ಎಲ್ಲಿ ಹೋಗುತ್ತಿದೆ ಮಳೆ ನೀರು?

ತುಮಕೂರು: ನಗರದಲ್ಲಿ ಬೀಳುವ ಮಳೆ ನೀರಿನ ಬಗ್ಗೆ ಎಂದಾದರೂ ನಾವು ಯೋಚಿಸಿದ್ದೇವೆಯೇ?  ಎಂಬ ಪ್ರಶ್ನೆಯನ್ನು ಹಲವು ಜಲತಜ್ಞರು ಕೇಳುತ್ತಿದ್ದಾರೆ.
‘ನಗರವು ಸುಮಾರು  48.6 ಚದರ ಕಿಲೋ ಮೀಟರ್‌ ವ್ಯಾಪ್ತಿ ಇದೆ. ಪ್ರತಿ ವರ್ಷ 520 ಮಿಲಿ ಮೀಟರ್‌ ವಾಡಿಕೆ ಮಳೆಯಾದರೂ 1.5 ಟಿಎಂಸಿ ಅಡಿ ನೀರು ಶೇಖರಣೆಯಾಗುತ್ತದೆ. ಈ ನೀರು ಎಲ್ಲಿಗೆ ಹೋಗುತ್ತಿದೆ ಎಂಬುದಕ್ಕೆ ಆಡಳಿತ ಉತ್ತರಿಸಬೇಕು’ ಎನ್ನುತ್ತಾರೆ ನಿವೃತ್ತ ಎಂಜಿನಿಯರ್‌ ರಾಮಚಂದ್ರಯ್ಯ.

‘ಕಟ್ಟಡಗಳು, ಡಾಂಬರ್ ರಸ್ತೆಗಳ ಕಾರಣಕ್ಕೆ ಮಳೆ ನೀರು ಇಂಗುವ ಪ್ರಮಾಣ ಕೂಡ ಕಡಿಮೆ. 0.50 ಟಿಎಂಸಿ ಅಡಿ ನೀರು ವ್ಯರ್ಥವಾದರೂ ಇನ್ನೂ 1 ಟಿಎಂಸಿ ಅಡಿಯಷ್ಟು ಮಳೆ ನೀರನ್ನು ಸಂಗ್ರಹಿಸಬಹುದು. ಇದು  ನಗರದ ಬುಗುಡನಹಳ್ಳಿ, ಹೆಬ್ಬಾಕ ಕೆರೆಯಲ್ಲಿ ಸಂಗ್ರಹವಾಗುವ ನೀರಿನ ಪ್ರಮಾಣಕ್ಕಿಂತ ಹೆಚ್ಚು. ಈ ನೀರನ್ನು ಬಳಸಿಕೊಂಡರೆ ನಗರಕ್ಕೆ ಕುಡಿಯುವ ನೀರನ ಸಮಸ್ಯೆಯೇ ಬಾರದು’ ಎಂದು ವಿವರಿಸಿದರು.

‘ಯಾವಾಗಲೂ ಹೇಮಾವತಿ ನೀರಿನ ಬಗ್ಗೆಯೇ ಮಾತನಾಡುತ್ತೇವೆ. ಮಳೆ ನೀರಿನ ಬಗ್ಗೆ ಈವರೆಗೂ ಒಬ್ಬರೂ ಚರ್ಚೆ ಮಾಡಿಲ್ಲ. ಪಾಲಿಕೆಯೂ ಈ ಸಂಬಂಧ ಮೌನವಾಗಿದೆ. ಜನಪ್ರತಿನಿಧಿಗಳಿಗೆ ಈ ಬಗ್ಗೆ ಅರಿವು ಇದ್ದಂತೆ ಕಾಣುವುದಿಲ್ಲ. ಮಳೆ ನೀರನ್ನು ಸರಿಯಾಗಿ ಸಂಗ್ರಹಿಸಿದರೆ ನಗರಕ್ಕೆ ಕುಡಿಯುವ ನೀರಿಗಾಗಿ ಹೇಮಾವತಿ ನದಿ ನೀರು ಬೇಕಾಗಿಲ್ಲ’ ಎಂದು ಹೇಮಾವತಿ ನಾಲಾ ವಲಯದ ಎಂಜಿನಿಯರ್ ಒಬ್ಬರು ವಿಶ್ಲೇಷಿಸುವರು.

‘ನೂರಾರು ಕಿಲೋ ಮೀಟರ್‌ ದೂರದ ನದಿಗಳಿಂದ ನೀರು ತಂದು ಜನರ ಬಾಯಾರಿಕೆ ನೀಗಿಸುತ್ತೇವೆ ಎಂಬುದನ್ನು ಮೊದಲು ಬಿಡಬೇಕು. ನಮ್ಮೂರಿನಲ್ಲಿ ಬೀಳುವ ಮಳೆ ನೀರಿನ ಹನಿ, ಹನಿಯ ಲೆಕ್ಕ ಮಾಡುವುದು ಕಲಿತರೆ ನೀರಿನ ಸಮಸ್ಯೆಯೇ ಬಾರದು’ ಎಂದು ಅವರು ಹೇಳಿದರು.

‘ಮನೆಗಳಿಗೆ, ವಾಣಿಜ್ಯ ಕಟ್ಟಡಗಳಿಗೆ ಮಳೆ ನೀರು ಸಂಗ್ರಹವನ್ನು ಕಡ್ಡಾಯ ಮಾಡಬೇಕು. ನಗರ ಅತಿವೇಗವಾಗಿ ಬೆಳೆಯುತ್ತಿದೆ. ಜನಸಂಖ್ಯೆ ಹೆಚ್ಚುತ್ತಿದೆ. ಮಳೆ ನೀರನ್ನು ಕುಡಿಯಲು ಆಶ್ರಯಿಸದಿದ್ದರೆ ಸಮಸ್ಯೆ ಕಟ್ಟಿಟ್ಟ ಬುತ್ತಿ’ ಎಂದು ಮಾನವ ಹಕ್ಕುಗಳ ಹೋರಾಟಗಾರ ರಮೇಶ್‌ಬಾಬು ಅಭಿಪ್ರಾಯ ವ್ಯಕ್ತಪಡಿಸುವರು.

‘ಮಳೆ ನೀರು ಚರಂಡಿಗಳಿಗೆ ಸೇರುತ್ತಿದೆ. ಈ ಚರಂಡಿ ನೀರು ಎಲ್ಲಿಗೆ ಹೋಗಿ ತಲುಪುತ್ತಿದೆ ಎಂಬ ಬಗ್ಗೆ ಪಾಲಿಕೆಯಲ್ಲಿ ನೀಲ ನಕ್ಷೆಯೇ ಇಲ್ಲ. ಮಳೆ ನೀರು ವ್ಯರ್ಥವಾಗಿ ಹರಿದು ಹೋಗುತ್ತಿದೆ’ ಎಂದು ಪಾಲಿಕೆಯ ಎಂಜಿನಿಯರೊಬ್ಬರು ಮಾಹಿತಿ ನೀಡುವರು.