ಭೀಕರ ಬರ; ನೀರು, ಜಾನುವಾರು ಮೇವಿಗೆ ತತ್ವಾರ

7
ದಿನದಿಂದ ದಿನಕ್ಕೆ ಗ್ರಾಮೀಣ ಪ್ರದೇಶದ ಚಿತ್ರಣ ದುರ್ಬರ; ನಗರ/ಪಟ್ಟಣಗಳಲ್ಲೂ ಎದುರಾಗಲಿದೆ ನೀರಿನ ಹಾಹಾಕಾರ

ಭೀಕರ ಬರ; ನೀರು, ಜಾನುವಾರು ಮೇವಿಗೆ ತತ್ವಾರ

Published:
Updated:
Prajavani

ವಿಜಯಪುರ: ಬರಕ್ಕೂ ವಿಜಯಪುರಕ್ಕೂ ಬಿಡದ ನಂಟು. ಬರ ಎಂಬುದು ಇಲ್ಲಿನ ಜನರಿಗೆ ಸಹಜ ಎನಿಸಿದೆ. ದಶಕದ ಅವಧಿ ಪರಿಗಣಿಸಿದರೆ, ಏಳೆಂಟು ವರ್ಷ ಕ್ಷಾಮ ಎಂಬುದು ಜಿಲ್ಲೆಯನ್ನು ಬೆಂಬಿಡದೆ ಬಾಧಿಸಿದೆ.

ಇದು ಈಚೆಗಿನ ದಶಕಗಳ ಚಿತ್ರಣವಲ್ಲ. ಸ್ವಾತಂತ್ರ್ಯ ಪೂರ್ವದಿಂದಲೂ ತಪ್ಪದ ಹಣೆಬರಹ. ಬ್ರಿಟಿಷರ ಕಾಲದಿಂದಲೂ ಅಂಟಿಕೊಂಡಿರುವ ಶಾಶ್ವತ ಬರಪೀಡಿತ ಪ್ರದೇಶ ಎಂಬ ಹಣೆಪಟ್ಟಿ ಇಂದಿಗೂ ಕಳಚಿಲ್ಲ.

ವಿಜಯಪುರಿಗರ ಪಾಲಿಗೆ 2018 ಭೀಕರ ಬರದ ವರ್ಷ. 1972ರ ಬರದ ಭೀಕರತೆಯನ್ನು ಮೀರಿಸುವ ಚಿತ್ರಣ ಜಿಲ್ಲೆಯಲ್ಲಿ ಗೋಚರವಾಗಿದೆ ಎಂಬುದು ಹಲ ಹಿರಿಯರ ಅನಿಸಿಕೆ. ಬರದ ಕರಾಳತೆ ಇದೀಗ ಮತ್ತಷ್ಟು ಹೆಚ್ಚಿದೆ.

ಬರದ ಹೊಡೆತಕ್ಕೆ ರೈತ ಸಮೂಹ ತತ್ತರ..:

‘ಬರದ ಹೊಡೆತಕ್ಕೆ ತತ್ತರಿಸಿದ್ದೇವೆ. ಜೋಳದ ಬೆಳೆ ಬಾಟಿ ಹಂತದಲ್ಲೇ ಒಣಗಿದೆ. ತೊಗರಿಯೂ ಕೈ ಹಿಡಿಯದಿದ್ದರಿಂದ ಬಿಡಿಗಾಸು ಇಲ್ಲದಾಗಿದೆ. ತಿನ್ನಲು ಜೋಳವೂ ಇಲ್ಲದಂತಾಗಿದೆ. ದನ ಕರುಗಳಿಗೆ ಮೇವು, ನೀರಿನ ಕೊರತೆಯಾಗುತ್ತಿದೆ. ನನ್ನ ಎಮ್ಮಿಗೆ ಹಸಿ ಹುಲ್ಲು ಹಾಕಿದಾಗ ಹೆಚ್ಚು ಹಾಲು ಕೊಡುತ್ತಿತ್ತು. ಈಗ ಸಂಗ್ರಹಿಸಿಟ್ಟಿದ್ದ ಕಣಕಿ ಹಾಕುತ್ತಿರುವುದರಿಂದ ಕಡಿಮೆ ಹಾಲು ಕೊಡುತ್ತಿದೆ’ ಎಂದು ಬಸವನಬಾಗೇವಾಡಿ ತಾಲ್ಲೂಕಿನ ಜಾಯವಾಡಗಿಯ ರೈತ ಚಿದಾನಂದ ಪಾಟೀಲ ಅಲವತ್ತುಕೊಂಡರು.

‘ಸರ್ಕಾರ ಕೊಡುತ್ತಿರುವ ಅಕ್ಕಿಯಿಂದ ನಮ್ಮ ಹೊಟ್ಟೆ ತುಂಬಿಸಿಕೊಳ್ಳುತ್ತೇವೆ. ದನಕರುಗಳ ಹೊಟ್ಟೆ ತುಂಬಿಸುವುದು ಹೇಗೆ ? ಎಂಬ ಚಿಂತೆ ಕಾಡುತ್ತಿದೆ. ಸರ್ಕಾರ ದನಕರುಗಳಿಗೆ ಅಗತ್ಯವಿರುವ ಮೇವು ಒದಗಿಸಲು ಮುಂದಾಗಬೇಕು. ಕೆರೆ, ಬಾಂದಾರಗಳಿಗೆ ನದಿ ನೀರು ತುಂಬಿಸುವ ಮೂಲಕ ನೀರಿನ ವ್ಯವಸ್ಥೆ ಕಲ್ಪಿಸಬೇಕು’ ಎಂದು ಚಿದಾನಂದ ಹೇಳಿದರು.

