ನವದೆಹಲಿ: ರಾಷ್ಟ್ರೀಯ ಪಾವತಿ ನಿಗಮ ಅಭಿವೃದ್ಧಿಪಡಿಸಿದ ಏಕೀಕೃತ ಪಾವತಿ ವ್ಯವಸ್ಥೆಯನ್ನು (ಯುಪಿಐ) ನೇಪಾಳವು ಅಳವಡಿಸಿಕೊಳ್ಳಲಿದೆ. ಭಾರತದ ನಂತರ ಯುಪಿಐ ಅಳವಡಿಕೆ ಮಾಡಿಕೊಳ್ಳಲಿರುವ ಮೊದಲ ದೇಶ ನೇಪಾಳ.
ಈ ವಿಚಾರವಾಗಿ, ಎನ್‌ಪಿಸಿಐನ ಅಂತರರಾಷ್ಟ್ರೀಯ ವಿಭಾಗವಾಗಿರುವ ಎನ್‌ಪಿಸಿಐ ಇಂಟರ್‌ನ್ಯಾಷನಲ್ ಪೇಮೆಂಟ್ಸ್ ಲಿ. (ಎನ್‌ಐಪಿಎಲ್), ಗೇಟ್‌ವೇ ಪೇಮೆಂಟ್ಸ್ ಸರ್ವಿಸ್ (ಜಿಪಿಎಸ್) ಮತ್ತು ಮನಮ್ ಇನ್ಫೊಟೆಕ್ ಜೊತೆ ಒಪ್ಪಂದ ಮಾಡಿಕೊಂಡಿದೆ.
ಜಿಪಿಎಸ್ ಕಂಪನಿಯು ನೇಪಾಳದಲ್ಲಿ ಪರವಾನಗಿ ಹೊಂದಿರುವ ಪಾವತಿ ಸೇವಾ ಸಂಸ್ಥೆ. ನೇಪಾಳದ ಜನಸಂಖ್ಯೆ ಸುಮಾರು 3 ಕೋಟಿ. ಅಲ್ಲಿ ಶೇಕಡ 45ರಷ್ಟು ಜನ ಬ್ಯಾಂಕ್ ಖಾತೆ ಹೊಂದಿದ್ದಾರೆ. ಜನಸಂಖ್ಯೆಯಲ್ಲಿ ಶೇ 65ರಷ್ಟು ಮಂದಿ ಸ್ಮಾರ್ಟ್‌ಫೋನ್ ಬಳಸುತ್ತಾರೆ. ಇದು ನೇಪಾಳದಲ್ಲಿ ಕೂಡ ಡಿಜಿಟಲ್ ಕ್ರಾಂತಿಯನ್ನು ಸಾಧ್ಯವಾಗಿಲು ನೆಲೆ ಒದಗಿಸುತ್ತದೆ ಎಂದು ಎನ್‌ಪಿಸಿಐ ಹೇಳಿದೆ.
