ಒಂದು ದಿನಕ್ಕೆ 34 ಮಂದಿ ಸಾವು: 2023ರ ಅಪಘಾತಗಳ ಮಾಹಿತಿ ನೀಡಿದ ಎಡಿಜಿಪಿ

ಬೆಂಗಳೂರು: '2023ರಲ್ಲಿ ಪ್ರತಿ‌ದಿನ ಅಪಘಾತದಲ್ಲಿ 34 ಮಂದಿ ಮೃತಪಟ್ಟಿದ್ದಾರೆ. ಹಳೇ ವರ್ಷಕ್ಕೆ ಹೋಲಿಸಿದರೆ ಶೇ 5ರಷ್ಟು ಅಪಘಾತಗಳು‌ ಹೆಚ್ಚಾಗಿವೆ' ಎಂದು ಸಂಚಾರ ಮತ್ತು ರಸ್ತೆ ಸುರಕ್ಷತೆ ಎಡಿಜಿಪಿ ಅಲೋಕ್‌ ಕುಮಾರ್ ಮಾಹಿತಿ ನೀಡಿದ್ದಾರೆ.

ಈ ಬಗ್ಗೆ ಎಕ್ಸ್‌ನಲ್ಲಿ‌ ಪೋಸ್ಟ್ ಪ್ರಕಟಿಸಿರುವ‌ ಅವರು, ಅಪಘಾತಗಳ ಅಂಕಿ-ಅಂಶಗಳನ್ನು ಹಂಚಿಕೊಂಡಿದ್ದಾರೆ.

'ನಿರ್ಲಕ್ಷ್ಯದ‌ ಚಾಲನೆ, ಚಾಲನೆ ಕೌಶಲ ಇಲ್ಲದಿದ್ದರೂ ಚಾಲನೆ ಮಾಡಿದ್ದರಿಂದ, ರಸ್ತೆ ಸರಿ ಇಲ್ಲದಿದ್ದರಿಂದ ಸೇರಿದಂತೆ ವಿವಿಧ ಕಾರಣಗಳಿಂದ ಅಪಘಾತಗಳು ಸಂಭವಿಸಿವೆ' ಎಂದಿದ್ದಾರೆ.

2023ರಲ್ಲಿ 43440 ಅಪಘಾತಗಳು ಸಂಭವಿಸಿದ್ದು, 12327 ಮಂದಿ ಮೃತಪಟ್ಟಿದ್ದಾರೆ.