‘ಲಭ್ಯವಿರುವ ಅಲ್ಪ ನೀರಿನಲ್ಲೇ ಈರುಳ್ಳಿ ಬೆಳೆದಿದ್ದೇನೆ. ಮಾರುಕಟ್ಟೆಯಲ್ಲಿ ಬೆಲೆ ಸಿಗ್ತಿಲ್ಲ. ಸಕಾಲಕ್ಕೆ ಮಾರಾಟ ಮಾಡದಿರುವುದರಿಂದ ಕೊಳೆಯುತ್ತಿವೆ. ಏನ್‌ ಮಾಡ್ಬೇಕ್ ಎಂಬುದೇ ತೋಚದಂತಾಗಿದೆ’ ಎಂದು ಚಿಂತಾಕ್ರಾಂತರಾದರು.

ಕೆಟ್ಟ ಕ್ಷಾಮವಿದು..:

‘ನಮ್‌ ಬದುಕಿನಲ್ಲಿ ಭೀಕರ ಬರ ಕಂಡಂತಾಯ್ತು. 1972ರಲ್ಲಿ ಇದಕ್ಕಿಂತ ಕೆಟ್ಟ ಕ್ಷಾಮ ಕಂಡಿದ್ದೆವು. ಆದ್ರೇ ಆ ಬರದೊಳ್ಗೂ ನಮ್ಗ ಸಾಕಾಗುವಷ್ಟ್ ಬೆಳೆ ಸಿಕ್ಕಿತ್ತು. ಜಾನುವಾರಿಗೆ ಕಣಕಿ ಆಗಿತ್ತು. ಆದ್ರಾ ಈಗ ಒಂದ್ ಹಿಡಿ ಕಣಕಿ ಸಿಗ್ಲಿಲ್ಲ. ಹತ್ತಾರು ಎಕರೆ ಹೊಲದಲ್ಲಿ ರಾಶಿ ಮಾಡ್ದ್ರು ಒಂದ್ ಕಟ್ಟ್‌ ಜೋಳ, ಕಡಲೆ ಸಿಗ್ಲಿಲ್ಲ...’ ಎಂದು ಬಸವನಬಾಗೇವಾಡಿ ತಾಲ್ಲೂಕಿನ ಮನಗೂಳಿಯ ಎಂಬತ್ತರ ಪ್ರಾಯದ ಬಸಪ್ಪ ಪಾಂಡಪ್ಪ ಬದನೂರ ನಿಟ್ಟುಸಿರು ಬಿಟ್ಟರು.

‘ಮನಗೂಳಿ ಸುತ್ತಮುತ್ತ ಎಂಥಹ ಭೀಕರ ಬರ ಬಿದ್ರೂ; ಬೆಳೆ ಸಿಗ್ತಿತ್ತು. ಇಲ್ಲಿನ ಎರೆ ಭೂಮಿ ಉತ್ಕೃಷ್ಟವಾದದ್ದು. ಹಿಂಗಾರಿ ಬಿಜಾಪುರದ ಬಿಳಿಜೋಳ, ಕಡಲೆ ಚಲೋ ಉತ್ಪನ್ನ ಬರ್ತಿತ್ತು. ಆದ್ರೇ ಈ ಬಾರಿ ದನ–ಕರುಗಳಿಗೆ ಕಣಕಿಯೇ ಇಲ್ಲದಂಗಾದ ಕಾಲ ನೋಡ್ದಂಗಾಯ್ತು. ಈ ಹಿಂದೆ ಯಾವಾಗ್ಲೂ ಇಂಥ ಕನಿಷ್ಠ ಕಾಲ ನೋಡಿರಲಿಲ್ಲ’ ಎಂದು ಬದನೂರ ‘ಪ್ರಜಾವಾಣಿ’ ಬಳಿ ಅಲವತ್ತುಕೊಂಡರು.

‘ನಾ ಈ ಹಿಂದೆ ಎಂದೂ ಇಂಥಹ ಬರ ನೋಡಿಲ್ಲ. ಮುಂಗಾರಿ ಕೈ ಕೊಟ್ರೇ, ಹಿಂಗಾರಿಯಾದ್ರೂ ಕೈ ಹಿಡಿತಿತ್ತು. ಹಿಂಗಾರಿ ಕೈ ಜಾರಿದ್ರೇ; ಮುಂಗಾರಿ ಸಿಕ್ತಿತ್ತು. ಆದ್ರೇ ಇದೇ ಮೊದಲ ಬಾರಿಗೆ ಮುಂಗಾರಿ–ಹಿಂಗಾರಿ ಕೈಕೊಟ್ಟಾವೆ. ಮುಂದೇನು ? ಎಂಬುದೇ ಮಸುಕಾಗಿದೆ’ ಎಂದು ದುಂಡಪ್ಪ ಬಸವಗೊಂಡಪ್ಪ ಮುತ್ತಪ್ಪನವರ ಗದ್ಗದಿತರಾದರು.

