ಮುಂಬೈ (ಪಿಟಿಐ): ವಸೂಲಾಗದ ಸಾಲ (ಎನ್‌ಪಿಎ) ಸೇರಿದಂತೆ ವಿವಿಧ ನಿಯಂತ್ರಣ ಕ್ರಮಗಳನ್ನು ಸಮರ್ಪಕವಾಗಿ ಪಾಲನೆ ಮಾಡದ ಕಾರಣಕ್ಕೆ ಭಾರತೀಯ ರಿಸರ್ವ್‌ ಬ್ಯಾಂಕ್, ಕರ್ಣಾಟಕ ಬ್ಯಾಂಕ್‌ಗೆ ₹ 1.2 ಕೋಟಿ ದಂಡ ವಿಧಿಸಿದೆ.
ನಿಯಮಗಳ ಉಲ್ಲಂಘನೆ ಕಾರಣಕ್ಕೆ ಸರ್ಕಾರಿ ಸ್ವಾಮ್ಯದ ಬ್ಯಾಂಕ್ ಆಫ್‌ ಇಂಡಿಯಾಕ್ಕೆ ₹ 5 ಕೋಟಿ ಮತ್ತು ಸಾರಸ್ವತ್ ಕೋ–ಆಪರೇಟಿವ್‌ ಬ್ಯಾಂಕ್‌ಗೆ ₹ 30 ಲಕ್ಷ ದಂಡ ವಿಧಿಸಿದೆ.
ಕರ್ಣಾಟಕ ಬ್ಯಾಂಕ್ ಪ್ರಕರಣದಲ್ಲಿ, ಸಂಪತ್ತಿನ ವರ್ಗೀಕರಣ, ಮುಂಗಡಗಳಿಗೆ ಹೆಚ್ಚುವರಿ ಹಣ ಮೀಸಲು ಇಡದಿರುವುದು ಮತ್ತು ವಸೂಲಾಗದ ಸಾಲದ ಖಾತೆಗಳ (ಎನ್‌ಪಿಎ) ಮಾಹಿತಿಯಲ್ಲಿ ವ್ಯತ್ಯಾಸ ಕಂಡು ಬಂದಿರುವುದರಿಂದ ದಂಡ ವಿಧಿಸಲಾಗಿದೆ ಎಂದು ಆರ್‌ಬಿಐ ತಿಳಿಸಿದೆ.
ಈ ಮೂರೂ ಪ್ರಕರಣಗಳಲ್ಲಿ ಕೇಂದ್ರೀಯ ಬ್ಯಾಂಕ್‌ನ ನಿಯಂತ್ರಣ ಕ್ರಮಗಳ ಪಾಲನೆಯಲ್ಲಿನ ನಿರ್ಲಕ್ಷ್ಯದ ಕಾರಣಕ್ಕೆ ದಂಡ ವಿಧಿಸಲಾಗಿದೆ.
