ಹುಲ್ಲುಗಾವಲುಗಳಲ್ಲೂ ಬಗೆಗಳು ಇವೆಯೇ?
ಋತುಮಾನಕ್ಕೆ ಅನುಗುಣವಾಗಿ ಬಗೆಗಳು ಇವೆ. ಸುಡುಬೇಸಿಗೆಯ ಹುಲ್ಲುಗಾವಲು, ಕೊರೆವ ಚಳಿಗಾಲದ ಹುಲ್ಲುಗಾವಲು ಹೀಗೆ. ಇವನ್ನು `ತಾಪಮಾನದ ಹುಲ್ಲುಗಾವಲುಗಳು' ಎನ್ನುತ್ತಾರೆ. ಮೂರು ವಿಧದ ಹುಲ್ಲು ಇಲ್ಲಿ ಬೆಳೆಯುತ್ತದೆ: ಗಿಡ್ಡ, ಮಧ್ಯಮ ಉದ್ದ, ಅತಿ ಉದ್ದ. ಉಷ್ಣಾಂಶ ಹೆಚ್ಚು ಇರುವ ಪ್ರದೇಶಗಳಲ್ಲಿ ಬೆಳೆಯುವ ಹುಲ್ಲುಗಾವಲುಗಳಿಗೆ `ಸವನ್ನಾಗಳು' ಎನ್ನುತ್ತಾರೆ. ಅಲ್ಲಲ್ಲಿ ಬೆಳೆದ ಮರಗಳ ನಡುವೆ ಹುಲ್ಲಿನ ಪೊದೆಗಳಿರುತ್ತವೆ.
ವಿಶ್ವದಾದ್ಯಂತ ಹುಲ್ಲು ಬೆಳೆದ ಭೂಮಿಗೆ ಹುಲ್ಲುಗಾವಲು ಎಂದೇ ಕರೆಯುವರೇ?
ವಿಶ್ವದ ವಿವಿಧ ಭಾಗಗಳಲ್ಲಿ ಅದನ್ನು ಭಿನ್ನ ಹೆಸರುಗಳಿಂದ ಕರೆಯುತ್ತಾರೆ. ಯುರೇಷಿಯಾದ ಹುಲ್ಲುಗಾವಲನ್ನು `ಸ್ಟೆಪ್ಪೆ' ಎಂದು ಕರೆದರೆ, ಉತ್ತರ ಅಮೆರಿಕದವರ ಬಾಯಲ್ಲಿ ಅದು `ಪ್ರೇರೀ'. ದಕ್ಷಿಣ ಅಮೆರಿಕದವರು ಹುಲ್ಲುಗಾವಲನ್ನು `ಪಾಂಪಾ' ಎಂದರೆ, ದಕ್ಷಿಣ ಆಫ್ರಿಕಾದವರು `ವೆಲ್ಡ್' ಎನ್ನುತ್ತಾರೆ. ಭಾರತದಲ್ಲಿ `ಬುಘಿಯಲ್', `ಚೌರ್', `ಮಾರ್ಗ್' ಎಂದು ಕರೆಯುತ್ತಾರೆ.