ಕಡು ಬೇಸಿಗೆಯಲ್ಲಿ ಕಷ್ಟ... ಕಷ್ಟ...

ಜಿಲ್ಲೆಯ ಗ್ರಾಮೀಣ ಪ್ರದೇಶದಲ್ಲಿ ನೀರಿನ ಸಮಸ್ಯೆ ಮಳೆಗಾಲದಲ್ಲೂ ಜೀವಂತವಿತ್ತು. ಚಳಿಗಾಲದಲ್ಲಿ ತೀವ್ರಗೊಂಡಿತ್ತು. ಬೇಸಿಗೆ ಆರಂಭಕ್ಕೂ ಮುನ್ನವೇ ಜಿಲ್ಲಾಡಳಿತ ಟ್ಯಾಂಕರ್‌ ಮೂಲಕ ಕುಡಿಯುವ ನೀರು ಪೂರೈಸುತ್ತಿದೆ. ಸಿಆರ್‌ಎಫ್‌ನ ಮಾರ್ಗಸೂಚಿಯನ್ನೇ ಬದಲಿಸಿ, 90 ದಿನ ಪೂರೈಸಿದ ಗ್ರಾಮಗಳಿಗೂ ಈ ಬಾರಿ ಕುಡಿಯುವ ನೀರನ್ನು ಟ್ಯಾಂಕರ್‌ ಮೂಲಕ ನೀಡಲಾಗುತ್ತಿದೆ.

ಜಿಲ್ಲಾಡಳಿತ ಕುಡಿಯುವ ನೀರಿನ ಸಮಸ್ಯೆ ಪರಿಹಾರಕ್ಕೆ ಕಂಕಣಬದ್ಧವಾಗಿದ್ದರೂ; ದಿನ ಕಳೆದಂತೆ ನೀರಿನ ಬೇಡಿಕೆ, ಹಾಹಾಕಾರ ಗ್ರಾಮೀಣ ಪ್ರದೇಶದಲ್ಲಿ ಉಲ್ಭಣಿಸುತ್ತಿದೆ. ಜಲ ಮೂಲಗಳಿಲ್ಲದೇ ಬಹು ಹಳ್ಳಿ ಕುಡಿಯುವ ನೀರಿನ ಯೋಜನೆ ಸ್ಥಗಿತಗೊಳ್ಳುತ್ತಿವೆ. ಕಡು ಬೇಸಿಗೆ ಏಪ್ರಿಲ್, ಮೇ ತಿಂಗಳಲ್ಲಿ ನೀರಿನ ತ್ರಾಸು ಮತ್ತಷ್ಟು ಹೆಚ್ಚಲಿದೆ.

ಪಟ್ಟಣ, ನಗರದಲ್ಲೂ ಪರಿಸ್ಥಿತಿ ಇದಕ್ಕಿಂತ ಭಿನ್ನವಾಗಿಲ್ಲ. ಈ ಬಾರಿ ಮಾರ್ಚ್‌ನಿಂದಲೇ ನೀರಿನ ಸಮಸ್ಯೆ ಬಾಧಿಸಲಿದೆ. ಶುದ್ಧ ಕುಡಿಯುವ ನೀರಿನ ಘಟಕಗಳು ಹಲವೆಡೆ ಬಂದ್‌ ಆಗುತ್ತಿವೆ. ಕೊಳವೆಬಾವಿಗಳು ಬತ್ತುತ್ತಿರುವುದು ಜಿಲ್ಲಾಡಳಿತಕ್ಕೆ ತಲೆನೋವಾಗಿ ಕಾಡಲಾರಂಭಿಸಿದೆ.

‘ನಮ್ಮೂರಿನಲ್ಲಿ ನೀರಿನ ತ್ರಾಸ್‌ ಭಾಳ ಐತ್ರೀ. ಮುಂಜಾನಿಂದ ಸಂಜಿತನ್ಕ ನೀರಿನ ಹಾದಿ ಕಾಯೋದ ಆಗೇದ್ರೀ. ದೊಡ್ಡ ಬ್ಯಾಸಗಿ ಇನ್ನೂ ಮುಂದೈತ. ಈಗ್ಲೇ ಹಿಂಗಾದ್ರಾ, ಮುಂದ ಇನ್ನೆಂಗ ಎಂಬ ಚಿಂತಿ ಕಾಡಕತೈತಿ’ ಎನ್ನುತ್ತಾರೆ ದೇವರಹಿಪ್ಪರಗಿ ತಾಲ್ಲೂಕಿನ ಕೋರವಾರದ ಕಾಳಮ್ಮ ಹಂದಿಗನೂರ.

‘ಸಿಂದಗಿ ತಾಲ್ಲೂಕಿನ ಹಂದಿಗನೂರ ಗ್ರಾಮ ಬಹು ಹಳ್ಳಿಗಳ ಕುಡಿಯುವ ನೀರಿನ ಯೋಜನೆಯ ವ್ಯಾಪ್ತಿಗೊಳಪಟ್ಟಿದೆ. ಪ್ರಸ್ತುತ ವಾರಕ್ಕೊಮ್ಮೆ ನೀರು ಬರುತ್ತಿದೆ. ಈ ನೀರು ಕುಡಿಯಲು ಯೋಗ್ಯವಾಗಿಲ್ಲ. ನಳದಲ್ಲಿ ರಾಡಿಯೇ ಬರುತ್ತಿದೆ. ನಮ್ಮೂರಿಗ ಇನ್ನೂ ಟ್ಯಾಂಕರ್‌ ನೀರು ಕೊಡ್ತಿಲ್ಲ.

