ಪರ್ತ್ (ಐಎಎನ್ಎಸ್): ಆಸ್ಟ್ರೇಲಿಯಾ ವಿಮಾನಯಾನ ಸಂಸ್ಥೆ ಕ್ವಾಂಟಾಸ್ ದಿಢೀರ್ ಮುಷ್ಕರದ ಕಾರಣ ಕಾಮನ್ವೆಲ್ತ್ ಮುಖ್ಯಸ್ಥರು ಹಾಗೂ ಮಾಧ್ಯಮ ಪ್ರತಿನಿಧಿಗಳು ಶನಿವಾರ ಅನಿವಾರ್ಯವಾಗಿ ಪರ್ಯಾಯ ಪ್ರಯಾಣ ವ್ಯವಸ್ಥೆ ಮಾಡಿಕೊಳ್ಳಬೇಕಾಯಿತು.
ಮುಷ್ಕರದಿಂದಾಗಿ 600 ವಿಮಾನಗಳು ಹಾರಾಟ ನಡೆಸದ್ದರಿಂದ ಸುಮಾರು 70,000 ಪ್ರಯಾಣಿಕರು ತೊಂದರೆಗೆ ಒಳಗಾದರು. ಏಕಾಏಕಿ ಉಂಟಾದ ಈ ಪರಿಸ್ಥಿತಿಯಿಂದ ಪ್ರಧಾನಿ ಜೂಲಿಯಾ ಗಿಲ್ಲಾರ್ಡ್ ತೀವ್ರ ಇಕ್ಕಟ್ಟಿಗೆ ಸಿಲುಕಿದ್ದಾರೆ.
ವೇತನ ಹಾಗೂ ಇತರ ಬೇಡಿಕೆಗಳಿಗೆ ಸಂಬಂಧಿಸಿದಂತೆ ಕ್ವಾಂಟಾಸ್ ಆಡಳಿತ ಮಂಡಳಿ ಹಾಗೂ ನೌಕರರ ಮಧ್ಯೆ ಮುಸುಕಿನ ಗುದ್ದಾಟ ನಡೆಯುತ್ತಿದೆ. ಬಿಕ್ಕಟ್ಟು ಶಮನಕ್ಕೆ ಮಧ್ಯ ಪ್ರವೇಶಿಸುವಂತೆ ಗಿಲ್ಲಾರ್ಡ್ `ಫೇರ್ ವರ್ಕ್ ಆಸ್ಟ್ರೇಲಿಯಾ~ದ (ರಾಷ್ಟ್ರೀಯ ಕಾರ್ಯಸ್ಥಳ ಸಂಬಂಧಿ ನ್ಯಾಯಮಂಡಳಿ) ಮೊರೆ ಹೋಗಬೇಕಾಯಿತು.
ಕಾಮನ್ವೆಲ್ತ್ ರಾಷ್ಟ್ರಗಳ 17 ಮುಖ್ಯಸ್ಥರು ಹಾಗೂ ಸುಮಾರು 700 ಮಾಧ್ಯಮಪ್ರತಿನಿಧಿಗಳು ಕ್ವಾಂಟಾಸ್ ವಿಮಾನದಲ್ಲಿ ಪ್ರಯಾಣಿಸಬೇಕಿತ್ತು.
ದ್ವಿಪಕ್ಷೀಯ ಮಾತುಕತೆ ರದ್ದು: ಶೃಂಗಸಭೆಯಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದ ಉಪರಾಷ್ಟ್ರಪತಿ ಹಮೀದ್ ಅನ್ಸಾರಿ ಹಾಗೂ ಜೂಲಿಯಾ ಗಿಲ್ಲಾರ್ಡ್ ಮಧ್ಯೆ ಭಾನುವಾರ ನಡೆಯಬೇಕಿದ್ದ ದ್ವಿಪಕ್ಷೀಯ ಸಭೆ ಮುಷ್ಕರದ ಹಿನ್ನೆಲೆಯಲ್ಲಿ ರದ್ದಾಗಿದೆ.