ಎರಡನೇ ದಿನವೂ ನಕಾರಾತ್ಮಕ ವಹಿವಾಟು

ಜಾಗತಿಕ ಆರ್ಥಿಕ ಹಿಂಜರಿತದ ಆತಂಕದಿಂದಾಗಿ ಐ.ಟಿ. ಮತ್ತು ಔಷಧ ಷೇರುಗಳು ಕುಸಿತ ಕಂಡವು. ಇದು ಷೇರುಪೇಟೆಗಳ ವಹಿವಾಟು ಇಳಿಕೆ ಕಾಣುವಂತೆ ಮಾಡಿತು.

ವಾಹನ ಮತ್ತು ಬಂಡವಾಳ ಸರಕುಗಳ ಮೌಲ್ಯ ಹೆಚ್ಚಳದಿಂದ ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ ಗರಿಷ್ಠ ಮಟ್ಟದಲ್ಲಿ ವಹಿವಾಟು ಆರಂಭಿಸಿತು. ದಿನದ ಗರಿಷ್ಠ ಮಟ್ಟವಾದ 60,676 ಅಂಶಗಳಿಗೆ ತಲುಪಿತ್ತು. ಆದರೆ, ನಂತರ ಇಳಿಮುಖ ಹಾದಿಗೆ ಹೊರಳಿದ್ದರಿಂದ 413 ಅಂಶಗಳ ಇಳಿಕೆ ಕಂಡು ವಹಿವಾಟು ಅಂತ್ಯವಾಯಿತು. ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ ನಿಫ್ಟಿ 126 ಅಂಶ ಇಳಿಕೆ ಕಂಡು 17,877 ಅಂಶಗಳಿಗೆ ತಲುಪಿತು.

ಸೆನ್ಸೆಕ್ಸ್‌ನಲ್ಲಿ ಟೆಕ್‌ ಮಹೀಂದ್ರ ಷೇರು ಮೌಲ್ಯ ಶೇ 3.13ರಷ್ಟು ಗರಿಷ್ಠ ನಷ್ಟ ಕಂಡಿತು.

‘ವಾರದ ವಹಿವಾಟಿನ ಅವಧಿ ಮುಕ್ತಾಯವಾಗಲಿರುವುದರಿಂದ ಷೇರುಪೇಟೆಗಳ ವಹಿವಾಟು ಅಸ್ಥಿರವಾಗಿತ್ತು. ಎಲ್ಲಾ ವಲಯಗಳಲ್ಲಿಯೂ ನಡೆದ ಲಾಭಗಳಿಕೆಯ ವಹಿವಾಟಿನಿಂದಾಗಿ ಶೇಕಡ ಅರ್ಧಕ್ಕೂ ಹೆಚ್ಚಿನ ನಷ್ಟವನ್ನು ಕಂಡವು’ ಎಂದು ಜಿಯೋಜಿತ್‌ ಹಣಕಾಸು ಸೇವೆಗಳ ಸಂಶೋಧನಾ ಮುಖ್ಯಸ್ಥ ವಿನೋದ್‌ ನಾಯರ್‌ ಹೇಳಿದ್ದಾರೆ.