ವಿಧಿಯಿಲ್ಲದೆ ಯಾಡ್‌ ಕಿ.ಮೀ. ದೂರದಲ್ಲಿರೋ ಚಿದಾನಂದ ಮಠದಿಂದ, ಊರ ಹೊರಗಿನ ತೋಟದ ಬಾವಿಗಳ ಬಳಿಗೆ ಎಡತಾಕಿ ನೀರು ಹೊತ್ತು ತರಬೇಕಿದೆ. ನಿತ್ಯವೂ ನೀರಿನ ತ್ರಾಸ್ ತಪ್ಪದಾಗಿದೆ’ ಎಂದು ಗ್ರಾಮದ ಮಡಿವಾಳಪ್ಪ ಹೂಗಾರ ತಿಳಿಸಿದರು.

‘ದಿನ ದುಡ್ಕೊಂಡು ತಿನ್ನೋ ಮಂದಿ ನಾವ್. ಟ್ಯಾಂಕರ್ ನೀರು ದೊಡ್ಡಿಗೆ ಬಂದ್ರೂ ನಮ್ಗ ಪ್ರಯೋಜನವಿಲ್ಲ. ಅವ ಯಾವಾಗ ಬರ್ತಾನೆ ಎಂಬುದೇ ಗೊತ್ತಾಗಲ್ಲ. ವಿಧಿಯಿಲ್ಲದೆ ನಸುಕಿನಲ್ಲೇ ಸೈಕಲ್‌, ಗಾಡೀಲಿ ಮನಿಗ ಎಷ್ಟ್‌ ನೀರ್ ಬೇಕ ಅಷ್ಟ್ ತಂದ್ಕೊಂಡ ಬಳಿಕವೇ ಉಳಿದದ್ದು’ ಎಂದು ವಿಜಯಪುರ ನಗರ ಹೊರ ವಲಯದ ಕಿಲಾರಹಟ್ಟಿ (ಇಟ್ಟಂಗಿಹಾಳ ದೊಡ್ಡಿ)ಯ ಬಾಳು ಕಾಳೆ ತಮ್ಮೂರಿನ ನೀರಿನ ಚಿತ್ರಣ ಹೇಳಿದರು.

ಹಿಡಿ ಮೇವಿಗಾಗಿ...

ಜಿಲ್ಲೆಯ ಗ್ರಾಮೀಣ ಪ್ರದೇಶದಲ್ಲಿ ಜಾನುವಾರು ಮೇವಿನ ಅಭಾವ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಮೇವು ಖರೀದಿಸುವ ಶಕ್ತಿ ಇಲ್ಲದ ರೈತರು ಕಾಸಿಗೆ ಕಡೆಯಾಗಿ ತಮ್ಮ ಜಾನುವಾರು ಮಾರುತ್ತಿರುವ ಚಿತ್ರಣ ಎಲ್ಲೆಡೆ ಕಣ್ಣಿಗೆ ರಾಚುತ್ತಿದೆ.

‘ಎತ್ತು, ಎಮ್ಮೆ ಸಾಕ್ವೀನಿ. ಹೊಲ್ದಲ್ಲಿ ಮೇವಿಲ್ಲವಾಗಿದೆ. ಈ ವರ್ಸ ಬಣವೆಯ ಮಾತೇ ಇಲ್ಲ. ಎಲ್ಲಿ ಕೇಳಿದ್ರೂ ಮೇವು ಸಿಗ್ತಿಲ್ಲ. ನಮ್‌ ಭಾಗದಲ್ಲಿ ಮೇವು ಬ್ಯಾಂಕ್‌ ಅಥವಾ ಗೋ ಶಾಲೆ ಆರಂಭಿಸಿ ಎಂಬ ನಮ್ಮ ಬೇಡಿಕೆಗೆ ಸ್ಪಂದನೆಯೇ ಸಿಗದಾಗಿದೆ’ ಎಂದು ಕಿಲಾರಟ್ಟಿಯ ರೈತ ಸುಕಪ್ಪ ಲಕ್ಷ್ಮಣ ಕರಾತೆ ಬೇಸರ ವ್ಯಕ್ತಪಡಿಸಿದರು.

‘ಎತ್ತು, ಎಮ್ಮೆ, ಆಕಳಿಂದು ಹೆಂಗೋ ನಡೆಯುತ್ತೆ. ಕುರಿ–ಮೇಕೆ ಸಾಕಿದವರ ಕತೆ ಏನ್‌ ಹೇಳ್ಬೇಕ್ರೀ. ನೂರಾರು ಮೈಲಿ ಹೋದ್ರೂ ಮೇವು ಸಿಕ್ತಿಲ್ಲ. ನಮ್ ಕಷ್ಟ ಯಾರೊಬ್ರೂ ಅರ್ಥ ಮಾಡ್ಕೊಳ್ತಿಲ್ಲ’ ಎಂದು ದೊಂಢಿಬಾ ತಾಂಬೆ ಒಡಲಾಳದ ನೋವು ತೋಡಿಕೊಂಡರು.

