ಲಂಡನ್‌ (ಪಿಟಿಐ): ಜಗತ್ತಿನ ಅತ್ಯಂತ ದೊಡ್ಡ ವಿಷಕಾರಿ ಹಾವು ‘ಕಾಳಿಂಗ ಸರ್ಪ’ದ ಸಂಪೂರ್ಣ ತಳಿ ನಕ್ಷೆ
ಯನ್ನು ವಿಜ್ಞಾನಿಗಳು ಯಶಸ್ವಿಯಾಗಿ ಸಿದ್ಧಪಡಿಸಿದ್ದಾರೆ.
ಇದರೊಂದಿಗೆ ಕಾರ್ಕೋಟಕ ವಿಷದ ಹಿಂದಿನ ರಹಸ್ಯಗಳನ್ನು ಭೇದಿಸಿರುವುದಾಗಿ ಲಿವರ್‌ಪೂಲ್‌ ಸ್ಕೂಲ್‌
ಆಫ್‌ ಟ್ರಾಪಿಕಲ್‌ ಮೆಡಿಸಿನ್‌ನ ಸಂಶೋಧಕರು ಹೇಳಿದ್ದಾರೆ.
ಇದೇ ವೇಳೆ ತಜ್ಞರು, ಬರ್ಮೀಸ್‌ ಹೆಬ್ಬಾವಿನ ವಂಶವಾಹಿ ನಕ್ಷೆಯನ್ನೂ ಸಿದ್ಧಪಡಿಸಿ, ಅದನ್ನು ಕಾಳಿಂಗ ಸರ್ಪದ ವಂಶವಾಹಿ ನಕ್ಷೆಯೊಂದಿಗೆ ಹೋಲಿಸಿ ಅಧ್ಯಯನ ನಡೆಸಿದ್ದಾರೆ. ಈ ತಳಿ ನಕ್ಷೆಗಳು ಪ್ರಪಂಚದಲ್ಲಿ ಮೊತ್ತಮೊದಲ ಬಾರಿಗೆ ಸಿದ್ಧಗೊಂಡಿರುವ ಹಾವಿನ ತಳಿ ನಕ್ಷೆಗಳಾಗಿವೆ.
ಈ ನಕ್ಷೆಗಳಿಂದಾಗಿ ಹಾವುಗಳಲ್ಲಿನ ವಿಷ ವ್ಯವಸ್ಥೆಯ ವಿಕಾಸ ಹಾಗೂ ಬದಲಾದ ಪರಿಸ್ಥಿತಿಗೆ ಅವು ಹೊಂದಿಕೊಂಡ ರೀತಿಯ ಬಗ್ಗೆ ಹೆಚ್ಚಿನ ಸಂಗತಿಗಳನ್ನು ಅರಿಯಲು ಸಾಧ್ಯವಾಗುತ್ತದೆ. ವಿಷಕಾರಿ ಹಾವುಗಳು ಹಾಗೂ ಅವುಗಳ ‘ಬೇಟೆ’ಗಳ ನಡುವಿನ ಹೋರಾಟ ಪ್ರಕ್ರಿಯೆಗೆ ಪ್ರತಿಕ್ರಿಯಾತ್ಮಕವಾಗಿ ವಿಷ ವ್ಯವಸ್ಥೆ ಬೆಳೆದಿರುವ ಸಾಧ್ಯತೆ ಇದೆ ಎಂಬುದು ವಿಜ್ಞಾನಿಗಳ ವಿವರಣೆ.
ಈ ಹಾವುಗಳ ವಿಷಗಳು ಹಲವಾರು ಪ್ರಭೇದ ಮೂಲಗಳ ಸಂಕೀರ್ಣ ಪ್ರೊಟೀನ್‌ ಮಿಶ್ರಣಗಳಾಗಿದ್ದು, ಏಕಕಾಲಕ್ಕೆ ರಾಸಾಯನಿಕ ಕ್ರಿಯೆಯಲ್ಲಿ ಪ್ರಬಲವಾಗಿ ವರ್ತಿಸಿ ‘ಬೇಟೆ’ಯು ಪಾರ್ಶ್ವವಾಯುವಿನಿಂದ ನಿಸ್ತೇಜವಾಗುವಂತೆ ಅಥವಾ ‘ಬೇಟೆ’ಯ ಹಠಾತ್‌ ಸಾವಿಗೆ ಕಾರಣವಾಗುತ್ತವೆ ಎಂದು ಹೇಳಲಾಗಿದೆ.
