ಸುರಪುರ: 25 ಸಾವಿರ ಹೆಕ್ಟೇರ್ ಬರ ಪೀಡಿತ

ತಾಲ್ಲೂಕಿನಲ್ಲಿ ಮುಂಗಾರು ಹಂಗಾಮಿಗೆ ನೀರಾವರಿ ಕ್ಷೇತ್ರದಲ್ಲಿ 43,275 ಹೆಕ್ಟೇರ್ ಮತ್ತು ಖುಷ್ಕಿ ಪ್ರದೇಶದಲ್ಲಿ 35,848 ಹೆಕ್ಟೇರ್ ಜಮೀನಿನಲ್ಲಿ ಬಿತ್ತನೆಯಾಗಿತ್ತು ಎಂದು ಕೃಷಿ ಇಲಾಖೆ ಮೂಲಗಳು ತಿಳಿಸಿವೆ. ಅದರಲ್ಲಿ ಭತ್ತ 28,536 ಹೆಕ್ಟೇರ್, ತೊಗರಿ 25,466, ಹತ್ತಿ 23,348, ಸಜ್ಜೆ 1,635 ಹೆಕ್ಟೇರ್‌ನಲ್ಲಿ ಬಿತ್ತನೆ ಮಾಡಲಾಗಿತ್ತು. ಮಳೆ ಅಭಾವದಿಂದ ಸಮರ್ಪಕವಾಗಿ ಬೆಳೆಯದೆ ರೈತರು ನಷ್ಟ ಅನುಭವಿಸುವಂತಾಗಿದೆ.

ಸುರಪುರ ವಲಯದಲ್ಲಿ ಶೇ 31, ಕಕ್ಕೇರಾ ವಲಯದಲ್ಲಿ ಶೇ 30 ಮತ್ತು ಕೆಂಭಾವಿ ವಲಯದಲ್ಲಿ ಶೇ 15 ರಷ್ಟು ಮಳೆ ಕೊರತೆಯಾಗಿದೆ. ಅಲ್ಲದೇ ಮಳೆ ವಾಡಿಕೆಯಂತೆ ಅವಶ್ಯವಿದ್ದ ಸಮಯದಲ್ಲಿ ಬರದೆ ಒಂದೇ ಸಮಯದಲ್ಲಿ ಸುರಿದಿದ್ದು, ಬೆಳೆಗೆ ಪೂರಕವಾಗಲಿಲ್ಲ.

ಖಾನಾಪುರ ಮತ್ತು ಸೂಗೂರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಜಮೀನು ಕಾಲುವೆ ಕೊನೆ ಭಾಗಕ್ಕೆ ಬರುತ್ತವೆ. ನಿರಂತರ ನೀರು ಹರಿಸಿದರೆ ಸಮರ್ಪಕ ನೀರು ಪಡೆದುಕೊಳ್ಳಲು ರೈತರು ಪರದಾಡುತ್ತಾರೆ. ವಾರಬಂದಿ ಮಾಡಿದ್ದರಿಂದ ಈ ಭಾಗದ ಕಾಲುವೆಗೆ ನೀರು ಹರಿಯಲಿಲ್ಲ.

ಹೀಗಾಗಿ ಒಟ್ಟು 25 ಸಾವಿರಕ್ಕೂ ಹೆಚ್ಚು ಹೆಕ್ಟೇರ್‌ನಲ್ಲಿ ಬೆಳೆ ಹಾನಿ ಸಂಭವಿಸಿದೆ. ಕಾಲುವೆಗೆ ನಿರಂತರ ನೀರು ಕೊಡದಿದ್ದರಿಂದ ಭತ್ತವೂ ಹುಲುಸಾಗಿ ಬೆಳೆಯಲಿಲ್ಲ. ಸಾಲದಕ್ಕೆ ಭತ್ತ ಕಟಾವಿನ ಬೆಲೆಯೂ ಹೆಚ್ಚಿದೆ. ಬೆಳೆಗೆ ಒಳ್ಳೆಯ ಬೆಲ ಸಿಗದಿದ್ದರೆ ರೈತನ ಸ್ಥಿತಿ ಚಿಂತಾಜನಕವಾಗುತ್ತದೆ.

ಹಿಂಗಾರು ಬೆಳೆಗೆ ನೀರಿಲ್ಲ

ನೀರಾವರಿ ಸಲಹಾ ಸಮಿತಿ ಹಿಂಗಾರು ಹಂಗಾಮಿಗೆ ನೀರು ಕೊಡುವುದಿಲ್ಲ ಎಂದು ನಿರ್ಧರಿಸಿದೆ. ಮುಂಗಾರು ಮತ್ತು ಹಿಂಗಾರು ಹಂಗಾಮಿನ ಬೆಳೆ ಸೇರಿ ರೈತನಿಗೆ ಅಲ್ಪ ಸ್ವಲ್ಪ ಲಾಭವಾಗುತ್ತಿತ್ತು. ಹಿಂಗಾರು ಬೆಳೆ ಸಾಧ್ಯವಿಲ್ಲದಿದ್ದರಿಂದ ರೈತನಿಗೆ ಸಂಕಷ್ಟವೇ ಗತಿಯಾಗಿದೆ.

ಮಳೆ ಪ್ರಮಾಣ: (ಜೂನ್ 1 ರಿಂದ ನ. 15ರ ವರೆಗೆ)

ವಲಯ ವಾಡಿಕೆಯ ಮಳೆ; ಬಂದ ಮಳೆ

ಸುರಪುರ 643 ಮಿ.ಮೀ; 441 ಮಿ.ಮೀ

ಕಕ್ಕೇರಾ 503 ಮಿ.ಮೀ; 350 ಮಿ.ಮೀ

ಕೆಂಭಾವಿ 516 ಮಿ.ಮೀ; 440 ಮಿ.ಮೀ