‘ನಮ್ಮೂರಲ್ಲಿ ದನ–ಕರುಗಳಿಗೆ ಕುಡಿಯಾಕ ನೀರ್ ಸಿಗ್ತಿಲ್ಲ. ತಿನ್ನಾಕ ಮೇವು ಇಲ್ಲದಂಗಾಗೈತಿ. ಹೊರಗಿನಿಂದ ಕವಳಿ ಹುಲ್ಲು ಖರೀದಿ ಮಾಡಿ ತಂದು ಹಾಕ್ತಿದ್ದೇವೆ. ಎಷ್ಟ್‌ ದಿನ ಇದು ಸಾಧ್ಯ. ನಮ್ಮಿಂದ ನೀಗೋವಷ್ಟ್‌ ದಿನ ನಾವ್‌ ಮಾಡ್ತೀವಿ. ಆ ಮೇಲೆ ಆ ಭಗವಂತನಿಚ್ಚ’ ಎಂದು ತಾಳಿಕೋಟೆ ತಾಲ್ಲೂಕಿನ ಗಡಿ ಸೋಮನಾಳ ಗ್ರಾಮದ ರೈತ ಭೀಮನಗೌಡ ಗುರಪ್ಪಗೌಡ ವಡ್ಡೋಡಗಿ ಅಲವತ್ತುಕೊಂಡರು.

‘ನಾಲ್ಕೈದ್‌ ತಿಂಗಳಿಂದ ಕೊಲ್ಹಾರ ಭಾಗದಿಂದ ಕಬ್ಬಿನ ರವದಿ ಕೊಂಡು ತಂದು ದನ ಸಾಕ್ತಿದ್ದೇವೆ. ಇನ್ಮ್ಯಾಲೆ ನಮ್ಮಿಂದ ಆಗದಾಗೈತಿ. ನಮ್ ಭಾಗದಲ್ಲಿ ಅಪಾರ ದನ–ಕರುಗಳಿವೆ. ಇಲ್ಲೊಂದು ಗೋಶಾಲೆ ತೆಗಿರಿ ಅಂದ್ರೂ ಯಾರೊಬ್ರೂ ಕಿವಿಗೆ ಹಾಕ್ಕೊಳದ್ವರಾಗಿದ್ದಾರೆ. ಕೊನೆ ಪಕ್ಷ ಮೇವು ಬ್ಯಾಂಕ್‌ ಸಹ ಮಾಡಿಲ್ಲ. ದಿಕ್ಕೇ ತೋಚದಂಗಾಗೈತಿ’ ಎಂದು ವಿಜಯಪುರ ತಾಲ್ಲೂಕಿನ ಹೊನಗನಹಳ್ಳಿಯ ಅಶೋಕ ಬಗಲಿ, ನಾಗಪ್ಪ ಉಮ್ಮಗೋಳ ಗೋಳಿಟ್ಟರು.

‘11 ಜಾನುವಾರಿವೆ. ಛಟ್ಟಿ ಅಮಾವಾಸ್ಯೆಯಲ್ಲಿ ರೋಣಿಹಾಳ, ಮುಳವಾಡದಿಂದ ಗೊಂಜೋಳದ ಕಣಕಿ ತಂದಿದ್ದೆ. ₹ 3500 ಖರ್ಚಾಗಿತ್ತು. ಇನ್ನೊಂದು ಹದಿನೈದು ದಿನ ಇದಾಗಬಹುದು. ಮತ್ತೆ ಮೇವು ತರೋ ಶಕ್ತಿ ನನ್ನಲ್ಲಿಲ್ಲ. ದನ ಮಾರ್ಬೇಕಾಗಿದೆ. ಹೈನಿಂದಲೇ ನನ್ನ ಸಂಸಾರ ನಡಿತಿತ್ತು. ಮಾರಿದರೆ ನನ್ನ ಬದುಕು ಹೆಂಗೆ. ಮಾರದಿದ್ರೇ ಅವನ್ ಸಾಕೋದು ಹೆಂಗೆ. ಏನೊಂದು ತೋಚದಾಗೈತಿ’ ಎಂದು ಇಟ್ಟಂಗಿಹಾಳ ದೊಡ್ಡಿಯ ಎಸ್‌.ಆರ್‌.ಮಾದರ ಕಣ್ಣೀರಿಟ್ಟರು.

ಎಲುಬಿನ ಹಂದರ...

ಕಿಲಾರಟ್ಟಿಯ ಸಚ್ಚಿದಾನಂದ ಆಶ್ರಮ ಒಂದೂವರೆ ದಶಕದಿಂದ ಗೋಶಾಲೆ ನಡೆಸುತ್ತಿದೆ. ಇಲ್ಲಿ 100ಕ್ಕೂ ಹೆಚ್ಚು ಜಾನುವಾರುಗಳಿದ್ದವು. ಬರದ ಭೀಕರತೆ ತಾಳಲಾರದೆ ಆಶ್ರಮದ ಭಕ್ತರಿಗೆ ಸಾಕಲು 40ಕ್ಕೂ ಹೆಚ್ಚು ಜಾನುವಾರು ನೀಡಿದ್ದಾರೆ. ಮೇವಿಲ್ಲದೆ ಭಕ್ತರು ವಾಪಸ್ ತಂದು ಬಿಡುವುದಾಗಿ ಹೇಳುತ್ತಿರುವುದು ಸಂದಿಗ್ಧತೆ ಸೃಷ್ಟಿಸಿದೆ.

