ಬಂದಿಯ ಕೊರತೆಯಿಂದಾಗಿ ಕರ ವಸೂಲಿ ಸಾಧ್ಯವಾಗುತ್ತಿಲ್ಲ. ಗುತ್ತಿಗೆ ನೌಕರರನ್ನು ಬಳಸಿಕೊಂಡೇ ಕರ ವಸೂಲಿ ಮಾಡಲಾಗುತ್ತಿದೆ.

ನೀರು ಸರಬರಾಜು ಮಾಡಲು ಮಂಡಳಿಗೆ ಒಂದು ವರ್ಷಕ್ಕೆ ₹ 18 ಕೋಟಿ ಖರ್ಚಾಗುತ್ತಿದೆ. ಆದರೆ, ಅಷ್ಟು ಪ್ರಮಾಣದಲ್ಲಿ ಆದಾಯ ಬರುತ್ತಿಲ್ಲ. ಬಾಕಿಯೂ ವಸೂಲಾಗದಿರುವುದು ಕೆಲವು ಹೊಸ ಯೋಜನೆಗಳಿಗೆ ಅಡ್ಡಿಯಾಗಿದೆ.

**
ಬಾಕಿ ಉಳಿದಿರುವ ನೀರಿನ ಕರ ವಸೂಲಾತಿ ಎಲ್ಲ ಅಗತ್ಯ ಕ್ರಮಕೈಗೊಳ್ಳಲಾಗುತ್ತಿದೆ. ಕಳೆದ ವರ್ಷ ವಾರ್ಷಿಕ ಬೇಡಿಕೆಯಲ್ಲದೇ ₹ 6 ಕೋಟಿ ಹೆಚ್ಚು ವಸೂಲು ಮಾಡಲಾಗಿದೆ.
-ಎಸ್‌. ಕರಿಯಪ್ಪ, ಕಾರ್ಯ ನಿರ್ವಾಹಕ ಎಂಜಿನಿಯರ್‌