ಕೊಳ್ಳುವ ಮೊದಲು ಕೊಂದ ಕತೆ ಕೇಳಿ ಸ್ವಾಮೀ ಬೇಟೆ ಓಡಿದಷ್ಟೂ ಹಲ್ಲುಹತ್ತಿದ ಅವರು ದವಡೆಗೆ ಕಾವು ಬರಲೆಂದು ರಕ್ತ ಕುಡಿದು ಅಮಲುಗಣ್ಣಲ್ಲಿ ಚಿತ್ತಾದರು ಬೇಟೆಯ ನಾಟಿ ಕೊಂದು ತಿಂದು ನಿಮಗೂ ಉಳಿಸಿ ಹೋದರು!
ಕೈಗೆಟುಕುವಂತಿದೆ ಮಾಲು ಬೇಯಿಸಬಹುದು ಹಾಗೇ ರಸ್ತೆ ಬದಿಗೇ ಅರೆಬೆಂದ ಕೈ ಹೊರಗೇ ಇದೆ ಏನೋ ಅಹವಾಲು ಹೇಳುವಂತಿದೆ ನೀವು ತಲೆಕೆಡಿಸಿಕೊಳ್ಳಬೇಡಿ ಸ್ವಾಮೀ ರಾಜಕೀಯ ಬಾಯಾಡಿಸುತ್ತ ಚಪ್ಪರಿಸಿ ತಿನ್ನಿ
ಅಂದು ಉನ್ನಾವೋದಲ್ಲಿ ಉಂಡು ತೇಗಿ ಹೂಸುಬಿಟ್ಟು ಪಾರಾದ ಮೇಲೂ ಸತ್ತವಳ ಮತ್ತೇಕೆ ಸುಟ್ಟಿರಿ ಸ್ವಾಮೀ ಕೊಂದ ಪಾಪ ತಿಂದು ತೀರಿಸಲೆಂದಾ? ಘನ ಸಂಸ್ಕೃತಿವಂತರು ನೀವು ಶಾಸ್ತ್ರೋಕ್ತವಾಗಿಯೇ ಎಲ್ಲ ಮಾಡಿದಿರಿ
ಎಲ್ಲಿ ಹೋದಿರಿ ಸ್ವಾಮೀ ಉರಿ ಹಚ್ಚಿ? ಅದು ಸರಿಯಾಗಿ ಬೆಂದಿದೆಯಾ ನೋಡಿ! ಇಲ್ಲಿ ಬಿಸಿಬಿಸಿ ಚರ್ಚೆಶುರುವಾಗಿದೆ ತಟ್ಟೆಮುಂದೆ ಅದು ತೊಡೆಮಾಂಸವಾ ಬದನೆಕಾಯಿಯಾ ಎಂದು.... ಬೆಂದ ಮಾಂಸದ ಜಾತಿ ಹುಡುಕಿ ಹೇಳಿ ಸ್ವಾಮೀ ಇಲ್ಲವಾದರೆ ರುಚಿಸುವುದಿಲ್ಲ ನಮಗೆ ನೋಡಿ!
ಸಿದ್ಧಾಂತಗಳ ಕಟ್ಟಬೇಕಿದೆ ನಾವು ಡೈನಿಂಗ್ ಟೇಬಲ್ಲಿನ ಮೇಲೆ ವಿಜೃಂಭಿಸಬೇಕಿದೆ ಮುಖ ಹೊತ್ತಗೆಗಳಲ್ಲಿ
ಗರ್ಭದ ಮಣ್ಣಲ್ಲಿ ನೆಟ್ಟು ಬೆಳೆಸಿ ರಕ್ತ ಬಸಿದು ಮಾಂಸವೂಡಿ ಕರುಳಬಳ್ಳಿಯ ಕೊಳವೆಯಲ್ಲುಸಿರು ಊದಿ ಪ್ರಾಣದಿಂದ ಪ್ರಾಣಾಗ್ನಿಯ ಹೊತ್ತಿಸಿ ಹೆತ್ತತಾಯಿ ಮರುಗುತ್ತಿದ್ದಾಳೆ ಒಳಗೆ ಹುಟ್ಟಬಾರದು ಹೆಣ್ಣುಜಾತಿಯೊಳಗೆ...