ಸೌಲಭ್ಯಗಳಿಗೆ ಆಗ್ರಹಿಸಿ ಅಂಗವಿಕಲರ ಪ್ರತಿಭಟನೆ

ಬಾಗಲಕೋಟೆ: ಗ್ರಾಮ ಪಂಚಾಯ್ತಿಯಲ್ಲಿ ಅಂಗವಿಕಲರಿಗೆ ಮೀಸಲಿರುವ ಶೇ 3ರ ಅನುದಾನವನ್ನು ಅಂಗವಿಕರಿಗೆ ತಲುಪುವಂತೆ ಕ್ರಮ ಕೈಗೊಳ್ಳುವುದು ಸೇರಿದಂತೆ ವಿವಿಧ ಸೌಲಭ್ಯಗಳಿಗೆ ಆಗ್ರಹಿಸಿ ಜಿಲ್ಲಾ ಅಂಗವಿಕಲರ ಒಕ್ಕೂಟದ ಪದಾಧಿಕಾರಿಗಳು ನವನಗರದ ಜಿಲ್ಲಾಡಳಿತ ಭವನದ ಮುಂಭಾಗ ಶುಕ್ರವಾರ ಪ್ರತಿಭಟನೆ ನಡೆಸಿದರು.

ನಿರ್ಮಲ ಭಾರತ ಯೋಜನೆಯಡಿ ಅಂಗವಿಕಲರಿಗೆ ಶೌಚಾಲಯ ನಿರ್ಮಾಣಕ್ಕೆ ಅವಕಾಶ ಕಲ್ಪಿಸಬೇಕು, ಆಶ್ರಯ ಯೋಜನೆ, ಉದ್ಯೋಗ ಖಾತರಿ ಯೋಜನೆಯಲ್ಲಿ ಅಂಗವಿಕಲರಿಗೆ ಹೆಚ್ಚು ಒತ್ತು ನೀಡಬೇಕು, ಶಾಸಕರು ಮತ್ತು ಸಂಸದರ ಅನುದಾನ ಅಂಗವಿಕಲರಿಗೆ ಬಳಕೆಯಾಗುವಂತೆ ಕ್ರಮ ಕೈಗೊಳ್ಳಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು.

ಜಿಲ್ಲಾಡಳಿತ ಭವನದಲ್ಲಿರುವ ಜಿಲ್ಲಾ ಅಂಗವಿಕಲರ ಕಚೇರಿಗೆ ಅಂಗವಿಕಲರು ಸುಲಭವಾಗಿ ಹೋಗಿಬರಲು ಅನುಕೂಲವಾಗುವಂತೆ ಲಿಫ್ಟ್‌ ವ್ಯವಸ್ಥೆ ಮಾಡಬೇಕು, ಈ ಹಿಂದೆ ಇದ್ದ ಮಾಜಿ ಸೈನಿಕ ಕಲ್ಯಾಣ ಇಲಾಖೆ ಕಚೇರಿ ಕೊಠಡಿ ಸಂಖ್ಯೆ 3 ಖಾಲಿ ಇದ್ದು, ಅಲ್ಲಿಗೆ ಜಿಲ್ಲಾ ಅಂಗವಿಕಲರ ಇಲಾಖೆಯನ್ನು ಸ್ಥಳಾಂತರಿಸಬೇಕು ಎಂದು ಒತ್ತಾಯಿಸಿದರು.

ನಕಲಿ ಬಸ್‌ಪಾಸ್‌ ತಡೆಗೆ ಆಗ್ರಹ: ಜಿಲ್ಲೆಯಲ್ಲಿ ಅಂಗವಿಕಲರ ಹೆಸರಿನಲ್ಲಿ ಅನೇಕರು ವೈದ್ಯಕೀಯ ಪ್ರಮಾಣಪತ್ರಗಳನ್ನು ಪಡೆದುಕೊಂಡು ಸಾರಿಗೆ ಇಲಾಖೆಗೆ ನೀಡುವ ಮೂಲಕ ಅಂಗವಿಕಲರಿಗೆ ರಾಜ್ಯದಾದ್ಯಂತ ಸಂಚರಿಸಲು ಇರುವ ಉಚಿತ ಬಸ್‌ಪಾಸ್‌ ಅನ್ನು ದುರುಪಯೋಗ ಪಡಿಸಿಕೊಳ್ಳು­ತ್ತಿದ್ದು, ಅಂತವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿ ಜಿಲ್ಲಾ ಅಂಗವಿಕಲರ ಮತ್ತು ಹಿರಿಯ ನಾಗರಿಕ ಸಬಲೀಕರಣ ಇಲಾಖೆ ಅಧಿಕಾರಿ ಹಾಗೂ ವಾಯವ್ಯ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ ವಿಭಾಗೀಯ ನಿಯಂತ್ರಣಾಧಿಕಾರಿಗೆ ಮನವಿ ಸಲ್ಲಿಸಿದರು.

ಕರ್ನಾಟಕ ರಾಜ್ಯ ಅಂಗವಿಕಲರ ಒಕ್ಕೂಟದ ಕಾರ್ಯದರ್ಶಿ ರಘು ಹುಬ್ಬಳ್ಳಿ, ಜಿಲ್ಲಾ ಅಂಗವಿಕಲರ ಒಕ್ಕೂಟದ ಅಧ್ಯಕ್ಷ ಸುರೇಶ ತಳಗೇರಿ, ಸಂಗಮೇಶ ಭಾವಿಕಟ್ಟಿ, ಮಹಾಂತೇಶ ಪಾಟೀಲ, ಸುಮಿತ್ರಾ ಜಾನಮಟ್ಟಿ, ಯಂಕವ್ವ ಚೂರಿ, ಗೌರಮ್ಮ ಕಾಳಗಿಮಠ, ಶಿಲ್ಪ ಹೊಸಳ್ಳಿ, ರೇಣುಕಾ ಕಲಾದಗಿ, ಯಲ್ಲಪ್ಪ ಕುಂಬಾರ, ಈರಮ್ಮ ಹಿರೇಮಠ, ಮಂಜುಳಾ ಹಡಪದ, ವಿಜಯಲಕ್ಷ್ಮಿ ಶಾಸನ್ನವರ ಮತ್ತಿತರರು ಭಾಗವಹಿಸಿದ್ದರು.