ದೇಹಕ್ಕಷ್ಟೇ ಅಲ್ಲ ವ್ಯಾಯಾಮ...

ಡಾನ್ಸ್ ಮಾಡುವುದು ನನಗೆ ತುಂಬಾ ಇಷ್ಟ. ಸಮಯ ಸಿಕ್ಕಾಗಲೆಲ್ಲ ಡಾನ್ಸ್ ಮೊರೆ ಹೋಗುತ್ತೇನೆ. ಇದು ಕೊಬ್ಬು ಕರಗಿಸಲು ಸಹಾಯ ಮಾಡುವುದರ ಜೊತೆಗೆ ಒತ್ತಡವನ್ನು ಕಡಿಮೆ ಮಾಡುತ್ತದೆ. ಮನೆಯಲ್ಲಿಯೇ ಮ್ಯೂಸಿಕ್‌ ಹಾಕಿಕೊಂಡು ನೃತ್ಯ ಮಾಡುವುದರಿಂದ ದೇಹ ಹಗುರಾಗುತ್ತದೆ. ಪ್ರತಿದಿನ ಒಂದು ಗಂಟೆ ಜಿಮ್‌ನಲ್ಲಿ ಕಸರತ್ತು ನಡೆಸುತ್ತೇನೆ. ಜಿಮ್‌ಗೆ ಹೋಗುವುದಕ್ಕಿಂತ ಆಟವಾಡುವುದು ನನಗೆ ಇಷ್ಟ. ಜಿಮ್‌ಗೆ ಹೋಗಲು ಆಗದಿದ್ದಾಗ ಯಾವುದಾದರೂ ಕ್ರೀಡೆಯಲ್ಲಿ ತೊಡಗಿಸಿಕೊಳ್ಳುತ್ತೇನೆ. ಎಷ್ಟೇ ಕೆಲಸವಿದ್ದರೂ, ವ್ಯಾಯಾಮ ಮಾಡುವುದನ್ನು ತಪ್ಪಿಸುವುದಿಲ್ಲ.

ನಾನು ಎಷ್ಟೇ ತಿಂದರೂ ತುಂಬಾ ದಪ್ಪ ಆಗುವುದಿಲ್ಲ. ಹಾಗಾಗಿ ತಿನ್ನುವ ವಿಷಯದಲ್ಲಿ ರಾಜಿ ಮಾಡಿಕೊಂಡಿಲ್ಲ. ಸಮಯಕ್ಕೆ ಸರಿಯಾಗಿ ಇಷ್ಟವಾಗಿದ್ದನ್ನು ತಿನ್ನುತ್ತೇನೆ. ಪ್ರತಿದಿನ ವರ್ಕೌಟ್ ಮಾಡುತ್ತೇನೆ. ಹೀಗಾಗಿ ಹೊಟ್ಟೆ ತುಂಬಾ ತಿಂದರೂ ಸಮಸ್ಯೆಯಿಲ್ಲ. ಚಾಟ್ಸ್‌ ಎಂದರೆ ನನಗೆ ತುಂಬಾ ಇಷ್ಟ. ಮೊದಲು ಸಿಕ್ಕಾಪಟ್ಟೆ ಕೂಲ್ ಡ್ರಿಂಕ್ಸ್‌ ಕುಡಿಯುತ್ತಿದ್ದೆ. ಆದರೆ ಅದು ದೇಹಕ್ಕೆ ಒಳ್ಳೆಯದಲ್ಲ ಎಂಬ ಕಾರಣಕ್ಕೆ ಮೂರು ವರ್ಷಗಳ ಹಿಂದೆ ಬಿಟ್ಟೆ.

ನಾನು ಇಷ್ಟೆಲ್ಲಾ ಕಸರತ್ತು ಮಾಡುವುದು ಸಪೂರವಾಗಬೇಕು ಎಂದಲ್ಲ, ಬದಲಾಗಿ ಆರೋಗ್ಯವಾಗಿರಬೇಕು ಎಂದು. ಹೀಗೆ ದೇಹವನ್ನು ದಂಡಿಸುವುದರಿಂದ ದಿನಪೂರ್ತಿ ಉತ್ಸಾಹದಿಂದಿರುತ್ತೇನೆ. ಇದು ನನ್ನೊಳಗೆ ಸಕಾರಾತ್ಮಕ ಆಲೋಚನೆಗಳು ಮೂಡಲು ನೆರವಾಗುತ್ತದೆ. ಶಿಸ್ತಿನ ಆಹಾರ ಮತ್ತು ಚಟುವಟಿಕೆಯಿಂದ ಕೂಡಿದ ಜೀವನ ಬದುಕಿನ ಪ್ರೀತಿ ಹೆಚ್ಚಿಸುತ್ತದೆ.