ಇದೀಗ 40 ಜಾನುವಾರುಗಳಿವೆ. ಎಲ್ಲವೂ ಮೂಳೆ–ಚಕ್ಕಳ ಕಾಣುವಂತಿವೆ. ಆಶ್ರಮದಲ್ಲಿ ಒಂದಿಡಿ ಕಣಕಿಯಿಲ್ಲ. ಭಕ್ತರು ನೀಡಿದ್ದನ್ನೇ ಜೋಪಾನವಾಗಿಟ್ಟುಕೊಂಡು ಕೊಂಚ ಹಾಕಲಾಗುತ್ತಿದೆ. ಇನ್ನೊಂದು ವಾರದೊಳಗೆ ಅದೂ ಖಾಲಿಯಾಗಲಿದೆ.

‘ನಿತ್ಯ ಬೆಳಿಗ್ಗೆ 10ಕ್ಕೆ ಎಲ್ಲವನ್ನೂ ಹೊರಗೆ ಮೇಯಲು ಕರೆದೊಯ್ಯಲಾಗುತ್ತದೆ. ಆದರೆ ಎಲ್ಲಿಯೂ ಹಸಿರಿಲ್ಲ. ಮಧ್ಯಾಹ್ನ, ಸಂಜೆ ಭೂತನಾಳ ಕೆರೆಯಲ್ಲಿ ನೀರು ಕುಡಿಸಿಕೊಂಡು ಮರಳಿ ಆಶ್ರಮದ ಗೋ ಶಾಲೆಗೆ ಕರೆ ತರುವೆ. ಎಲ್ಲವಕ್ಕೂ ಒಂದಿಡಿ ಕಣಕಿ ಹಾಕುತ್ತಿದ್ದಂತೆ ಕ್ಷಣಾರ್ಧದಲ್ಲಿ ಖಾಲಿ ಮಾಡುತ್ತವೆ. ನಂತರ ಅಂಬಾ ಎಂದು ಅರಚಲು ಆರಂಭಿಸುತ್ತಿದ್ದಂತೆ ಕರಳು ಕಿತ್ತು ಬಂದಾಂತಾಗುತ್ತದೆ’ ಎಂದು ದನಗಳ ಉಸ್ತುವಾರಿ ನೋಡಿಕೊಳ್ಳುವ ಸಿದ್ದಪ್ಪ ಮಾದರ ಕಣ್ಣೀರಿಟ್ಟರು.

‘ತಿಂಗಳ ಹಿಂದೆ ಸಚಿವರಾದ ಆರ್‌.ವಿ.ದೇಶಪಾಂಡೆ, ಎಂ.ಸಿ.ಮನಗೂಳಿ, ಜಿಲ್ಲಾಡಳಿತವೇ ಇಲ್ಲಿಗೆ ಬಂದಿತ್ತು. ಆಗ ಮೇವು–ನೀರಿಗೆ ಮನವಿ ಮಾಡಿಕೊಂಡಿದ್ದೆವು. ಇದೂವರೆಗೂ ಒಂದಿಡಿ ಕಣಕಿ ನಮಗೆ ಸಿಕ್ಕಿಲ್ಲ. ಸರ್ಕಾರದ ದರದಲ್ಲೇ ಖರೀದಿಸಲು ಊರ ಹಿರಿಯರು ಪಟ್ಟಿ ಎತ್ತಿದ್ದಾರೆ. ಆದರೆ ಖರೀದಿಗೆ ಮೇವು ಲಭ್ಯವಿಲ್ಲ. ಜಾನುವಾರು ಪರಿಸ್ಥಿತಿ ಚಿಂತಾಜನಕವಾಗಿದೆ’ ಎಂದು ಆಶ್ರಮದ ಸಂಜಯಕುಮಾರ ಬಿರಾದಾರ ಸ್ಥಳಕ್ಕೆ ಭೇಟಿ ನೀಡಿದ್ದ ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದರು.

ದೊಡ್ಡ ಜವಾಬ್ದಾರಿ ನಿಭಾಯಿಸಬೇಕಿದೆ; ಮನಗೂಳಿ

ಭೀಕರ ಬರ ಎದುರಿಸಲು ಮುಂದಿನ ನಾಲ್ಕು ತಿಂಗಳು ಜಿಲ್ಲಾಡಳಿತದ ಮೇಲೆ ದೊಡ್ಡ ಜವಾಬ್ದಾರಿಯಿದೆ. ಸಮರೋಪಾದಿ ಕೆಲಸ ಮಾಡಬೇಕಿದೆ. ಕುಡಿಯುವ ನೀರು, ಜಾನುವಾರಿಗೆ ಮೇವು, ಜನರು ಗುಳೆ ಹೋಗುವುದನ್ನು ತಪ್ಪಿಸಲು ಕೂಲಿ ಕೆಲಸ ಕೊಡುವುದು ನಮ್ಮ ಕರ್ತವ್ಯ.

