ಬಾರದ ಮಳೆ: ಕಳೆಗುಂದಿದ ಕೆರೆಗಳು

ಮಜ್ಜೂರು, ಶೆಟ್ಟಿಕೇರಿ, ಲಕ್ಷ್ಮೇಶ್ವರ, ಬಾಲೆಹೊಸೂರು, ಸೂರಣಗಿ, ಬಸಾ ಪುರ, ರಾಮಗಿರಿ ಸೇರಿ ಇನ್ನಿತರ ಊರು ಗಳಲ್ಲಿನ ದೊಡ್ಡ ದೊಡ್ಡ ಕೆರೆಗಳು ಈಗಲೂ ಖಾಲಿ ಇದ್ದು ಬರದ ಭೀಕರತೆಯನ್ನು ಸಾರುತ್ತಿವೆ. ಕಳೆದ ವರ್ಷವೂ ಸಹ ಮಳೆಕಣ್ಣಾಮುಚ್ಚಾಲೆಯಿಂದಾಗಿ ಕೆರೆಕಟ್ಟೆ ಗಳು ತುಂಬದೆ ಜನತೆ ನೀರಿನ ಬವಣೆ ಅನುಭವಿಸಿದ್ದಾರೆ. ಈ ವರ್ಷವೂ ಸಹ ಅದೇ ಪರಿಸ್ಥಿತಿ ಮುಂದುವರೆದಿದ್ದು ಜನರಲ್ಲಿ ಭಯ ಮೂಡಿಸಿದೆ. ಲಕ್ಷ್ಮೇಶ್ವರ ಸಮೀಪದ ಬಸಾಪುರ ಗ್ರಾಮಸ್ಥರಿಗೆ ಕುಡಿಯುವ ನೀರಿನ ಮೂಲವಾಗಿದ್ದ ಕೆರೆ ಅಂಗಳ ಖಾಲಿ ಇದ್ದು ಗ್ರಾಮಸ್ಥರಲ್ಲಿ ಚಿಂತೆ ಮೂಡಿಸಿದೆ.

‘ಮುಂಗಾರು ಮಳೆಗೆ ನಮ್ಮೂರ ಕೆರಿ ತುಂಬಬೇಕಾಗಿತ್ತು. ಆದರ ಈ ವರ್ಷಾ ಮಳಿ ಆಗಿಲ್ಲ. ಹಿಂಗಾಗಿ ಬ್ಯಾಸಿಗಿಗೆ ಜೀವನಾ ಮಾಡದ ಹೆಂಗಪಾ ಅನ್ನ ಚಿಂತಿ ಈಗ ನಮ್ಮನ್ನ ಕಾಡಾಕತ್ತೈತಿ’ ಎಂದು ಬಸಾಪುರ ಗ್ರಾಮದ ಮಂಜಯ್ಯ ಪೂಜಾರ, ಮಾಂತೇಶ ಜಾವೂರ ಅವರು ಪರಿಸ್ಥಿತಿಯನ್ನು ಬಿಚ್ಚಿಡುತ್ತಾರೆ. ಇದೇ ರೀತಿ ಎಲ್ಲ ಕೆರೆಗಳ ಒಡಲು ಬರಿದಾಗಿದ್ದು ಭವಿಷ್ಯದಲ್ಲಿ ನೀರಿನ ಸಮಸ್ಯೆ ಎದುರಾಗುವ ಮುನ್ಸೂಚನೆ ಗೋಚರಿಸುತ್ತಿದೆ.

ಗ್ರಾಮೀಣ ಪ್ರದೇಶಗಳಲ್ಲಿ ರೈತರು ಜಾನುವಾರುಗಳ ಕುಡಿಯುವ ನೀರಿಗೆ ಕೆರೆಗಳನ್ನೇ ಅವಲಂಬಿಸಿದ್ದಾರೆ. ಆದರೆ ಒಣಗಿ ನಿಂತಿರುವ ಕೆರೆಗಳನ್ನು ಕಂಡಾಗ ಅವರಿಗೆ ಸಂಕಟ ಆಗುತ್ತಿದೆ. ಇಷ್ಟೊತ್ತಿಗೆ ತುಂಬಿದ ಕೆರೆಗಳಲ್ಲಿ ಬಾನಾಡಿಗಳು ಖುಷಿಯಿಂದ ಗೀಳುಡುತ್ತಿದ್ದವು. ಆದರೆ ಒಣ ಕೆರೆಯನ್ನು ಕಂಡು ಅವೂ ಸಹ ಗೋಳಾಡುವಂಥ ಪರಿಸ್ಥಿತಿ ಉದ್ಭವಿಸಿದೆ. ‘ಮುಂದಿನ ದಿನಗಳಲ್ಲಾದರೂ ಉತ್ತಮ ಮಳೆ ಆಗಿ ನಮ್ಮೂರು ತುಂಬೀತು’ ಎಂದು ಜನರು ಮಳೆರಾಯನನ್ನು ಎದುರು ನೋಡುತ್ತಿದ್ದಾರೆ.