ಭಾರತ ಗೆದ್ದಿದೆ, ಶುಭಕಾಲ ಬರುತ್ತಿದೆ

ಗಾಂಧಿನಗರ (ಐಎಎಎನ್‌ಎಸ್‌): ಲೋಕಸಭೆ ಚುನಾವಣೆ ಫಲಿತಾಂಶ ಹೊರಬಿದ್ದ ಬಳಿಕ ಮೊದಲ ಪ್ರತಿಕ್ರಿಯೆ ನೀಡಿದ ಬಿಜೆಪಿ ಪ್ರಧಾನಿ ಅಭ್ಯರ್ಥಿ ನರೇಂದ್ರ ಮೋದಿ, ‘ ಭಾರತ ಗೆದ್ದಿದೆ. ಒಳ್ಳೆಯ ದಿನಗಳು ಬರುತ್ತಿವೆ ( ಭಾರತ್‌ ಕಿ ವಿಜಯ್‌. ಅಛ್ಛಾ ದಿನ್‌ ಆನೆ ವಾಲಾ  ಹೈ’ ಎಂದು ಟ್ವೀಟ್‌ ಮಾಡಿದರು.

ಬಸು ದಾಖಲೆ ಮುರಿಯಲು ವಿಫಲ (ಅಹಮದಾಬಾದ್ ವರದಿ): ನರೇಂದ್ರ ಮೋದಿ ಅವರು ವಡೋದರಾದಲ್ಲಿ ತಮ್ಮ ಎದುರಾಳಿ, ಕಾಂಗ್ರೆಸ್‌ನ ಮಧುಸೂದನ್‌ ಮಿಸ್ತ್ರಿ ಅವರನ್ನು 5,70,128 ಮತಗಳಿಂದ ಸೋಲಿಸಿದ್ದಾರೆ. ಆದರೆ 2004ರಲ್ಲಿ ಭಾರಿ ಅಂತರದಲ್ಲಿ ಗೆದ್ದಿದ್ದ ಸಿಪಿಎಂ ಅನಿಲ್‌ ಬಸು ದಾಖಲೆ ಮುರಿಯಲು ಮೋದಿ ಸೋತಿದ್ದಾರೆ.

2004ರ ಚುನಾವಣೆಯಲ್ಲಿ ಪಶ್ಚಿಮ­ಬಂಗಾಳದ ಅಮರ್‌ಬಾಗ್‌ ಕ್ಷೇತ್ರದಿಂದ ಸ್ಪರ್ಧಿಸಿದ್ದ ಬಸು, 5,92,502 ಮತಗಳ ಭಾರಿ ಅಂತರದಿಂದ ವಿಜೇತರಾಗಿದ್ದರು.

1989ರ ಚುನಾವಣೆಯಲ್ಲಿ ಜನತಾ­ದಳ­ದಿಂದ ಸ್ಪರ್ಧಿಸಿದ್ದ ರಾಮ್‌ವಿಲಾಸ್‌ ಪಾಸ್ವಾನ್‌, 5,04,448 ಮತಗಳಿಂದ ಗೆದ್ದು 1977ರಲ್ಲಿ ತಾವೇ ಮಾಡಿದ್ದ ದಾಖಲೆ ಮುರಿದಿದ್ದರು. 77ರಲ್ಲಿ  ಭಾರ­ತೀಯ ಲೋಕದಳದ ಅಭ್ಯರ್ಥಿಯಾಗಿ ಸ್ವರ್ಧಿ­ಸಿದ್ದ   ಪಾಸ್ವಾನ್‌್, 4,24,545 ಮತಗಳಿಂದ ಗೆದ್ದಿದ್ದರು.

ಅಮ್ಮನ ಆಶೀರ್ವಾದ
ಮೋದಿ ಶುಕ್ರವಾರ ತಮ್ಮ ತಾಯಿಯನ್ನು ಭೇಟಿಯಾಗಿ ಆಶೀರ್ವಾದ ಪಡೆದರು. ಶಿರಬಾಗಿ ವಂದಿಸಿದ ಮಗನಿಗೆ ತಾಯಿ ಹೀರಾಬೆನ್‌ ಮನದುಂಬಿ ಆಶೀರ್ವದಿಸಿದರು.

‘ಅವನಿಗೆ ನನ್ನ ಆಶೀರ್ವಾದ ಇದೆ. ಆತ ದೇಶ ಅಭಿವೃದ್ಧಿಯತ್ತ ಕೊಂಡೊ­ಯ್ಯಲ್ಲಿದ್ದಾನೆ’ ಎಂದು ತಿಳಿಸಿದರು. ತಾಯಿ ಆಶೀರ್ವಾದ ಪಡೆದ ಮೋದಿ ತಮ್ಮ ಕುಟುಂಬದ ಸದಸ್ಯರು ಹಾಗೂ ಸಹೋದರ ಪಂಕಜ್‌ ಮೋದಿ ಮಕ್ಕಳ ಜತೆ ಸ್ವಲ್ಪ ಹೊತ್ತು ಕಾಲ ಕಳೆದರು.

ಎರಡೂ ಕ್ಷೇತ್ರದಲ್ಲೂ ಭಾರಿ ಅಂತರದ ಗೆಲುವು
ನವದೆಹಲಿ: ಗುಜರಾತ್‌ನ ವಡೋದರಾದಲ್ಲಿ ನರೇಂದ್ರ ಮೋದಿ  8,45,464 ಮತಗಳನ್ನು ಪಡೆದಿದ್ದರೆ ಇವರ ಸಮೀಪದ ಪ್ರತಿಸ್ಪರ್ಧಿ ಕಾಂಗ್ರೆಸ್‌ನ ಮಧುಸೂದನ ಮಿಸ್ತ್ರಿ 2,75,336 ಮತಗಳನ್ನು ಪಡೆದಿದ್ದಾರೆ.