ಹೆಸರೇ ಇಲ್ಲದ ಅನಾಮಿಕ ಬಡಾವಣೆ !

ವಿದ್ಯಾನಗರದಿಂದ ಹರಿದು ಬರುವ ತ್ಯಾಜ್ಯ ನೀರು ಮತ್ತು ಮಳೆ ನೀರು ಇಲ್ಲಿರುವ ಮನೆಗಳಿಗೆ ನುಗ್ಗುತ್ತದೆ. ಬಡಾವಣೆಯ ಮುಖ್ಯ ರಸ್ತೆಯ ಒಂದು ಭಾಗದಲ್ಲಿ ಮಾತ್ರ ಚರಂಡಿ ಇದೆ. ಈ ಚರಂಡಿಯಲ್ಲೂ ನೀರು ಸರಾಗವಾಗಿ ಹರಿಯುತ್ತಿಲ್ಲ. ಚರಂಡಿಯಲ್ಲಿ ಕೊಳಚೆ ನೀರು ನಿಲ್ಲುತ್ತಿರುವುದರಿಂದ ದುರ್ವಾಸನೆ ಬೀರುತ್ತಿದೆ. ಇಲಿ, ಹೆಗ್ಗಣ, ಸೊಳ್ಳೆಗಳ ಆವಾಸ ಸ್ಥಾನವಾಗಿದ್ದು, ಸಾಂಕ್ರಾಮಿಕ ರೋಗ ಭೀತಿ ಎದುರಾಗಿದೆ.

‘ಈ ಬಡಾವಣೆಗೊಂದು ಹೆಸರನ್ನು ನಾಮಕರಣ ಮಾಡಿ, ಫಲಕ ಹಾಕಿಸಿ ಎಂದು ಪಾಲಿಕೆ ಸದಸ್ಯರಿಗೆ ಹಲವು ಬಾರಿ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಿಲ್ಲ’ ಎನ್ನುತ್ತಾರೆ ಸ್ಥಳೀಯ ನಿವಾಸಿ ಚನ್ನಪ್ಪ ಗೌಡ.

‘ಬಡಾವಣೆಗೆ 24X7 ನಿರಂತರ ನೀರು ಕೊಡುತ್ತೇವೆ ಎಂದು ಚುನಾವಣೆ ಸಂದರ್ಭದಲ್ಲಿ ಬೊಬ್ಬೆ ಹೊಡೆದ ಕಾರ್ಪೊರೇಟರ್‌, ಈಗ ಎಂಟು ದಿನಕ್ಕೊಮ್ಮೆ ನೀರು ಬಿಡುತ್ತಾರೆ. ವಾರಕ್ಕಾಗುವಷ್ಟು ನೀರನ್ನು ಸಂಗ್ರಹಿಸಿಟ್ಟುಕೊಳ್ಳುವುದು ಕಷ್ಟವಾಗುತ್ತದೆ. ಈ ಬಡಾವಣೆಯ ಸಹವಾಸವೇ ಸಾಕು’ ಎನ್ನುತ್ತಾರೆ ಇಲ್ಲಿಯ ನಿವಾಸಿ ಆಶಾ.

‘ಬಡಾವಣೆಯಲ್ಲಿ ಸುಮಾರು 25 ರಿಂದ 30 ಬೀದಿ ನಾಯಿಗಳು ಇವೆ. ಮಕ್ಕಳು, ಹಿರಿಯರು ರಸ್ತೆಯಲ್ಲಿ ಓಡಾಡುವುದೇ ದುಸ್ತರವಾಗಿದೆ. ಈ ಬಗ್ಗೆ ಪಾಲಿಕೆ ಗಮನ ಹರಿಸಿಲ್ಲ’ ಎಂದು ಸ್ಥಳೀಯರು ದೂರುತ್ತಾರೆ.

‘ಹಳೆಯದಾದ ಈ ಬಡಾವಣೆಗೆ ನಾಮಕರಣ ಮಾಡಬೇಕು, ಚರಂಡಿ ನಿರ್ಮಿಸಬೇಕು, ಸಮರ್ಪಕ ಕುಡಿಯುವ ನೀರು ಪೂರೈಸಬೇಕು’ ಎನ್ನುತ್ತಾರೆ ಹಿರಿಯ ನಿವಾಸಿ ಎ.ಎಸ್‌.ಕುಲಕರ್ಣಿ.

ಈ ಬಡಾವಣೆಗೆ ಹೆಸರಿಲ್ಲ. ದೂರದ ಊರುಗಳಿಂದ ನೆಂಟರು ಬಂದಾಗ ವಿಳಾಸ ಹೇಳಲು ತೋಚದೆ ಪೇಚಾಡಿದ್ದೂ ಇದೆ. ಅಂಚೆ, ಕೊರಿಯರ್‌ನವರು ಫೋನ್ ಮಾಡಿ, ವಿಳಾಸ ತಿಳಿದುಕೊಂಡು ಬರುತ್ತಾರೆ
ಎ.ಎಸ್.ಕುಲಕರ್ಣಿ
ಬಡಾವಣೆ ನಿವಾಸಿ