ಸಂಪಾದಕೀಯ: ಉಪರಾಷ್ಟ್ರಪತಿ ಧನಕರ್ ಮಾತು ಅನಗತ್ಯ ಹಾಗೂ ಅಪಾಯಕಾರಿ

ಉನ್ನತ ಸಾಂವಿಧಾನಿಕ ಹುದ್ದೆಯನ್ನು ಹೊಂದಿರುವ ವ್ಯಕ್ತಿಯಾಗಿ ಧನಕರ್ ಅವರು ಇಂತಹ ಹೇಳಿಕೆ ನೀಡಿದ್ದು ತಪ್ಪು. ಸಂಸತ್ತು ಅನುಮೋದನೆ ನೀಡಿದ ಒಂದು ಕಾನೂನನ್ನು ಸುಪ್ರೀಂ ಕೋರ್ಟ್‌ ಅಸಿಂಧುಗೊಳಿಸಿತು, ‘ಇಂಥ ನಿದರ್ಶನ ಬೇರೆ ಎಲ್ಲಿಯೂ ಇಲ್ಲ’ ಎಂದು ಅವರು ಹೇಳಿದ್ದಾರೆ. ಈ ಮಾತು ಸತ್ಯವಲ್ಲ. ಸಂಸತ್ತು ಅನುಮೋದನೆ ನೀಡಿದ ಯಾವುದೇ ಕಾನೂನನ್ನು ಪರಿಶೀಲಿಸುವ ಜವಾಬ್ದಾರಿ ಹಾಗೂ ಸಾಂವಿಧಾನಿಕ ಅಧಿಕಾರವು ಕೋರ್ಟ್‌ಗೆ ಇದೆ. ಆ ಕಾನೂನು ಎಷ್ಟರಮಟ್ಟಿಗೆ ಸಿಂಧು ಎಂಬುದನ್ನು ನಿಕಷಕ್ಕೆ ಒಳಪಡಿಸುವ ಅಧಿಕಾರವು ನ್ಯಾಯಾಲಯಕ್ಕೆ ಇದೆ. ಸಂಸತ್ತು ಅನುಮೋದನೆ ನೀಡುವ ಕಾನೂನುಗಳನ್ನು ನ್ಯಾಯಾಲಯಗಳು ಅಸಿಂಧುಗೊಳಿಸಬಾರದು, ಏಕೆಂದರೆ ಆ ಕಾನೂನು ಗಳು ಜನರ ಇಚ್ಛೆಯನ್ನು ಬಿಂಬಿಸುತ್ತಿರುತ್ತವೆ ಎಂದು ಧನಕರ್ ಅವರು ಹೇಳುತ್ತಿರುವಂತಿದೆ. ಇಂತಹ ಮಾತುಗಳ ಹಿಂದಿರುವ ಚಿಂತನೆಯು ನ್ಯಾಯಾಂಗ, ಕಾರ್ಯಾಂಗ ಹಾಗೂ ಶಾಸಕಾಂಗದ ಅಧಿಕಾರದ ಗಡಿಗಳನ್ನು ಗುರುತಿಸಿರುವ ವ್ಯವಸ್ಥೆಗೆ ಪೂರಕವಾಗಿ ಇಲ್ಲ. ಕಾರ್ಯಾಂಗ ಕೈಗೊಂಡ ತೀರ್ಮಾನಗಳನ್ನು ಪರಿಶೀಲಿಸುವ ಅಧಿಕಾರ ನ್ಯಾಯಾಂಗಕ್ಕೆ ಇದೆ. ಶಾಸಕಾಂಗ ರೂಪಿಸುವ ಕಾನೂನುಗಳನ್ನು ಪರಾಮರ್ಶಿಸುವ ಅಧಿಕಾರ ನ್ಯಾಯಾಂಗಕ್ಕೆ ಇದೆ. ಶಾಸಕಾಂಗದ ವ್ಯಾಪ್ತಿಗೆ ಸುಪ್ರೀಂ ಕೋರ್ಟ್‌ ಪ್ರವೇಶಿಸಿದೆ ಎಂದು ಧನಕರ್ ಭಾವಿಸಿದ್ದಾರೆ. ಅದರ ಬಗ್ಗೆ ಗಮನಹರಿಸಬೇಕಾದ ಹೊಣೆ ಸಂಸತ್ತಿನ ಮೇಲಿದೆ ಎಂದು ಧನಕರ್ ಅವರು ಹೇಳಿದ್ದಾರೆ. ಬಹಳ ಸೂಕ್ಷ್ಮ ವಿಚಾರವೊಂದಕ್ಕೆ ಸಂಬಂಧಿಸಿದಂತೆ ಧನಕರ್ ಅವರು ತೀವ್ರವಾದ ನಿಲುವನ್ನು ತಾಳಿದ್ದಾರೆ. ಎನ್‌ಜೆಎಸಿ ಕಾಯ್ದೆಯನ್ನು ಸುಪ್ರೀಂ ಕೋರ್ಟ್‌ ಅಸಿಂಧುಗೊಳಿಸಿದಾಗ ಸಂಸತ್ತು ಸಣ್ಣದಾಗಿಯೂ ದನಿ ಎತ್ತಲಿಲ್ಲ ಎನ್ನುವ ಮೂಲಕ ಅವರು ಸಂಸತ್ತಿನ ನಿಲುವಿನ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದಂತಿದೆ. ಧನಕರ್ ಅವರ ಹೊಣೆ ಸದನದ ಕಲಾಪ ಸುಗಮವಾಗಿ ನಡೆಯುವಂತೆ ನೋಡಿಕೊಳ್ಳುವುದು. ಆದರೆ ಅವರು ಆಡುತ್ತಿರುವ ಮಾತುಗಳನ್ನು ಗಮನಿಸಿದರೆ, ಅವರು ಈಗ ಅಲ್ಲಿನ ಅಜೆಂಡಾ ಏನಿರಬೇಕು ಎಂಬುದನ್ನು ತೀರ್ಮಾನಿಸುತ್ತಿರುವಂತಿದೆ.

ಸರ್ಕಾರದ ಕಡೆಯಿಂದ ನಡೆಯುತ್ತಿರುವ ವಾಗ್ದಾಳಿಗಳ ವಿಚಾರವಾಗಿ ಸುಪ್ರೀಂ ಕೋರ್ಟ್‌ ಅತೃಪ್ತಿ ವ್ಯಕ್ತಪಡಿಸಿದೆ. ಮಾತನಾಡುವವರು ಸಂಯಮ ಪ್ರದರ್ಶಿಸಬೇಕೆಂಬ ಸಲಹೆ ನೀಡುವಂತೆ ಅಟಾರ್ನಿ ಜನರಲ್ ಅವರಿಗೆ ಹೇಳಿದೆ. ನ್ಯಾಯಾಂಗದ ನೇಮಕಾತಿಗಳಿಗೆ ಸಂಬಂಧಿಸಿದಂತೆ ಹೊಸ ಕಾನೂನು ರೂಪಿಸುವುದನ್ನು ತಾನು ತಡೆದಿಲ್ಲ ಎಂದೂ ನ್ಯಾಯಾಲಯ ಹೇಳಿದೆ. ಆದರೆ ಹೊಸ ಕಾನೂನು ಜಾರಿಗೆ ಬರುವವರೆಗೂ ಈಗಿರುವ ವ್ಯವಸ್ಥೆ ಜಾರಿಯಲ್ಲಿ ಇರುತ್ತದೆ. ಯಾವುದೇ ವಿಚಾರದ ಸಾಂವಿಧಾನಿಕ ಮಾನ್ಯತೆಯ ವಿಚಾರದಲ್ಲಿ ಅಂತಿಮ ತೀರ್ಮಾನ ಹೇಳುವ ಅಧಿಕಾರ ಇರುವುದು ನ್ಯಾಯಾಲಯಕ್ಕೆ. ಇದು ನಮ್ಮ ವ್ಯವಸ್ಥೆ. ಈ ವ್ಯವಸ್ಥೆಯನ್ನು ಅಲ್ಲಗಳೆವ ರೀತಿಯಲ್ಲಿ ಮಾತನಾಡುವುದು ಅಪಾಯಕಾರಿ.