ನ್ಯೂಯಾರ್ಕ್‌: ಅಮೆರಿಕದಲ್ಲಿ ಶುಕ್ರವಾರ ಭೂಕಂಪನ ಸಂಭವಿಸಿದ್ದು, ಅನೇಕ ಗಗನಚುಂಬಿ ಕಟ್ಟಡಗಳು ಮತ್ತು ಸುತ್ತಮುತ್ತಲಿನ ಉಪನಗರಗಳನ್ನು ಅಲುಗಾಡಿಸಿದೆ. ಭೂಕಂಪನದ ಕೇಂದ್ರ ಬಿಂದು ನ್ಯೂಯಾರ್ಕ್‌ ಮತ್ತು ಫಿಲಾಡೆಲ್ಫಿಯಾ ನಗರಗಳ ಮಧ್ಯದಲ್ಲಿದೆ.
ಘಟನೆಯಿಂದಾಗಿ ಅಪಾರ ಪ್ರಮಾಣದ ನಷ್ಟವೇನು ಸಂಭವಿಸಿಲ್ಲ. ಆದರೆ, ಭೂಕಂಪನದ ಅನುಭವವನ್ನು ಹೊಂದಿರದ ಈ ಪ್ರದೇಶದ ಜನರು ಹೆದರಿಕೆಯಲ್ಲಿ ಕಾಲಕಳೆಯುವಂತಾಗಿದೆ.
‘ನ್ಯೂಜೆರ್ಸಿಯ ವೈಟ್‌ಹೌಸ್‌ ಸ್ಟೇಷನ್‌ ಬಳಿ ಅಥವಾ ನ್ಯೂಯಾರ್ಕ್‌ನಿಂದ ಪಶ್ಚಿಮಕ್ಕೆ 72 ಕಿ.ಮೀ. ಮತ್ತು ಫಿಲಡೆಲ್ಫಿಯಾದಿಂದ ಉತ್ತರಕ್ಕೆ 80 ಕಿ.ಮೀ. ದೂರ ಇರುವ ಸ್ಥಳದಲ್ಲಿ ಶುಕ್ರವಾರ ಬೆಳಿಗ್ಗೆ 4.8 ತೀವ್ರತೆಯ ಭೂಕಂಪನ ಸಂಭವಿಸಿದೆ. 42 ಲಕ್ಷಕ್ಕೂ ಹೆಚ್ಚು ಜನರಿಗೆ ಭೂಕಂಪನದ ಅನುಭವವಾಗಿದೆ’ ಎಂದು ಅಮೆರಿಕದ ಭೌಗೋಳಿಕ ಸರ್ವೇಕ್ಷಣಾ ಸಂಸ್ಥೆ ಹೇಳಿದೆ.