ಕೂಲಿ ಕೆಲಸ ಹೆಚ್ಚಿಸಬೇಕಿದೆ. ತುರ್ತು ನಿರ್ವಹಣೆಗೆ ಜಿಲ್ಲಾಧಿಕಾರಿ, ತಹಶೀಲ್ದಾರ್‌ಗಳ ಖಾತೆಯಲ್ಲಿ ₨ 4 ಕೋಟಿ ಹಣವಿದೆ. ಅನುದಾನದ ಕೊರತೆಯಿಲ್ಲ. ಅಧಿಕಾರಿ ವರ್ಗ ಮಾನವೀಯತೆಯಿಂದ ಕೆಲಸ ಮಾಡಬೇಕಿದೆಯಷ್ಟೇ.

ಜಿಲ್ಲಾಡಳಿತ ಉಸ್ತುವಾರಿ ಸಚಿವರಿಗೆ ಸ್ಪಂದಿಸುತ್ತಿಲ್ಲ ಎಂಬುದು ಪೂರ್ತಿ ಸತ್ಯವಲ್ಲದಿದ್ದರೂ; ಕೆಲ ಅಧಿಕಾರಿಗಳಿಂದ ನಕಾರಾತ್ಮಕ ಪ್ರತಿಕ್ರಿಯೆಯಿದೆ. ಬರಗಾಲ ಅಧ್ಯಯನ ಸಮಿತಿ ಸದಸ್ಯನಾಗಿ ಪ್ರವಾಸ ನಡೆಸಿ, ಹಲ ಸೂಚನೆ ನೀಡಿರುವೆ. ಸರ್ಕಾರಕ್ಕೆ ವರದಿಯನ್ನು ಕೊಟ್ಟಿರುವೆ.

–ಎಂ.ಸಿ.ಮನಗೂಳಿ, ಜಿಲ್ಲಾ ಉಸ್ತುವಾರಿ ಸಚಿವ

**

ಸಮಸ್ಯೆಗೆ ಸ್ಪಂದನೆ; ಜಿಲ್ಲಾಧಿಕಾರಿ

ಬರ ನಿಭಾಯಿಸಲಿಕ್ಕಾಗಿಯೇ ಪ್ರತಿ ಶನಿವಾರ ತಹಶೀಲ್ದಾರ್‌ಗಳು, ತಾಲ್ಲೂಕು ಪಂಚಾಯ್ತಿ ಕಾರ್ಯ ನಿರ್ವಹಣಾಧಿಕಾರಿಗಳು, ಗ್ರಾಮೀಣ ಕುಡಿಯುವ ನೀರು ಸರಬರಾಜು ವಿಭಾಗದ ಅಧಿಕಾರಿಗಳ ಜತೆ ವಿಡಿಯೊ ಕಾನ್ಫರೆನ್ಸ್‌ ಮೂಲಕ ಸಭೆ ನಡೆಸುತ್ತಿದ್ದೇವೆ.

ಸಮಸ್ಯೆಯ ದೂರು ಕೇಳಿ ಬಂದ ಊರಿಗೆ ತ್ವರಿತಗತಿಯಲ್ಲಿ ನೀರು ಪೂರೈಸಲು ಟ್ಯಾಂಕರ್‌ಗೆ ಅನುಮತಿ ನೀಡುತ್ತಿದ್ದೇವೆ. ಖಾಸಗಿ ಕೊಳವೆಬಾವಿ ಗುರುತಿಸಲಾಗಿದೆ. ಅಗತ್ಯ ಬಿದ್ದರೆ ನೀರಿನ ಇಳುವರಿಗೆ ಅನುಸಾರವಾಗಿ ಬಾಡಿಗೆಗೆ ಪಡೆದು ನೀರು ಪೂರೈಸುತ್ತೇವೆ.

ಖಾಸಗಿ ಗೋಶಾಲೆಗಳಿಂದ ಉಚಿತವಾಗಿ ಮೇವು ಪೂರೈಸುವಂತೆ ಬೇಡಿಕೆ ಬಂದಿದೆ. ಈ ಸಂಬಂಧ ಸರ್ಕಾರಕ್ಕೆ ಪತ್ರ ಬರೆದಿದ್ದೇವೆ. ಉತ್ತರ ಬಂದಿಲ್ಲ. ಸೂಚನೆ ಪಾಲಿಸಲಾಗುವುದು. ಮುಂಗಾರು ಪರಿಹಾರ ಬಿಡುಗಡೆಗೊಂಡಿದೆ. ರೈತರ ಖಾತೆಗೆ ಜಮೆ ಮಾಡಲಿದ್ದೇವೆ. ಹಿಂಗಾರು ಪರಿಹಾರಕ್ಕಾಗಿ ಪ್ರಸ್ತಾವನೆ ಸಲ್ಲಿಸಲಾಗಿದೆ.

