ಹುಲಿ ಸಂಖ್ಯೆ ಏರಿಕೆ ಕತೆ

2014–18ರ ನಡುವೆ ಭಾರತದಲ್ಲಿ ಹುಲಿಗಳ ಸಂಖ್ಯೆ ಏರುತ್ತಲೇ ಸಾಗಿದೆ. ಹುಲಿ ಗಣತಿ ಆರಂಭಿಸಿದ ಬಳಿಕ ಹಿಂದೆಂದೂ ಏರಿಲ್ಲದ ಗತಿಯಲ್ಲಿ ವ್ಯಾಘ್ರ ಸಂತತಿ ಹೆಚ್ಚಾಗಿದೆ. ಛತ್ತೀಸಗಡ ಮತ್ತು ಮಿಜೋರಾಂನಲ್ಲಿ ಹುಲಿಗಳ ಸಂಖ್ಯೆ ಕಮ್ಮಿಯಾಗಿದೆ, ಒಡಿಶಾದಲ್ಲಿ ಯಾವುದೇ ವ್ಯತ್ಯಾಸ ಆಗಿಲ್ಲ. ಉಳಿದ ಎಲ್ಲ ರಾಜ್ಯಗಳಲ್ಲಿಯೂ ಗಣನೀಯವಾಗಿ ಏರಿಕೆ ಆಗಿದೆ. ಹುಲಿ ಆವಾಸಸ್ಥಾನಗಳನ್ನು ಐದು ವಲಯಗಳಲ್ಲಿ ಗುರುತಿಸಲಾಗಿದೆ. ಈ ಎಲ್ಲ ಐದು ವಲಯಗಳಲ್ಲಿಯೂ ಸಂಖ್ಯೆ ಏರಿದೆ. ಮಧ್ಯ ಭಾರತ ವಲಯವು ಅತಿ ಹೆಚ್ಚಿನ ಏರಿಕೆಗೆ ಸಾಕ್ಷಿಯಾಗಿದೆ.

ಕೆಳಗಿಳಿದ ಕರ್ನಾಟಕ
1995ರಿಂದಲೇ ಮಧ್ಯ ಪ್ರದೇಶವು ‘ಹುಲಿ ರಾಜ್ಯ’ ಎಂಬ ಹಿರಿಮೆಯನ್ನು ಹೊಂದಿತ್ತು. ಆಗ, ಭಾರತದಲ್ಲಿದ್ದ ಹುಲಿಗಳ ಪೈಕಿ ಶೇ 20ರಷ್ಟು ಆ ರಾಜ್ಯದಲ್ಲಿಯೇ ಇದ್ದವು. ಜಗತ್ತಿನ ಒಟ್ಟು ಹುಲಿಗಳಲ್ಲಿ ಶೇ 10ರಷ್ಟು ಅಲ್ಲಿ ಇದ್ದವು. ಆದರೆ, 2011ರಲ್ಲಿ ಚಿತ್ರಣ ಬದಲಾಯಿತು. 2006ರಲ್ಲಿ ಮಧ್ಯ ಪ್ರದೇಶದಲ್ಲಿ 300 ಹುಲಿಗಳಿದ್ದವು. 2011ರ ಗಣತಿಯ ಹೊತ್ತಿಗೆ ಇದು 257ಕ್ಕೆ ಇಳಿದಿತ್ತು. 300 ಹುಲಿಗಳನ್ನು ಹೊಂದಿದ್ದ ಕರ್ನಾಟಕಕ್ಕೆ ಪ್ರತಿಷ್ಠೆಯ ಮೊದಲ ಸ್ಥಾನ ದೊರೆಯಿತು.

2014ರ ಗಣತಿಯಲ್ಲಿಯೂ ಕರ್ನಾಟಕವು ಮೊದಲ ಸ್ಥಾನವನ್ನು ಉಳಿಸಿಕೊಂಡಿತ್ತು. ಆದರೆ, ಈ ಬಾರಿ ಅತ್ಯಲ್ಪ ಅಂತರದಲ್ಲಿ ಈ ಸ್ಥಾನ ಕೈತಪ್ಪಿದೆ.

ಮುಖ್ಯ ಕಾರಣ
ಕರ್ನಾಟಕವು ಮೊದಲ ಸ್ಥಾನವನ್ನು ಕಳೆದು ಕೊಳ್ಳಲಿದೆ ಎಂಬುದು ನಿರೀಕ್ಷಿತವೇ ಆಗಿತ್ತು. ಬಂಡಿಪುರ–ನಾಗರಹೊಳೆ ಹುಲಿ ರಕ್ಷಿತಾರಣ್ಯಗಳಲ್ಲಿ ಹುಲಿಗಳ ಸಂಖ್ಯೆ ಗರಿಷ್ಠ ಮಟ್ಟವನ್ನು ತಲುಪಿದೆ. ಹಾಗಾಗಿ, ಈ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇಲ್ಲ ಎಂದು ತಜ್ಞರು ಹೇಳಿದ್ದರು.