ಸೋಲ್ (ಯೊನ್ಹ್ಯಾಪ್): ದಕ್ಷಿಣ ಕೊರಿಯ ಮತ್ತು ಅಮೆರಿಕದ ಪಡೆಗಳು 1968- 69ರ ನಡುವೆ ಉತ್ತರ ಕೊರಿಯದ ಒಳನುಸುಳುವಿಕೆಯನ್ನು ತಡೆಯಲು ವಿಷಕಾರಿ ರಾಸಾಯನಿಕ `ಏಜೆಂಟ್ ಆರೆಂಜ್~ ಹಾಗೂ ಸಸ್ಯನಾಶಕವನ್ನು ಕೊರಿಯ ಗಡಿಯ 6,840 ಹೆಕ್ಟೇರ್ಗೂ ಹೆಚ್ಚು ಪ್ರದೇಶದಲ್ಲಿ ತಂದು ಸುರಿದಿದ್ದಾಗಿ ವರದಿಯೊಂದು ಶುಕ್ರವಾರ ತಿಳಿಸಿದೆ.
ದಕ್ಷಿಣ ಕೊರಿಯದ ಆಡಳಿತಾರೂಢ ಗ್ರಾಂಡ್ ನ್ಯಾಷನಲ್ ಪಾರ್ಟಿ ಈ ವರದಿಯನ್ನು ಬಿಡುಗಡೆ ಮಾಡಿದೆ. ಸೋಲ್ನಿಂದ 300 ಕಿ.ಮೀ ದೂರದ ಚಿಲ್ಗಾಕ್ ಎಂಬಲ್ಲಿ 1978ರಲ್ಲಿ ಬೃಹತ್ ಪ್ರಮಾಣದ ವಿಷಕಾರಿ ರಾಸಾಯನಿಕವನ್ನು ಸುರಿಯಲು ತಾವು ನೆರವಾಗಿದ್ದಾಗಿ ಅಮೆರಿಕದ ನಿವೃತ್ತ ಸೈನಿಕರು ಇತ್ತೀಚೆಗೆ ನೀಡಿರುವ ಹೇಳಿಕೆಯ ಬೆನ್ನಲ್ಲೇ ಈ ವರದಿ ಪ್ರಕಟಗೊಂಡಿದೆ.
1960ರ ವಿಯೆಟ್ನಾಂ ಯುದ್ಧದ ಸಂದರ್ಭದಲ್ಲಿ ದಟ್ಟ ಪರ್ಣ ಸಮೂಹವನ್ನು ನಾಶ ಮಾಡಲು ಬಳಸಿದ್ದ `ಏಜೆಂಟ್ ಆರೆಂಜ್~ನ್ನು ಹಿಂದೆ ತಾವು ಬಳಸಿದ್ದಾಗಿ ಎರಡೂ ರಾಷ್ಟ್ರಗಳು ದೃಢಪಡಿಸಿವೆ. `ಏಜೆಂಟ್ ಆರೆಂಜ್~ ಕ್ಯಾನ್ಸರ್, ಹುಟ್ಟುವ ಮಕ್ಕಳಲ್ಲಿ ಅಂಗವೈಕಲ್ಯದಂತಹ ಗಂಭೀರ ಸಮಸ್ಯೆಗಳಿಗೆ ಕಾರಣವಾಗುವ ಶಂಕೆ ಇದೆ.