ನವದೆಹಲಿ (ಪಿಟಿಐ): ಎಫ್ಎಂಸಿಜಿ ಮಾರುಕಟ್ಟೆಗೆ ಲಗ್ಗೆ ಇರಿಸಿರುವ ರಿಲಯನ್ಸ್ ರಿಟೇಲ್ ವೆಂಚರ್ಸ್ ಲಿಮಿಟೆಡ್ ಕಂಪನಿಯು, ತನ್ನ ಕೆಲವು ಉತ್ಪನ್ನಗಳಿಗೆ ಪ್ರತಿಸ್ಪರ್ಧಿ ಉತ್ಪನ್ನಗಳಿಗಿಂತ ಶೇಕಡ 35ರವರೆಗೆ ಕಡಿಮೆ ಬೆಲೆ ನಿಗದಿ ಮಾಡಿದೆ.
ಪ್ರತಿಸ್ಪರ್ಧಿ ಉತ್ಪನ್ನಗಳಿಗೆ ಪೈಪೋಟಿ ನೀಡುವಂತೆ ನಿಗದಿ ಮಾಡಿರುವ ಈ ಬೆಲೆಯು ಗ್ರಾಹಕರನ್ನು ಆಕರ್ಷಿಸಲಿದೆ ಎಂದು ಮಾರುಕಟ್ಟೆ ಪರಿಣತರು ನಿರೀಕ್ಷಿಸಿದ್ದಾರೆ.
ಈ ಎಫ್ಎಂಸಿಜಿ ಉತ್ಪನ್ನಗಳು ಈಗ ಆಯ್ದ ಮಾರುಕಟ್ಟೆಗಳಲ್ಲಿ ಮಾತ್ರ ಲಭ್ಯವಿವೆ. ಆದರೆ ಕಂಪನಿಯು ದೇಶದಾದ್ಯಂತ ಡೀಲರ್ ಜಾಲವನ್ನು ಕಟ್ಟುತ್ತಿದೆ. ಕಂಪನಿಯು ಗ್ಲಿಮ್ಮರ್, ಗೆಟ್ ರಿಯಲ್ ಮತ್ತು ಪ್ಯುರಿಕ್ ಸೋಪುಗಳ ಬೆಲೆಯನ್ನು ₹ 25ಕ್ಕೆ ನಿಗದಿ ಮಾಡಿದೆ. ಇದು ಪ್ರತಿಸ್ಪರ್ಧಿ ಸೋಪುಗಳ ಬೆಲೆಗಿಂತ ಕಡಿಮೆ.
ಪಾತ್ರೆ ತೊಳೆಯುವ ಸೋಪುಗಳ ಬೆಲೆಯನ್ನು ಕಂಪನಿಯು ₹ 5, ₹ 10 ಮತ್ತು ₹ 15ಕ್ಕೆ ನಿಗದಿ ಮಾಡಿದೆ. ಪಾತ್ರೆ ತೊಳೆಯುವ ಜೆಲ್ಗಳನ್ನು ₹ 10, ₹ 30 ಹಾಗೂ ₹ 45ಕ್ಕೆ ಮಾರುಕಟ್ಟೆಗೆ ತಂದಿದೆ.