ಮುಂಬೈ ಚೇ ರಾಜೆ ಜಯಭೇರಿ

ಇಲ್ಲಿನ ಕಂಠೀರವ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದ ಆರಂಭದಲ್ಲೇ ಉಭಯ ತಂಡಗಳು ಬಿರುಸಿನ ಆಟಕ್ಕಿಳಿದವು. ಹರಿಯಾಣ ತಂಡದ ಸತ್ನಾಮ್‌ ಸಿಂಗ್‌ ಪ್ರಥಮ ಕ್ವಾರ್ಟರ್‌ನಲ್ಲಿ ಸೊಗಸಾದ ರೇಡಿಂಗ್‌ ಮೂಲಕ ತಂಡ ಮೇಲುಗೈ ಸಾಧಿಸುವಂತೆ ನೋಡಿಕೊಂಡರು. ಪ್ರಥಮ ಕ್ವಾರ್ಟರ್‌ ಮುಕ್ತಾಯದ ವೇಳೆಗೆ‌ಹರಿಯಾಣ ತಂಡ 17–16ರ ಮುನ್ನಡೆ ಸಾಧಿಸಿತು.

ಬಳಿಕ ಉಭಯ ತಂಡಗಳ ಆಟಗಾರರು ಬಿರುಸಿನ ಆಟಕ್ಕೆ ಒತ್ತು ನೀಡಿದರು. ಎರಡನೇ ಕ್ವಾರ್ಟರ್‌ನಲ್ಲಿ ಮುಂಬೈ ತಂಡದ ಮಹೇಶ್‌. ಎಂ. ರೇಡಿಂಗ್‌ನಲ್ಲಿ ಆಕ್ರಮಣಕಾರಿಯಾಗಿ ಕಂಡುಬಂದರು. ಒಟ್ಟು 18 ಪಾಯಿಂಟ್‌ ಗಳಿಸಿದ ಅವರು, ಮುಗ್ಗರಿಸುವ ಹಂತದಲ್ಲಿದ್ದ ತಂಡವನ್ನು ಮೇಲೆತ್ತಿದರು. ಮೂರನೇ ಕ್ವಾರ್ಟರ್‌ ನಂತರ ಮುಂಬೈ ತಂಡ ಮುನ್ನಡೆಯನ್ನು ಹೆಚ್ಚಿಸುತ್ತಲೇ ಸಾಗಿತು. ಅಂತಿಮವಾಗಿ ಭರ್ಜರಿ ಜಯ ಸಾಧಿಸಿತು.

ಮಹೇಶ್‌ ಅವರಿಗೆ ಪಂದ್ಯದ ಉತ್ತಮ ರೇಡರ್‌ ಹಾಗೂ ಉತ್ತಮ ಆಟಗಾರ ಪ್ರಶಸ್ತಿ ಲಭಿಸಿತು.

ಹರಿಯಾಣ ಪರ ಸತ್ನಾಮ್‌ ಸಿಂಗ್‌ ಒಟ್ಟು 13 ಪಾಯಿಂಟ್‌ ಗಳಿಸಿದರೂ ತಂಡವನ್ನು ಸೋಲಿನಿಂದ ಪಾರು ಮಾಡಲಾಗಲಿಲ್ಲ. ಸಂಘಟಿತವಾಗಿ ಆಡುವಲ್ಲಿ ಹೀರೋಸ್‌ ವಿಫಲವಾಯಿತು.