ಕೋಲ್ಕತ್ತ : ಆಂಧ್ರಪ್ರದೇಶದ ಬದ್ವೆಲ್‌ನಲ್ಲಿ ಸೆಂಚುರಿ ಪ್ಲೇ ಬೋರ್ಡ್‌ (ಇಂಡಿಯಾ) ಕಂಪನಿಯಿಂದ ನಿರ್ಮಿಸಿರುವ ದೇಶದ ಅತಿದೊಡ್ಡ ಪ್ಲೇ ವುಡ್‌ ತಯಾರಿಕಾ ಘಟಕವು ಶನಿವಾರ ಲೋಕಾರ್ಪಣೆಗೊಂಡಿತು.
100 ಎಕರೆ ಪ್ರದೇಶದಲ್ಲಿ ವಿಸ್ತರಿಸಿರುವ ಈ ಘಟಕದಲ್ಲಿ ಕಂಪನಿಯು ಮೊದಲ ಹಂತದಲ್ಲಿ ₹950 ಕೋಟಿ ಹೂಡಿಕೆ ಮಾಡಿದೆ. ಎರಡನೇ ಹಂತದಲ್ಲಿ ₹1 ಸಾವಿರ ಕೋಟಿ ಹೂಡಕೆಗೆ ನಿರ್ಧರಿಸಿದೆ. ಮುಂದಿನ ಐದು ವರ್ಷಗಳಲ್ಲಿ ಪ್ರತ್ಯೇಕ ಹಾಗೂ ಪರೋಕ್ಷವಾಗಿ ಎರಡು ಸಾವಿರ ಜನರಿಗೆ ಉದ್ಯೋಗಾವಕಾಶ ಕಲ್ಪಿಸುವ ಗುರಿ ಹೊಂದಲಾಗಿದೆ ಎಂದು ದೇಶದ ಅತಿದೊಡ್ಡ ಪ್ಲೇ ವುಡ್‌ ತಯಾರಿಕಾ ಕಂಪನಿಯಾಗಿರುವ ಸೆಂಚುರಿ ಪ್ಲೇ ಬೋರ್ಡ್‌ ಹೇಳಿದೆ.
ಮುಖ್ಯಮಂತ್ರಿ ವೈ.ಎಸ್‌. ಜಗನ್‌ ಮೋಹನ್‌ ರೆಡ್ಡಿ ಅವರು ಘಟಕವನ್ನು ಲೋಕಾರ್ಪಣೆಗೊಳಿಸಿದರು. ಈ ವೇಳೆ ಕಂಪನಿಯ ಮುಖ್ಯಸ್ಥ ಸಜ್ಜನ್ಭ ಜಂಕ ಸೇರಿದಂತೆ ಹಿರಿಯ ಅಧಿಕಾರಿಗಳು ಹಾಜರಿದ್ದರು.
‘ಆಂಧ್ರಪ್ರದೇಶದ ಕೈಗಾರಿಕಾ ಭೂಪಟದಲ್ಲಿ ಕಡಪ ಜಿಲ್ಲೆಗೆ ಪ್ರಮುಖ ಸ್ಥಾನವಿದೆ. ಇಲ್ಲಿ ಕೈಗಾರಿಕಾ ಸಂಪನ್ಮೂಲಗಳು ಹೇರಳವಾಗಿವೆ. ಈ ಪ್ರದೇಶದಲ್ಲಿ ಕೃಷಿ–ಕೈಗಾರಿಕಾ ಚಟುವಟಿಕೆಗಳ ಅಭಿವೃದ್ಧಿಗೆ ಸರ್ಕಾರ ಒತ್ತು ನೀಡಿದೆ. ಕಂಪನಿ ಬಂಡವಾಳ ಹೂಡಿರುವುದು ಇತರೇ ಉದ್ದಿಮೆಗಳು ಇಲ್ಲಿ ಬಂಡವಾಳ ಹೂಡಿಕೆಗೆ ಅನುಕೂಲವಾಗಲಿದೆ’ ಎಂದು ಕಂಪನಿಯ ಮುಖ್ಯಸ್ಥ ಸಜ್ಜನ್ ಭಜಂಕ ಹೇಳಿದ್ದಾರೆ.
‘ಈ ಘಟಕವು ಮಧ್ಯಮ ಸಾಂದ್ರತೆಯ ಫೈಬರ್ (ಎಂಡಿಎಫ್‌) ಹಾಗೂ ಪಿವಿಸಿ ಘಟಕಗಳನ್ನು ಒಳಗೊಂಡಿದೆ’ ಎಂದು ತಿಳಿಸಿದ್ದಾರೆ.
ರಾಜ್ಯದಲ್ಲಿ ಪ್ಲೇ ವುಡ್‌ ಕೈಗಾರಿಕೆಗೆ ಉತ್ತೇಜನ ನೀಡುವ ದೃಷ್ಟಿಯಿಂದ ಕಂಪನಿಯ ಕಾರ್ಯ ಚಟುವಟಿಕೆ ವಿಸ್ತರಣೆಗೆ ಸಂಪೂರ್ಣ ಸಹಕಾರ ನೀಡುವುದಾಗಿ ಆಂಧ್ರಪ್ರದೇಶ ಸರ್ಕಾರವೂ ಭರವಸೆ ನೀಡಿದೆ.
