ಆಕಾಶಕ್ಕೆ ಆಕಾಶವೇ ತನ್ನ ಮುಖವನ್ನು
ಈಗಷ್ಟೆ ಈ ಒಲೆಯ ಮೇಲಿಡಲಾದ ಗಂಜಿ ಮಡಕೆಯಲ್ಲಿ
ನೋಡಿಕೊಳ್ಳಲಿ...
ಒಲೆಯ ಹಿಂದಿನ ಮಸಿಗೋಡೆ ಕೋರಾ ಬಿಸಿಲಲ್ಲಿ
ಮಿಂದುಕೊಳ್ಳಲಿ...
ಈಳಿಗೆ ಮಣೆ, ಒಗ್ಗರಣೆ ಸವುಟು,
ಅಗುಳಿನ ಅಡ್ಡ ಪಲ್ಲಕ್ಕಿ ಎಳೆವ ಇರುವೆ ಸಾಲು,
ಗಿಳಿಗೂಟಕ್ಕೆ ತೂಗಿರುವ ಪೈರಾಣದ ಜೇಬಲ್ಲಿರುವ
ಮಡಿಸಿದಲ್ಲೆ ಜೀರ್ಣವಾದ ಬೆವರು ಕಾಗದ ಪತ್ರ,
ಬಚ್ಚಲ ಕಟ್ಟೆಯ ಮೇಲಂಟಿರುವ ಸಬಕಾರದ ಬಿಲ್ಲೆ,
ನೆಲದ ಮೇಲೇ ಬಿಟ್ಟ ಅಂಕಲಿಪಿ, ದೇವರಿಗೆಂದು
ಚಬ್ಬೆಯಲ್ಲೆ ನಿರುಪಾಯವಾಗಿ ಅರಳುತ್ತಿರುವ
ದಾಸಾಳದ ಮೊಗ್ಗು...
ಎಲ್ಲವಕೂ ಅಲ್ಲಲ್ಲೆ ಒಂದು ನಗ್ನ ಬಿಡುಗಡೆ...