–ಸಂಜಯ ಬಿ.ಶೆಟ್ಟೆಣ್ಣವರ, ಜಿಲ್ಲಾಧಿಕಾರಿ

**

ಪ್ರಸ್ತಾವನೆ ಸಲ್ಲಿಕೆ; ಸಿಇಒ

ಜಿಲ್ಲೆಯ ಜನರು ಗುಳೆ ಹೋಗದಂತೆ ನರೇಗಾ ಯೋಜನೆಯಡಿ ಮಾನವ ದಿನಗಳನ್ನು ಹೆಚ್ಚು ಸೃಷ್ಟಿಸಲಾಗಿದೆ. ಕೆಲಸ ಕೇಳಿದ ಎಲ್ಲರಿಗೂ ಕೊಡಲಾಗುತ್ತಿದೆ. ಪ್ರತಿ ಗ್ರಾಮ ಪಂಚಾಯ್ತಿಯ ಪಿಡಿಒಗಳಿಗೆ ಇದರ ಜವಾಬ್ದಾರಿ ನೀಡಲಾಗಿದೆ. ಜಮೀನು, ಶಾಲೆಗಳಲ್ಲಿ ಅಭಿವೃದ್ಧಿ ಕಾಮಗಾರಿ ನಡೆಸಲಾಗುವುದು.

ಎಲ್ಲಿಯೂ ಜಾನುವಾರು ಮೇವು, ನೀರಿಗೆ ಕೊರತೆಯಾಗದಂತೆ ಕ್ರಮ ತೆಗೆದುಕೊಳ್ಳಲಾಗಿದೆ. ಕುಡಿಯುವ ನೀರಿನ ಸಮಸ್ಯೆ ಎದುರಿಸುತ್ತಿರುವ ಹಳ್ಳಿ, ಪಟ್ಟಣಗಳಿಗೆ ಟ್ಯಾಂಕರ್ ಮೂಲಕ ನೀರು ಪೂರೈಸಲಾಗುತ್ತಿದೆ. ಖಾಸಗಿ ಕೊಳವೆಬಾವಿಗಳನ್ನು ಈಗಾಗಲೇ ಗುರುತಿಸಿದ್ದು, ಅಗತ್ಯವಿದ್ದೆಡೆ ಮಾಸಿಕ ಬಾಡಿಗೆ ಆಧಾರದಲ್ಲಿ ಪಡೆಯಲು ಎಲ್ಲ ಸಿದ್ಧತೆ ನಡೆಸಿಕೊಂಡಿದ್ದೇವೆ.

ಮುಂಗಾರು ಬೆಳೆ ನಷ್ಟದ ಪರಿಹಾರ ಬಂದಿದೆ. ಹಿಂಗಾರು ಸಮೀಕ್ಷೆ ಪೂರ್ಣಗೊಂಡಿದೆ. ತೋಟಗಾರಿಕೆ ಬೆಳೆಗಳ ಉಳಿಸಿಕೊಳ್ಳಲು ಅನುದಾನ ಒದಗಿಸುವಂತೆ ರಾಜ್ಯ ಸರ್ಕಾರಕ್ಕೆ ವಿಶೇಷ ಪ್ರಸ್ತಾವನೆಯೊಂದನ್ನು ಕಳುಹಿಸಿಕೊಡಲಾಗಿದೆ.

–ವಿಕಾಸ್‌ ಕಿಶೋರ್ ಸುರಳ್‌ಕರ್‌, ಜಿಲ್ಲಾ ಪಂಚಾಯ್ತಿ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ

 

**

ವಿಜಯಪುರ ಜಿಲ್ಲೆಯ ಕುಡಿಯುವ ನೀರು, ಮೇವಿನ ಚಿತ್ರಣ

622 ಗ್ರಾಮಗಳು ವಿಜಯಪುರ ಜಿಲ್ಲೆಯ ವ್ಯಾಪ್ತಿಯಲ್ಲಿ

75 ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ

327 ಟ್ಯಾಂಕರ್‌ಗಳ ಮೂಲಕ ಕುಡಿಯುವ ನೀರು ಪೂರೈಕೆ

940 ಟ್ಯಾಂಕರ್ ನಿತ್ಯ ಕುಡಿಯುವ ನೀರು ಪೂರೈಕೆ

4,09,614 ಮೇವು ಆಧಾರಿತ ಜಾನುವಾರು ಜಿಲ್ಲೆಯಲ್ಲಿ

2,39,709 ಮೆಟ್ರಿಕ್‌ ಟನ್‌ ಮೇವು ಲಭ್ಯ

18 ವಾರಗಳಿಗೆ ಅಗತ್ಯವಿರುವಷ್ಟು ಮೇವು ಸಂಗ್ರಹ

6 ಗ್ರಾಮಗಳಲ್ಲಿ ಮೇವು ನಿಧಿ ಬ್ಯಾಂಕ್ ಸಂಗ್ರಹ

27.452 ಮೆಟ್ರಿಕ್‌ ಟನ್‌ ಮೇವು ‘ಮೇವು ನಿಧಿ’ಗಳಲ್ಲಿ ಸಂಗ್ರಹ

11 ಗ್ರಾಮಗಳಲ್ಲಿ ಮೇವು ಬ್ಯಾಂಕ್‌ ಆರಂಭ

₹ 10.60 ಕೋಟಿ ಬರ ನಿರ್ವಹಣೆಗೆ ಬಿಡುಗಡೆ

₹ 62 ಲಕ್ಷ ಜಿಲ್ಲಾಧಿಕಾರಿ ಖಾತೆಯಲ್ಲಿ

₹ 3.85 ಕೋಟಿ ತಹಶೀಲ್ದಾರ್‌ಗಳ ಖಾತೆಯಲ್ಲಿ

ಆಧಾರ: ವಿಜಯಪುರ ಜಿಲ್ಲಾಡಳಿತ

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !