ಇಂಗ್ಲಿಷ್ (60), ಹಿಂದಿ (75), ಗಣಿತ (45), ವಿಜ್ಞಾನ (48), ಸಮಾಜ ವಿಜ್ಞಾನ (45) ಮತ್ತು ಕನ್ನಡ ವಿಷಯದಲ್ಲಿ (30) ಅಂಕ ಪಡೆದ ಮಹಿಮೂದಾ ಕಡಿಮೆ ಅಂಕ ಬಂದಿದ್ದಕ್ಕೆ ಬೇಸರಗೊಂಡಿದ್ದಳು. ಪಾಲಕರು, ವಿದ್ಯಾರ್ಥಿನಿಯ ಶಿಕ್ಷಕರ ಸಲಹೆಯಂತೆ ಉತ್ತರ ಪತ್ರಿಕೆಯ ಛಾಯಾಪ್ರತಿ ತರಿಸಿದ್ದಾರೆ. ಛಾಯಾಪ್ರತಿಯಲ್ಲಿ 75 ಅಂಕ ನಮೂದಿಸಿದ್ದು ಆಂತರಿಕ ಅಂಕ ಸೇರಿಸಿದಲ್ಲಿ ಬಾಲಕಿ ಒಟ್ಟು 100 ಅಂಕ ಪಡೆದಿದ್ದಾಳೆ.
ಉತ್ತರ ಪತ್ರಿಕೆಯ 16 ಪುಟಗಳಲ್ಲಿ ಸರಿ ಉತ್ತರಕ್ಕೆ ಅಂಕ ನೀಡಿದ ಮೌಲ್ಯಮಾಪಕರು ಆಯಾ ಪುಟದ ಕೊನೆಯಲ್ಲಿ ಅಂಕ ಒಟ್ಟುಗೂಡಿಸಿದ್ದಾರೆ.
ಮೌಲ್ಯಮಾಪಕರ ಉಪಯೋಗಕ್ಕೆ ಇರುವ ಮೊದಲ ಪುಟದಲ್ಲಿ ಪ್ರಶ್ನೆಗಳ ಕ್ರಮ ಸಂಖ್ಯೆ ಮುಂದೆ ಕೆಂಪು ಶಾಹಿಯಲ್ಲಿ ಅಂಕ ಹಾಕಿದ್ದು ಕೊನೆ ಸಾಲಿನಲ್ಲಿ ಒಟ್ಟು 13 ಅಂಕದ ಬದಲಿಗೆ 11 ಅಂಕ ಎಂದು ನಮೂದಿಸಿದ್ದಾರೆ. ಒಟ್ಟು 76 ಅಂಕ ಎಂದು ಅಂಕಿ ಹಾಗೂ ಅಕ್ಷರದಲ್ಲಿ ಬರೆದು ಬಳಿಕ ಅದನ್ನು ಹೊಡೆದುಹಾಕಿ 75 ಎಂದು ಸರಿಯಾಗಿ ಒಟ್ಟುಗೂಡಿಸಿದ್ದಾರೆ. ಪ್ರಕಟಿತ ಫಲಿತಾಂಶದಲ್ಲಿ ಬಾಲಕಿಗೆ 30 ಅಂಕ ಮಾತ್ರ ದಕ್ಕಿವೆ.