‘ಅನಗತ್ಯ ಯೋಜನೆಗಳಿಗೆ ಮುಂದಾದರೆ ಕೆಲಸಕ್ಕೆ ಕುತ್ತು’

ಬೆಂಗಳೂರು: ‘ಅನಗತ್ಯ ಕಾಮಗಾರಿ­ಗಳಿಗೆ ಅನುಮೋದನೆ ನೀಡಿದರೆ ಅಂತಹ ಎಂಜಿನಿಯರ್‌ಗಳನ್ನು ಆ ಕ್ಷಣವೇ ಮನೆಗೆ ಕಳುಹಿಸುವೆ’ ಎಂದು ಬಿಬಿಎಂಪಿ ಆಯುಕ್ತ ಎಂ.ಲಕ್ಷ್ಮಿ­ನಾರಾಯಣ ಎಚ್ಚರಿಕೆ ನೀಡಿದರು.

ಏಕಕಾಲಕ್ಕೆ 1,367 ವಾರ್ಡ್‌­ಮಟ್ಟದ ಕಾಮಗಾರಿಗಳಿಗೆ ಸೋಮ­ವಾರ ಕಾರ್ಯದ ಆದೇಶ ನೀಡುವ ಸಮಾರಂಭದಲ್ಲಿ ಅವರು ಮಾತ­ನಾಡಿ, ‘ಬಿಬಿಎಂಪಿ ಆರ್ಥಿಕ ಸ್ಥಿತಿ ಮೊದಲೇ ಕೆಟ್ಟದಾಗಿದೆ. ಅನಗತ್ಯ ಕಾಮಗಾರಿಗಳಿಗೆ ಹುಸಿ ಅಂದಾಜು ಪತ್ರ ಸಿದ್ಧಪಡಿಸಿದ ಎಂಜಿನಿಯರ್‌­ಗಳನ್ನು ಯಾವುದೇ ಕಾರಣಕ್ಕೂ ಸುಮ್ಮನೆ ಬಿಡುವುದಿಲ್ಲ. ಎಂದರು.

ಬಿಬಿಎಂಪಿ ಸದಸ್ಯರೂ ಅಷ್ಟೇ. ಯಾವ ಕಾಮಗಾರಿಗಳು ತುರ್ತಾಗಿ ಅಗತ್ಯ­ವಿದೆಯೋ, ಅಂಥವುಗಳ ಪ್ರಸ್ತಾ­ವ­ವನ್ನೇ ಆದ್ಯತೆ ಮೇರೆಗೆ ತರಬೇಕು ಎಂದು ಹೇಳಿದರು.

ಮೇಯರ್‌ ಬಿ.ಎಸ್‌. ಸತ್ಯನಾರಾ­ಯಣ, ‘ಮುಂದಿನ ಸೋಮವಾರವೇ ಎಲ್ಲ ಕಾಮಗಾರಿಗಳಿಗೂ ಚಾಲನೆ ನೀಡಬೇಕು. ಸಚಿವರಿಗೆ ಕಾಯದೆ ಶಾಸಕರು, ವಾರ್ಡ್‌ ಸದಸ್ಯರ ಉಪಸ್ಥಿತಿಯಲ್ಲಿ ಭೂಮಿ­ಪೂಜೆ ನೆರ­ವೇರಿ­ಸ­ಬೇಕು’ ಎಂದು ಸೂಚಿಸಿದರು.

‘ಕೆ.ಆರ್‌. ಮಾರುಕಟ್ಟೆ ಸ್ವಚ್ಛತಾ ಆಂದೋಲನಕ್ಕೆ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿದ್ದು, ಅದನ್ನು ಸೂಪರ್‌ ಮಾರು­ಕಟ್ಟೆ­ಗಳ ರೀತಿಯಲ್ಲಿ ಅಭಿವೃದ್ಧಿ ಮಾಡಲಾಗುವುದು. ಕೆ.ಆರ್‌. ಮಾರುಕಟ್ಟೆ­ಯಲ್ಲಿ ಸ್ವಚ್ಛತೆಯನ್ನು ಕಾಪಾಡಲು ಖಾಸಗಿ ಕಂಪೆನಿಗಳ ಜತೆ ಒಪ್ಪಂದ ಮಾಡಿಕೊಳ್ಳಲು ಉದ್ದೇಶಿಸಲಾಗಿದೆ’ ಎಂದರು.

ಬಿಬಿಎಂಪಿ ಇತ್ತೀಚೆಗೆ ಏಕಗವಾಕ್ಷಿ ಯೋಜನೆ ಮೂಲಕ ರೂ 494 ಕೋಟಿ ಮೊತ್ತದ 2,276 ಕಾಮಗಾರಿಗಳಿಗೆ ಟೆಂಡರ್‌ ಕರೆದಿತ್ತು. ಅರ್ಧದಷ್ಟು ಕಾಮ-­­ಗಾರಿಗಳಿಗೆ ಮಾತ್ರ ಗುತ್ತಿಗೆ­ದಾರರು ಸ್ಪಂದಿಸಿದ್ದರು.

‘ಬಾಕಿ 1,359 ಕಾಮಗಾರಿಗಳಿಗೆ ಮೂರನೇ ಬಾರಿ ಇನ್ನೊಮ್ಮೆ ಟೆಂಡರ್‌ ಕರೆಯಲಾಗುತ್ತದೆ. ಆಗ ಸಹ ಯಾರೂ ಟೆಂಡರ್‌ ಪ್ರಕ್ರಿಯೆ­ಯಲ್ಲಿ ಭಾಗವಹಿಸದಿದ್ದರೆ ಕರ್ನಾಟಕ ಗ್ರಾಮೀಣ ಮೂಲಸೌಕರ್ಯ ಅಭಿ­ವೃದ್ಧಿ ಸಂಸ್ಥೆ ಮೂಲಕ ಕಾಮಗಾರಿ ನಡೆಸಲಾಗುವುದು’ ಎಂದು ವಾರ್ಡ್‌­ಮಟ್ಟದ ಕಾಮಗಾರಿಗಳ ಸ್ಥಾಯಿ ಸಮಿತಿ ಅಧ್ಯಕ್ಷ ಎ.ಎಚ್‌. ಬಸವರಾಜು ಹೇಳಿದರು.

ಚರಂಡಿ ನಿರ್ಮಾಣ, ರಸ್ತೆ ದುರಸ್ತಿ, ಫುಟ್‌ಪಾತ್‌ ನಿರ್ಮಾಣ, ಉದ್ಯಾನ ಮತ್ತು ಆಟದ ಮೈದಾನಗಳ ನಿರ್ವಹಣೆ, ಬೀದಿ ದೀಪಗಳ ವ್ಯವಸ್ಥೆ ಮತ್ತಿತರ ಕಾಮಗಾರಿಗಳನ್ನು ವಾರ್ಡ್‌ ಮಟ್ಟದಲ್ಲಿ ಕೈಗೊಳ್ಳಲಾಗುತ್ತಿದೆ.